ຈັດຂຶ້ນໃນວັນທີ 12 ສິງຫານີ້ທີ່ນະຄອນຫຼວງວຽງຈັນໂດຍການເຂົ້າຮ່ວມຂອງທ່ານ ບຸນແຝງ ພູມມະໄລສິດລັດຖະມົນຕີກະຊວງສາທາລະນະສຸກ ແລະ ທ່ານ ນິສິດ ແກ້ວປັນຍາຮອງລັດຖະມົນຕີກະຊວງພາຍໃນ, ມີບັນດາເຈົ້າແຂວງ, ເຈົ້າເມືອງ, ອົງການຈັດຕັ້ງມະຫາຊົນ ແລະ ຄູ່ຮ່ວມພັດທະນາເຂົ້າຮ່ວມ.
ທ່ານບຸນແຝງ ພູມມະໄລສິດ ກ່າວວ່າ: “ຜົນໄດ້ຮັບເຫັນໄດ້ຢ່າງຊັດເຈນເຖິງໝາກຜົນຕໍ່ກັບວຽກງານສຸຂະພາບຂອງແມ່ ແລະ ເດັກ ລວມເຖິງຂອງປະຊາຊົນພາຍໃນຊຸມຊົນຊຶ່ງໄດ້ຮັບການເອື້ອອຳນວຍໂດຍວຽກງານການປົກຄອງ ແລະ ການປະສານງານທີ່ເຂັ້ມແຂງຂຶ້ນໃນຂັ້ນຊຸມຊົນ."ພວກເຮົາຫວັງວ່າໃນອະນາຄົດຈະມີການສືບຕໍ່ໃນການພັດທະນາ ແລະ ການນໍາໃຊ້ວິທີການຄອນເນັກ ເພື່ອໃຫ້ເຂົ້າເຖິງກຸ່ມເປົ້າໝາຍທີ່ຕ້ອງການໆຊ່ວຍເຫຼືອຫຼາຍທີ່ສຸດ ແລະ ສາມາດຈັດການກັບບັນດາສິ່ງທ້າທາຍຂອງທ້ອງຖິ່ນ ໂດຍການເສີມສ້າງຄວາມເຂັ້ມແຂງໃຫ້ກັບບັນດາຜູ້ນໍາພາຂອງທ້ອງຖິ່ນ, ພະນັກງານ ແລະ ບຸກຄະລາກອນສາທາລະນະສຸກ. ຄວາມສໍາເລັດຄັ້ງສໍາຄັນນີ້ເກີດຂຶ້ນໄດ້ຍ້ອນການສະໜັບສະໜູນຂອງອົງການອະນາໄມໂລກ ແລະ ບັນດາຄູ່ຮ່ວມພັດທະນາທີ່ມີຄວາມມຸ່ງໝັ້ນ ບໍ່ວ່າຈະເປັນອົງການ USAID, ລັດຖະບານອົສຕຣາລີ ແລະ ລັດຖະບານລຸກຊຳບວກ ພ້ອມທັງຄູ່ຮ່ວມພັດທະນາອື່ນໆທີ່ໄດ້ໃຫ້ການສະໜັບສະໜູນໃນໄລຍະການແຜ່ລະບາດຂອງພະຍາດໂຄວິດ-19 ທີ່ຜ່ານມາ.
ທ່ານ ນິສິດ ແກ້ວປັນຍາກ່າວວ່າ: “ວຽກງານການສ້າງຄວາມເຂັ້ມແຂງ, ການເສີມສ້າງ ແລະ ການສະໜັບສະໜູນອົງການປົກຄອງທ້ອງຖິ່ນ ແລະ ຊຸມຊົນແມ່ນຂໍກຸນແຈອັນສໍາຄັນຕໍ່ວຽກງານການປັບປຸງການບໍລິການໃຫ້ບ້ານ, ສຸຂະພາບຂອງຊຸມຊົນ, ການພັດທະນາບ້ານ ແລະ ຄວາມອຸດົມຮັ່ງມີຂອງບ້ານ. ເພື່ອບັນລຸຕາມຄາດໝາຍທີ່ວາງໄວ້ ແລະ ເພື່ອຮັບປະກັນວ່າການບໍລິການເພື່ອສາມາດຕອບສະໜອງຄວາມຕ້ອງການຂອງປະຊາຊົນ ທັງໃນວຽກງານການບໍລິການສຸຂະພາບ ແລະ ຂະແໜງການອື່ນໆ.ຜ່ານການນໍາໃຊ້ວິທີການຄອນເນັກ, ບັນດາແພດໝໍ, ພະຍາບານ, ຜະດຸງຄັນ, ອາສາສະໝັກສາທາລະນະສຸກຂັ້ນບ້ານ(ອສບ), ຜູ້ນໍາຊົນເຜົ່າ ແລະ ທາງສາສະໜາ ແລະ ບັນດາພະນັກງານຈາກອົງການຈັດຕັ້ງມະຫາຊົນໄດ້ຮັບການສະໜັບສະໜູນເພີ່ມທັກສະໃນການປະສານງານ ແລະ ການໃຫ້ບໍລິການດ້ານສາທາລະນະສຸກຢ່າງມີປະສິດທິພາບ ແລະ ຜົນໄດ້ຮັບດ້ານສຸຂະພາບຂອງຜູ້ຮັບບໍລິການທີ່ດີຂຶ້ນ.
