ເຂົ້າເປັນສະມາຊິກອາຊຽນ (23 ກໍລະກົດ 1997 – 23 ກໍລະກົດ 2024), ສະຖານເອກອັກຄະລັດຖະທູດແຫ່ງ ສປປ ລາວປະຈໍາຮົງກາຣີ ຮ່ວມກັບບັນດາສະຖານທູດອາຊຽນປະຈຳຮົງກາຣີໄດ້ພ້ອມກັນຈັດງານສະແດງວັດທະນະທຳຂຶ້ນທີ່ໂຮງແຮມ Hiltonໃນນະຄອນຫຼວງ ບູດາແປສ ເພື່ອເປັນການເຜີຍແຜ່ວັດທະນະທໍາໃຫ້ບັນດາຊາວຕ່າງປະເທດກໍຄືນາໆຊາດໄດ້ຮັບຊາບ ແລະ ຮັບຮູ້ເຖິງວັດທະນະທຳ ທີ່ເປັນເອກະລັກ ແລະ ມີລັກສະນະສະເພາະອາຊຽນ.ພາຍໃຕ້ການໃຫ້ກຽດເຂົ້າຮ່ວມເປັນແຂກກິດຕິມະສັກຂອງທ່ານ Mr. Ádám Stifter ຜູ້ຊ່ວຍລັດຖະມົນຕີຮັບຜິດຊອບປະເທດເຂດຕາເວັນອອກກະຊວງການຕ່າງປະເທດ ແລະ ການຄ້າຮົງກາຣີຊຶ່ງທ່ານໄດ້ຂຶ້ນປະກອບຄຳເຫັນໂດຍໄດ້ກ່າວສະແດງຄວາມຊົມເຊີຍຕໍ່ຜົນງານຂອງອາຊຽນໃນໄລຍະຜ່ານ 57 ປີຜ່ານມາໃນການເປັນສູນກາງທາງດ້ານເສດຖະກິດຂອງພາກພື້ນ ແລະ ສາກົນ ທັງໄດ້ຍົກໃຫ້ເຫັນເຖິງຄວາມສຳຄັນຂອງການຮ່ວມມືລະຫວ່າງ ສະຫະພາບເອີຣົບກໍຄື ຮົງກາຣີກັບອາຊຽນໃນດ້ານຕ່າງໆລວມທັງດ້ານວັດທະນະທຳ ທີ່ມີບົດບາດສຳຄັນໃນການເພີ່ມທະວີສ້າງສາຍພົວພັນລະຫວ່າງລັດຖະບານກໍຄືປະຊາຊົນດ້ວຍກັນ, ທັງໄດ້ສັງເກດຕີລາຄາຄວາມທ້າທາຍຂອງສະພາບການປ່ຽນແປງສາກົນ ແລະ ຄວາມຈຳເປັນໃນການຮ່ວມມືກັນໃນປັດຈຸບັນ, ນອກຈາກນັ້ນທ່ານຍັງໄດ້ຍົກໃຫ້ເຫັນເຖິງບົດບາດ ແລະ ການໃຫ້ຄວາມສຳຄັນໃນການເສີມຂະຫຍາຍການຮ່ວມມືໃນດ້ານຕ່າງໆຜ່ານຊ່ອງທາງການທູດຂອງຮົງກາຣີກັບບັນດາປະເທດໃນພາກພື້ນອາຊຽນຊຶ່ງຮົງກາຣີເປັນປະເທດທຳອິດຈາກພາກພື້ນເອີຣົບກາງ ແລະ ຕາເວັນອອກທີ່ສະແດງເຈດຈຳນົງເຂົ້າຮ່ວມສົນທິສັນຍາໄມຕີຈິດ ແລະ ການຮ່ວມມື ຫຼື(TAC) ລວມທັງການໄດ້ເປີດສຳນັກງານສະຖານທູດຂອງຕົນໃນພາກພື້ນອາຊຽນເພີ່ມຂຶ້ນຕື່ມຊຶ່ງເປັນການຢືນຢັນວ່າ:ຮົງກາຣີມີຄວາມປາຖະໜາໃນການຮ່ວມມືກັບອາຊຽນໃຫ້ນັບມື້ນັບມີການຂະຫຍາຍຕົວເພີ່ມຂຶ້ນ.
