ແຂວງເຊກອງ ກໍແມ່ນຄອບຄົວໜຶ່ງ ທີ່ເຮັດທຸລະກິດກ່ຽວກັບການຜະລິດຫັດຖະກໍາຕໍ່າຫູກ (ຕໍ່າສິ້ນຊົນເຜົ່າ) ເຮັດໃຫ້ຊີວິດການເປັນຢູ່ຂອງຄອບຄົວມີຢູ່ ມີກິນ ແລະ ຫຼຸດພົ້ນອອກຈາກຄວາມທຸກຍາກ.
ທ່ານ ນາງ ຊື ແສງດາໄຊ ໄດ້ປະກອບຄໍາເຫັນຕໍ່ກອງປະຊຸມໃຫຍ່ຜູ້ແທນແມ່ຍິງແຂວງເຊກອງ ຄັ້ງທີ VII ເມື່ອບໍ່ດົນຜ່ານມາວ່າ: ພາຍໃນຄອບຄົວມີສະມາຊິກທັງໝົດ 9 ຄົນ ຍິງ 4 ຄົນ, ມີແຮງງານຕົ້ນຕໍ 6 ຄົນ. ໃນເມື່ອກ່ອນຖານະຄອບຄົວຂອງຕົນແມ່ນທຸກຍາກຂາດເຂີນ, ໂດຍອີງໃສ່ທິດຊີ້ນໍາຂອງຄະນະພັກ, ອົງການປົກຄອງແຂວງ-ເມືອງ ກໍຄື ຄະນະບໍລິຫານງານສະຫະພັນແມ່ຍິງແຂວງ, ເມືອງ ແລະ ໜ່ວຍສະຫະພັນແມ່ຍິງບ້ານ ທີ່ໄດ້ປຸກລະດົມຂະບວນການສ້າງເສດຖະກິດຄອບຄົວ ຕາມຄໍາຂວັນທີ່ວ່າ: " ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງ" ໂດຍອີງໃສ່ທ່າແຮງ ແລະ ຄວາມສາມາດຕົວຈິງ ຂອງແຕ່ລະຄອບຄົວ. ສະນັ້ນ, ຕົນເອງປຶກສາຫາລືກັບຄອບຄົວ ເພື່ອຊອກຫາແນວທາງໃນການພັດທະນາຊີວິດການເປັນຢູ່ ຂອງຄອບຄົວ ແລະ ໄດ້ຕັດສິນໃຈຖືເອົາການຜະລິດຫັດຖະກໍາຕໍ່າຫູກ (ຕໍ່າສິ້ນຊົນເຜົ່າ) ແລະ ປູກຝັງເປັນອາຊີບຫຼັກຂອງຄອບຄົວ.
ສໍາລັບການຕໍ່າສິ້ນຊົນເຜົ່າ ໃນເບື້ອງຕົ້ນຄອບຄົວຂອງຕົນມີທຶນພຽງແຕ່ 1 ລ້ານກີບ ແລະ ຂ້າພະເຈົ້າ ກໍໄດ້ນໍາໃຊ້ທຶນດັ່ງກ່າວ ເປັນທຶນໝູນວຽນ, ການຕໍ່າສິ້ນກໍມີຈໍານວນຈໍາກັດ, ການອອກແບບລວດລາຍ ແລະ ອື່ນໆ ຍັງບໍ່ທັນຫຼາກຫຼາຍສີສັນ ແຕ່ສັງຄົມພັດໃຫ້ຄວາມສົນໃຈຫຼາຍ. ເມື່ອເຫັນໄດ້ຄວາມໝາຍສໍາຄັນ. ຄະນະພັກ-ອົງການປົກຄອງແຂວງ-ເມືອງ ໂດຍສະເພາະສະຫະພັນແມ່ຍິງແຂວງ ແລະ ຫ້ອງການສະຫະພັນແມ່ຍິງເມືອງ ໄດ້ໃຫ້ການຊຸກຍູ້ສົ່ງເສີມມອບທຶນໝູນວຽນຈໍານວນໜຶ່ງໃຫ້ ພ້ອມທັງ ແນະນໍາດ້ານເຕັກນິກການຕໍ່າ, ການອອກແບບລວດລາຍ ແລະ ອື່ນໆ ເພື່ອໃຫ້ມີຄຸນນະພາບນໍາໃຊ້ໄດ້ດົນ, ເຮັດໃຫ້ຄອບຄົວຂອງຕົນສາມາດຕໍ່າສິ້ນຊົນເຜົ່າໃນປະລິມານທີ່ເພີ່ມຂຶ້ນ ແລະ ຂາຍເປັນສິນຄ້າ ໂດຍການວາງຂາຍກັບທີ່ພາຍໃນບ້ານໃນລາຄາ 250,000 ກີບຂຶ້ນໄປ, ໃນປີໜຶ່ງຄອບຄົວຂອງຂ້າພະເຈົ້າມີລາຍຮັບຈາກການຂາຍສິ້ນຊົນເຜົ່າ ບວກກັບລາຍຮັບອື່ນໆປະມານ 90 ລ້ານກີບຕໍ່ປີ. ສະນັ້ນ, ຈຶ່ງສາມາດເວົ້າໄດ້ວ່າ: ຈາກອາຊີບຕໍ່າຫູກ (ຕໍ່າສິ້ນຊົນເຜົ່າ) ເຮັດໃຫ້ຄອບຄົວຂອງຂ້າພະເຈົ້າມີຢູ່ມີກິນ ແລະ ຫຼຸດພົ້ນອອກຈາກຄວາມທຸກຍາກ.
(ໂດຍ: ສັນຍາ)
ຄໍາເຫັນ