ສະຫາຍ ນາງ ສົມຫວັງ ຢົງກີວ່າງ ໄດ້ກ່າວວ່າ: ຕົນເອງພ້ອມດ້ວຍຄອບຄົວໄດ້ມີແນວຄິດລິເລີ່ມເຮັດຟາມໝູ ຍ້ອນຄອບຄົວເປັນຜູ້ອອກແບບກໍ່ສ້າງເຮັດຟາມລ້ຽງໝູໃຫ້ບໍລິສັດຊີພີ, ທັງສອງຜົວເມຍຈຶ່ງໄດ້ປຶກສາຫາລື ແລະ ຄິດໄລ່ໄຕ່ຕອງນໍາກັນ, ເຫັນວ່າການລ້ຽງໝູນີ້ເຮົາສາມາດເຮັດໄດ້ໂດຍໃຊ້ເວລາວ່າງວັນເສົາ, ວັນອາທິດ ຫຼື ນອກໂມງການ ໂດຍບໍ່ລົບກວນເວລາເຮັດວຽກທາງລັດຖະການ. ຫຼັງຈາກນັ້ນ, ຈຶ່ງໄດ້ຕັດສິນໃຈເອົາເງິນທີ່ຄອບຄົວໄດ້ທ້ອນໂຮມໄປຊື້ດິນເພື່ອເຮັດຟາມ ແລະ ກໍໄດ້ໄປເຊັນສັນຍາຊື້-ຂາຍໜູນໍາບໍລິສັດຊີພີ, ເລີ່ມແຕ່ປີ 2014 ເປັນຕົ້ນມາ, ໄດ້ກູ້ຢືມຕື່ມຈໍານວນໜຶ່ງມາລົງທຶນສ້າງເລົ້າໝູ ແລະ ສິ່ງອໍານວຍຄວາມສະດວກໃນການລ້ຽງໝູເປັນເງິນຈໍານວນ 650 ລ້ານກີບ, ປີ 2015-2020 ແມ່ນໄລຍະທີ່ພວກເຮົາຫາກໍລິເລີ່ມໃນການດໍາເນີນທຸລະກິດ ທັງເຮັດທັງຖອດຖອນບົດຮຽນໄປພ້ອມໆກັນ ຈຶ່ງສາມາດຊໍາລະເງິນທີ່ກູ້ຢືມມາໄດ້ ແຕ່ລະງວດແມ່ນສາມາດສ້າງລາຍຮັບໄດ້ 10 ລ້ານກ່ວາກີບ, ນັບແຕ່ປີ 2020 ເປັນຕົ້ນມາ ແມ່ນສາມາດຊໍາລະເງິນທີ່ກູ້ຢືມມາທັງໝົດ.
ໄລຍະການລ້ຽງໝູແມ່ນ 4-5 ເດືອນ ຈຶ່ງຂາຍອອກເທື່ອໜຶ່ງ, ການຂາຍແມ່ນຂາຍໃຫ້ແຕ່ບໍລິສັດຊີພີເທົ່ານັ້ນ ຮອດຍາມຂາຍທາງບໍລິສັດມາຮັບເອົາເອງ, ຖ້າຂາຍໃຫ້ທົ່ວໄປແມ່ນເຮົາຕ້ອງຊອກຕະຫຼາດຮອງຮັບ ຈຶ່ງເຮັດໃຫ້ມີຄວາມຫຍຸ້ງຍາກຫຼາຍບັນຫາ. ດັ່ງນັ້ນ, ພວກເຮົາຈຶ່ງຕັດສິນໃຈເຊັນສັນຍາຮ່ວມກັບບໍລິສັດຊີພີ, ທາງເຮົາແມ່ນມີສະຖານທີ່ອໍານວຍຄວາມສະດວກ, ມີແຮງງານລ້ຽງ ແລະ ຊື້ລູກໝູຈາກບໍລິສັດຊີພີ ສ່ວນບໍລິສັດຊີພີແມ່ນຜູ້ຕອບສະໜອງອາຫານ, ຢາວັກຊິນ ແລະ ປິ່ນປົວເບິ່ງແຍງໃນເວລາໝູເຈັບເປັນ.
