ກອງປະຊຸມຖອດຖອນບົດຮຽນການໃຫ້ຄຳປຶກສາສາຍດ່ວນຂັ້ນສູນກາງ ແລະ ຂັ້ນແຂວງ ໄດ້ຈັດຂຶ້ນໃນວັນທີ 17 ກໍລະກົດນີ້ ທີ່ຫ້ອງປະຊຸມໂຮງແຮມເດີແກຣນເວີຊາຍ 2 ທີ່ເມືອງວັງວຽງ ແຂວງວຽງຈັນ ໃຫ້ກຽດເປັນປະທານໂດຍ ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ມີຜູ້ຕາງໜ້າ ຄະນະຮັບຜິດຊອບສາຍດ່ວນສູນກາງຊາວໜຸ່ມ, ບັນດາແຂວງເປົ້າໝາຍຄື: ແຂວງຜົ້ງສາລີ, ຊຽງຂວາງ, ບໍ່ແກ້ວ, ຫຼວງນ້ຳທາ ແລະ ແຂວງຫຼວງພະບາງ ພ້ອມດ້ວຍຄະນະຮັບຜິດຊອບຂັ້ນເມືອງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານຫຍໍ້ວຽກງານສາຍດ່ວນ ແລະ ບັນຫາທີ່ໄວໜຸ່ມພົບພໍ້ໄລຍະຜ່ານມາ ຈາກບັນດາແຂວງທີ່ເຂົ້າຮ່ວມ ໂດຍສະເພາະບັນຫາຄອບຄົວ, ຄວາມຮັກ, ວຽກເຮັດງານທຳຂອງໄວໜຸ່ມ ຊຶ່ງເປັນບັນຫາຫຼັກໆຂອງວຽກງານໃຫ້ຄຳປຶກສາ. ກອງປະຊຸມໄດ້ມີການແລກປ່ຽນຄຳຄິດເຫັນຢ່າງກົງໄປກົງມາ, ນອກນີ້ຍັງສືບຕໍ່ແຜນການທີ່ຈະຈັດຕັ້ງປະຕິບັດໃນຕໍ່ໜ້າ.
ໂອກາດນີ້, ທ່ານປະທານກອງປະຊຸມໄດ້ເນັ້ນໜັກ 5 ບັນຫາໃຫຍ່ທີ່ຈະຕ້ອງພ້ອມກັນເອົາໃຈໃສ່ໃນຕໍ່ໜ້າຄື:
1. ຮຽກຮ້ອງໃຫ້ຜູ້ເຂົ້າຮ່ວມຈົ່ງພ້ອມກັນແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບວຽກງານໃຫ້ຄຳປຶກສາສາຍດ່ວນ ໂດຍສະເພາະບັນຫາທີ່ຜູ້ໃຫ້ຄຳປຶກສາພົບພໍ້ໄລຍະທີ່ຜ່ານມາ; 2. ຜູ້ເຂົ້າຮ່ວມຕ້ອງເປັນເຈົ້າການໃນການຈັດຕັ້ງປະຕິບັດດ້ວຍຫຼາຍຮູບແບບ, ວິທີການນຳໃຊ້ຟອມເອເລັກໂທຣນິກ ຫຼືການນຳໃຊ້ບອດເກມ (ເລືອກທາງຂອງຂ້ອຍ) ເຂົ້າໃນວຽກງານຕົວຈິງ; 3. ຜູ້ເຂົ້າຮ່ວມຕ້ອງສ້າງຄວາມເປັນເອກກະພາບ, ສ້າງຄວາມເຂັ້ມແຂງ ຊຸກຍູ້ສົ່ງເສີມໃຫ້ຊາວໜຸ່ມໄດ້ຮັບຮູ້ຂໍ້ມູນຂ່າວສານກ່ຽວກັບສາຍດ່ວນ ໂດຍສະເພາະການແກ້ໄຂບັນຫາຄອບຄົວ, ບັນຫາວຽກເຮັດງານທຳຂອງຊາວໜຸ່ມໃຫ້ໄດ້ຮັບການແກ້ໄຂໃຫ້ດີຂຶ້ນເທື່ອລະກ້າວ; 4. ຖືເອົາວຽກໃຫ້ຄຳປຶກສາສາຍດ່ວນເປັນວຽກງານໜຶ່ງທີ່ສຳຄັນ ແລະ ຫັນເອົາວຽກງານດັ່ງກ່າວ ເປັນແຜນງານລະອຽດໃຫ້ແທດເໝາະກັບໜ້າວຽກຕົວຈິງຂອງແຕ່ລະພາກສ່ວນ ເພື່ອໃຫ້ວຽກງານໃຫ້ຄຳປຶກສາສາຍດ່ວນມີຄວາມຍືນຍົງ; 5. ຜູ້ເຂົ້າຮ່ວມຕ້ອງເອົາໃຈໃສ່ກ່ຽວກັບການຕອບໂຕ້ຂ່າວບິດເບື່ອນທາງສັງຄົມໃຫ້ເປັນປົກກະຕິ ແລະ ສືບຕໍ່ຍາດແຍ່ງການຊ່ວຍເຫຼືອຈາກອົງການສາກົນ ເພື່ອນຳມາໝູນໃຊ້ເຂົ້າໃນວຽກຕົວຈິງໃຫ້ຫຼາຍຂຶ້ນກວ່າເກົ່າ. ຂ່າວ: ນິງນ໋ອງ ສຽງສະຫວັນ
ຄໍາເຫັນ