ພ້ອມທັງຮັບຟັງແນວຄວາມຄິດໃນການຈັດສັນແຫຼ່ງທ່ອງທ່ຽວປາກເສັດ ເພື່ອຕ້ອນຮັບເທສະການປີໃໝ່ລາວ ພສ 2568 ທີ່ຈະມາເຖີງໃນມໍ່ໆນີ້, ເພື່ອອໍານວຍຄວາມສະດວກ, ຄວາມປອດໄພ ແລະ ຮັບປະກັນການມາທ່ອງທ່ຽວ ໄດ້ບັນຍາກາດ, ຄວາມມ່ວນຊື່ນ ແລະ ຮັກສາໄດ້ດ້ານວັດທະນະທຳ, ຮີດຄອງປະເພນີອັນດິງາມຂອງຊາດ.
ການລົງເຄື່ອນໄຫວຄັ້ງນີ້, ແມ່ນໄດ້ຕິດຕາມເບີ່ງການກະກຽມຈັດສັນສະຖານທີ່ຕ່າງໆ, ຈຸດໃຫ້ການບໍລິການບ່ອນນັ່ງຫຼິ້ນ, ບ່ອນຫຼິ້ນນ້ຳ, ສະຖານທີ່ຂາຍເຄື່ອງ ແລະ ຈຸດບໍລິການດ້ານອື່ນໆ ເພື່ອໃຫ້ມີຄວາມເປັນລະບຽບ, ສະດວກສະບາຍ ແລະ ສວຍງາມ. ນອກຈາກນັ້ນ, ຜູ້ປະກອບການ ຍັງຈະໄດ້ປະດັບປະດາ, ເອ້ຍ້ອງສະຖານທີ່ໃຫ້ມີຄວາມສວຍງາມຕື່ມອີກ ເພື່ອຕ້ອນຮັບນັກທ່ອງທ່ຽວ ທີ່ຈະມາທ່ຽວໃນໄລຍະບຸນປີ ໃໝ່ລາວ. ແຫຼ່ງທ່ອງທ່ຽວປາກເສັດ ເມືອງວາປີ ເປັນແຫຼ່ງທ່ອງທ່ຽວແຫ່ງໜຶ່ງ ທີ່ໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ, ຕ່າງແຂວງ ໂດຍສະເພາະໃນໄລຍະວັນສຳຄັນຕ່າງໆ ມີນັກທ່ອງທ່ຽວເຂົ້າມາທ່ຽວຊົມ, ພັກຜ່ອນກັບຄອບຄົວ, ໝູ່ເພື່ອນເປັນຫຼວງຫຼາຍ ເປັນຕົ້ນ: ແມ່ນໄລຍະບຸນປີໃໝ່ລາວ, ເນື່ອງຈາກມີຄວາມອຸດົມສົມບູນທາງທຳມະຊາດ, ເໝາະແກ່ການພັກຜ່ອນ, ຫຼິ້ນນຳ, ກິນເຂົ້າປ່າ ແລະ ອາກາດມີຄວາມສົດຊື່ນ, ຊຶ່ງຫ່າງຈາກເທດສະບານເມືອງວາປີ ປະມານ 5 ກິໂລແມັດ, ຫ່າງຈາກທາງຫຼວງ ເລກທີ 15 ປະມານ 4 ກິໂລແມັດ, ເສັ້ນທາງເຂົ້າເຖີງສະດວກສະບາຍ.
ໂອກາດດັ່ງກ່າວ, ທ່ານ ມະໄລວອນ ສີປະເສີດ ໄດ້ມີຄໍາເຫັນແລກປ່ຽນກັບຜູ້ປະກອບການ ໂດຍເນັ້ນໃຫ້ເອົາໃຈໃສ່ ຕໍ່ກັບການຮັກສາຄວາມປອດໄພ ຂອງນັກທ່ອງທ່ຽວ ທາງດ້ານຊີວິດ ແລະ ຊັບສິນ, ເພີ່ມທະວີເອົາໃຈໃສ່ຕໍ່ກັບການສະເຫຼີມສະຫຼອງປີໃໝ່ລາວ ຮັກສາໄດ້ວັດທະນະທຳອັນດີງາມຂອງຊາດ, ການຄົບງັນມ່ວນຊື່ນ ໃຫ້ມີຄວາມເໝາະສົມ ແລະ ສອດຄ່ອງຕາມລະບຽບການ ໂດຍສະເພາະກົດໝາຍວ່າດ້ວຍສິລະປະການສະແດງ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