ທ່ານ ທິມໂມຕີ ອາມສະຕຣອງຜູ້ຕາງໜ້າອົງການອະນາໄມໂລກ ກ່າວວ່າ: "ເຖິງແມ່ນວ່າສິ່ງເຫຼົ່ານີ້ຈະເປັນຜົນໄດ້ຮັບເບື້ອງຕົ້ນເທົ່ານັ້ນ, ແຕ່ກໍເປັນເລື່ອງທີ່ໜ້າປະທັບໃຈເປັນຢ່າງຍິ່ງທີ່ໄດ້ເຫັນໝາກຜົນຂອງວິທີການຄອນເນັກ ຊຶ່ງມີຄວາມໝາຍຄວາມສໍາຄັນທີ່ສຸດຕໍ່ກັບຊຸມຊົນໂດຍສະເພາະຕໍ່ກັບບັນດາຄອບຄົວ, ພໍ່ແມ່ ແລະ ເດັກນ້ອຍໃນຊຸມຊົນລວມທັງວຽກງານການສັກວັກຊິນ, ວຽກງານສົ່ງເສີມສຸຂະພາບແມ່ ແລະ ເດັກ ແລະ ຂົງເຂດວຽກງານອື່ນໆ. ນອກຈາກນີ້, ການຄົ້ນຄວ້າດັ່ງກ່າວຍັງສະໜອງຂໍ້ມູນອັນສຳຄັນ ແລະ ເປັນການຮັບຟັງຄຳຄິດເຫັນຂອງຄົນໃນຊຸມຊົນອີກດ້ວຍ."ສິ່ງສໍາຄັນກໍຄືຈະຕ້ອງໄດ້ປຶກສາຫາລືວິທີການເພື່ອຮັບປະກັນຄວາມຍືນຍົງ ແລະ ຍືນຍາວຂອງວິທີການຄອນເນັກ ແລະ ຜັນຂະຫຍາຍການຈັດຕັ້ງປະຕິບັດວິທີການດັ່ງກ່າວໄປສູ່ບັນດາກະຊວງອື່ນໆ ແລະ ພາກສ່ວນທີ່ມີພາລະບົດບາດໃນວຽກງານສາທາລະນະສຸກ ເພື່ອເຮັດໃຫ້ປະຊາຊົນລາວທຸກຄົນມີສຸຂະພາບທີ່ດີ."ນັບຕັ້ງແຕ່ມີການລິເລີ່ມວິທີການຄອນເນັກໃນໄລຍະການແຜ່ລະບາດຂອງພະຍາດໂຄວິດ-19 ທີ່ຜ່ານມາ, ວິທີການດັ່ງກ່າວນີ້ຈະມີການຜັນຂະຫຍາຍການຈັດຕັ້ງປະຕິບັດໃນ
14 ແຂວງຢູ່ ສປປ ລາວ ພາຍໃນທ້າຍປີ 2024 ແລະ ມີແຜນທີ່ຈະຜັນຂະຫຍາຍໄປທຸກແຂວງທົ່ວປະເທດໃນອະນາຄົດ.ປັດຈຸບັນ, ວິທີການຄອນເນັກໄດ້ຮັບການສະໜັບສະໜູນຈາກອົງການອະນາໄມໂລກຮ່ວມກັບອົງການພັດທະນາສາກົນສະຫະລັດອາເມຣິກາ (USAID), ລັດຖະບານອົສຕຣາລີ ແລະ ລັດຖະບານລຸກຊຳບວກ, ວິທີການຄອນເນັກໄດ້ເນັ້ນໃສ່ການສ້າງຄວາມໄວ້ວາງໃຈລະຫວ່າງຜູ້ໃຫ້ບໍລິການດ້ານສາທາລະນະສຸກ ກໍຄືບັນດາແພດໝໍໃຫ້ການເບິ່ງແຍງສຸຂະພາບກັບຊຸມຊົນ ແລະ ຍັງສະໜັບສະໜູນການເຮັດວຽກຮ່ວມກັນກັບອົງການປົກຄອງທ້ອງຖິ່ນຢ່າງໃກ້ຊິດ ເພື່ອສ້າງຄວາມເຂັ້ມແຂງໃນວຽກງານການປົກຄອງ, ການວາງແຜນ ແລະ ການປະສານງານຮ່ວມກັນ ແລະ ເພີ່ມທະວີການເຂົ້າເຖິງການບໍລິການສຸຂະພາບທີ່ຈຳເປັນເຊັ່ນ: ການສັກວັກຊິນ, ການເບິ່ງແຍງສຸຂະພາບແມ່ ແລະ ເດັກ ແລະ ສົ່ງເສີມການລົງທະບຽນການເກີດ.
ຂ່າວ-ພາບ: ບຸນອູ້ມ
ຄໍາເຫັນ