ໃນໂອກາດດັ່ງກ່າວ ທ່ານ ຄຳພອນ ວົງສັນຕິ ເອກອັກຄະລັດຖະທູດ ສປປ ລາວ ປະຈຳ ຮົງກາຣີ ໄດ້ໃຫ້ກຽດຂຶ້ນລັ່ນຄ້ອງ ແລະ ກ່າວເປີດງານ ຢ່າງເປັນທາງການ ໃນຖານະເປັນປະທານໝູນວຽນ ອາຊຽນ ປີ 2024, ໂດຍທ່ານໄດ້ຍົກໃຫ້ເຫັນເຖິງປະຫວັດຄວາມເປັນມາຂອງອາຊຽນ, ບົດບາດຄວາມສຳຄັນ ແລະ ການຮ່ວມມືໃນຂອບສອງຝ່າຍລະຫວ່າງ ອາຊຽນ ແລະ ສະຫະພາບເອີຣົບກໍຄືຮົງກາຣີ ທີ່ມີການຮ່ວມມືກັນຫຼາຍຂຶ້ນໃນໄລຍະຜ່ານມາທາງດ້ານການຄ້າ, ການສຶກສາ, ວັດທະນະທຳ ແລະ ດ້ານອື່ນໆ ລວມທັງທິດທາງການຮ່ວມມືກັນໃນຕໍ່ໜ້າໃຫ້ຊາບໂດຍສັງເຂບ, ນອກຈາກນີ້ຍັງໄດ້ຍົກໃຫ້ເຫັນເຖິງຜົນສຳເລັດໃນການເປັນປະທານໝູນວຽນອາຊຽນຂອງ ສປປລາວໃນໄລຍະຜ່ານມາໂດຍຫຍໍ້, ທັງແຈ້ງບຸລິມະສິດຂອງການເປັນປະທານອາຊຽນປີ 2024ຄື:“ເພີ່ມທະວີການເຊືຶ່ອມຈອດ ແລະ ສ້າງຄວາມເຂັ້ມແຂງອາຊຽນ” ຫຼືASEAN Enhancing connectivity and Resilenceຊຶ່ງກົງກັບຈຸດປະສົງຂອງການຈັດງານສະຫຼອງວັນຄົບຮອບການສ້າງຕັ້ງ ອາຊຽນ ຄົບຮອບ 57 ປີ ໃນປີ 2024 ທັງຖືໂອກາດຈັດງານວາງສະແດງເຜີຍແຜ່ວັດທະນະທໍາອາຊຽນໃນໂອກາດດຽວກັນ. ການສະຫຼອງຄົບຮອບວັນສ້າງຕັ້ງອາຊຽນແມ່ນໄດ້ປະຕິບັດເປັນປົກກະຕິທຸກປີໂດຍມີການສັບປ່ຽນກັນເປັນປະທານເປີດງານຕາມການໝູນວຽນຂອງປະເທດສະມາຊິກອາຊຽນໃນແຕ່ລະປີຊຶ່ງໄດ້ເຊື້ອເຊີນແຂກຈາກພາກສ່ວນກ່ຽວຂ້ອງທັງພາກລັດແລະເອກະຊົນເຂົ້າຮ່ວມ, ສະເພາະປີ 2024 ແມ່ນໄດ້ຮັບການຮ່ວມມື ແລະ ສະໜັບສະໜູນທາງດ້ານສະຖານທີ່ຈາກໂຮງແຮມ Hiltonຊຶ່ງມີທີ່ຕັ້ງ ຢູ່ເຂດໃຈກາງນະຄອນຫຼວງບູດາແປສ ທີ່ມີນັກທ່ອງທ່ຽວຜ່ານໄປມາເປັນຈຳນວນຫຼາຍ, ການຈັດງານດັ່ງກ່າວໄດ້ດໍາເນີນນັບແຕ່ວັນທີ 8– 18 ສິງຫາ ນີ້ ຈຶ່ງຈະສໍາເລັດລົງ ເພື່ອເປີດໂອກາດໃຫ້ຊາວຕ່າງປະເທດໄດ້ສຶກສາຂໍ້ມູນ ແລະ ວັດທະນະທຳຂອງອາຊຽນທີ່ຈັດວາງສະແດງເປັນບູດຂອງແຕ່ລະປະເທດອາຊຽນໄວ້, ໃນຕອນທ້າຍ ທ່ານຄຳພອນ ວົງສັນຕິຕາງໜ້າໃຫ້ບັນດາທູດອາຊຽນອວຍພອນໃຫ້ການເປັນປະທານໝູນວຽນຂອງສະຫະພາບເອີຣົບຂອງຮົງກາຣີປະສົບຜົນສຳເລັດຕາມເປົ້າໝາຍທີ່ຕັ້ງໄວ້.
ສະເພາະສະຖານທູດ ສປປ ລາວປະຈຳຮົງກາຣີ ໃນປີ 2024 ໄດ້ມີການຈັດເຜີຍແຜ່ຂໍ້ມູນການທ່ອງທ່ຽວ, ວັດທະນະທຳການນຸ່ງຖື, ການສະແດງບົດຟ້ອນຊົນເຜົ່າກ້ຽວສຽງແຄນລາວຈາກທີມນັກສຶກສາລາວ ທີ່ໄດ້ຮັບທຶນການສຶກສາຈາກການຮ່ວມມືສອງຝ່າຍຂອງລັດຖະບານລາວ - ຮົງກາຣີ ກໍຄືສາກົນ, ທັງສະແດງການເປົ່າແຄນລາວຈາກນັກສິນລະປະຄົນ ຮົງກາຣີ ພ້ອມພຽງກັນເຜີຍແຜ່ຮີດຄອງປະເພນີອັນດີງາມ ເປັນເອກະລັກຂອງຊາດຊຶ່ງເຫັນວ່າໄດ້ຮັບຄວາມສົນໃຈແລະຕອບຮັບເປັນຢ່າງດີຈາກຜູ້ເຂົ້າຮ່ວມງານຢ່າງຫຼວງຫຼາຍ.
ຂ່າວ-ພາບ: ກະຊວງການຕ່າງປະເທດ
ຄໍາເຫັນ