ຖວທ ສາລະວັນ ເຊື່ອມຊຶມມະຕິການປັບປຸງກົງຈັກການຈັດຕັ້ງ

ສະຫາຍ ຄໍາໄພ ໄຊຍະເດດ ຮອງເລຂາຄະນະພັກຮາກຖານ ຮອງຫົວໜ້າພະແນກ ຖວທ ແຂວງ ໄດ້ຜ່ານມະຕິຂອງຄະນະບໍລິຫານງານສູນກາງພັກ ເລກທີ 03/ຄບສພ, ວ່າດ້ວຍການປັບປຸງກົງຈັກການຈັດຕັ້ງ, ຍົກໃຫ້ເຫັນສະພາບລວມ, ເຫດຜົນ ແລະ ຄວາມຈຳເປັນ ຂອງການປັບປຸງກົງຈັກການຈັດຕັ້ງ, ທັດສະນະລວມ, ທິດທາງ, ຄາດໝາຍ ໃນການປັບປຸງກົງຈັກການຈັດຕັ້ງຄັ້ງນີ້ ແມ່ນການປະຕິບັດແນວທາງການຈັດຕັ້ງຂອງພັກປະຊາຊົນ ປະຕິວັດລາວ ໃຫ້ “ກະທັດຮັດ, ໂລ່ງລ່ຽນ, ມີປະສິດທິພາບ ແລະ ເຂັ້ມແຂງ” ເນື້ອແທ້ ກໍແມ່ນການບໍລິຫານຈັດການອົງການ ເພື່ອນໍາໃຊ້ຊັບພະຍາກອນຢ່າງປະຢັດ, ຄຸ້ມຄ່າ ແລະ ເກີດຜົນປະໂຫຍດສູງສຸດ, ມີປະສິດທິພາບ ແລະ ຍືນຍົງ ທັງເປັນການຫຼຸດຜ່ອນຈໍານວນກະຊວງ, ກົມ ແລະ ພະແນກການ ເຮັດໃຫ້ກົງຈັກກະທັດຮັດຂຶ້ນ, ມີຄວາມໜັກແໜ້ນ, ເຂັ້ມແຂງ, ມີຕຳແໜ່ງງານເໝາະສົມ, ຫຼຸດຜ່ອນຈໍານວນພະນັກງານ - ລັດຖະກອນ, ສັບຊ້ອນຄືນໃໝ່ ໃຫ້ເໝາະສົມ, ຫັນພະນັກງານ - ລັດຖະກອນ ຢູ່ສູນກາງ ລົງເພີ່ມໃຫ້ທ້ອງຖິ່ນ (ຂັ້ນເມືອງ ແລະ ຕາແສງ) ຢ່າງມີການເລືອກເຟັ້ນ ເພື່ອເພີ່ມກໍາລັງແຮງ ຂອງຜູ້ນໍາພາເຮັດຕົວຈິງ ຢູ່ຂັ້ນຮາກຖານ. ຈາກນັ້ນ, ກໍໄດ້ຜ່ານເນື້ອໃນເອກະສານ ມະຕິ 05 ຂອງສະພາແຫ່ງຊາດ ວ່າດ້ວຍການຮັບຮອງເອົາການປັບປຸງກົງຈັກການຈັດຕັ້ງ, ຄໍາແນະນຳເລກທີ 483/ຄລສພ ກ່ຽວກັບການປັບປຸງກົງຈັກການຈັດຕັ້ງ ແລະ ຜ່ານມະຕິຂອງຄະນະປະຈໍາພັກແຂວງສາລະວັນ ເລກທີ 969 ວ່າດ້ວຍການແຕ່ງຕັ້ງຄະນະຮັບຜິດຊອບການປັບປຸງກົງຈັກການຈັດຕັ້ງບັນດາພະແນກການ-ອົງການທຽບເທົ່າອ້ອມຂ້າງແຂວງ ແລະ ເມືອງ ພ້ອມທັງໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຕື່ມອີກ.

(ຂ່າວ-ພາບ: ວິໄລວອນ ສິດທິໄຊ)