ນັບແຕ່ມື້ສ້າງຟາມໝູມາຮອດປັດຈຸບັນ, ການລ້ຽງໝູຂອງຂ້າພະເຈົ້າແມ່ນມີເລົ້າດຽວ ເປັນເລົ້າປິດບັນຈຸໄດ້ 650-750 ໂຕ ແຕ່ໝູຂອງຂ້າພະເຈົ້າລ້ຽງແມ່ນມີແຕ່ 650 ໂຕ, ມີລາຍໄດ້ແມ່ນ 130-150 ລ້ານກີບ/ງວດ ລົບຄ່າແຮງງານ, ຄ່າໄຟຟ້າ, ຄ່າສ້ອມແປງເລົ້າ, ແປງທາງ ຫຼື ລົບລາຍຈ່າຍອື່ນໆ ແລ້ວຍັງເຫຼືອກໍາໄລຕົວຈິງ 80-90 ລ້ານກີບ/ງວດ ສະເລ່ຍປີໜຶ່ງມີກໍາໄລຈາກການລ້ຽງໝູໄດ້ 180-240 ລ້ານກີບ ສາມາດປັບປຸງຊີວິດການເປັນຢູ່ຂອງຄອບຄົວດີຂຶ້ນກວ່າເກົ່າ ຊຶ່ງສາມາດປຸກເຮືອນຢູ່, ສົ່ງລູກຮຽນ ແລະ ຊ່ວຍໃຫ້ຄອບຄົວທີ່ມາລ້ຽງໝູນໍາມີອາຊີບເຮັດ ມີເງິນສົ່ງລູກຮຽນຈົນຈົບ.
ນອກຈາກການລ້ຽງໝູແລ້ວ, ຍັງເຮັດອາຊີບເສີມດ້ວຍການຫຍິບປັກທັກແສ່ວ ສ້າງລາຍຮັບເພີ່ມ ໃຊ້ເວລາວ່າງວັນເສົາ, ວັນອາທິດ, ນອກໂມງການ ແລະ ສາມາດຊ່ວຍໃຫ້ຜູ້ຍິງທີ່ບໍ່ມີວຽກເຮັດງານທໍາ ນໍາໄປທັກແສ່ວເພື່ອຫາລາຍໄດ້ເພີ່ມເລັກນ້ອຍໃຫ້ກັບຄອບຄົວ, ນອກຈາກນັ້ນ, ກໍຍັງໄດ້ປູກພຶດສວນຄົວເພື່ອຮັບໃຊ້ໃຫ້ການດໍາລົງຊີວິດແບບພໍພຽງ ຕາມແນວທາງນະໂຍບາຍຂອງພັກ-ລັດ. ເວົ້າລວມ ເວົ້າສະເພາະຕາມການຊີ້ນຳຂອງຄະນະບໍລິຫານງານພັກ ສູນກາງສະຫະພັນກໍາມະບານລາວ ຕາມຄໍາຂວັນທີ່ວ່າ: ດຸໝັ່ນ ປະຢັດ, ຊື່ສັດ, ອົດທົນ ພາທຸກຄົນພົ້ນທຸກ.
ສະຫາຍໄດ້ກ່າວອີກວ່າ: ຄຽງຄູ່ກັບຜົນສໍາເລັດທີ່ຍາດມາໄດ້ນັ້ນ, ແຕ່ກໍຍັງມີຄວາມຫຍຸ້ງຍາກ ແລະ ສິ່ງທ້າທາຍຈໍານວນໜຶ່ງ. ດັ່ງນີ້: ຄ່າໃຊ້ຈ່າຍເພີ່ມຂຶ້ນ, ມີຄວາມສ່ຽງໃນການເກີດພະຍາດ ແລະ ໂຣກລະບາດ;ຊອກຫາແຮງງານຜູ້ທີ່ມີຄວາມຮູ້, ຄວາມສາມາດ ແລະ ເຕັກນິກໃນການລ້ຽງໜູມີໜ້ອຍ. ສຳລັບແຜນໃນຕໍ່ໜ້າ ແມ່ນມີແນວຄິດຈະບໍາບັດເຮັດລະບົບກັ່ນຕອງ ເອົາຂີ້ໝູຕາກແຫ້ງຂາຍເປັນສິນຄ້າ ແລະ ສ້າງເຮັດເປັນອາຍແກັດຊີວະພາບ ເປັນພະລັງງານເພື່ອມານໍາໃຊ້ພາຍໃນຟາມ ທັງເປັນການກໍາຈັດກິ່ນເໝັນ.
ຄໍາເຫັນ