ໃນຕອນເຊົ້າວັນທີ 9 ມັງກອນນີ້ນຳໂດຍສະຫາຍໄຊຊະນະໂຄດພູທອນກໍາມະການສູນກາງພັກ ເລຂາຄະນະບໍລິຫານງານພັກ ຫົວໜ້າອົງການໄອຍະການປະຊາຊົນສູງສຸດ (ອອປສ), ມີບັນດາຄະນະພັກ-ຄະນະນຳ ອອປສ, ອົງການໄອຍະການປະຊາຊົນພາກກາງ-ນະຄອນຫຼວງແລະບັນດາອົງການໄອຍະການປະຊາຊົນ 17 ແຂວງ, ສະຖາບັນຄົ້ນຄວ້າ ແລະຝຶກອົບຮົມໄອຍະການ, ອົງການໄອຍະການທະຫານຂັ້ນສູງແລະ 3 ອົງການຈັດຕັ້ງມະຫາຊົນເຂົ້າຮ່ວມ.
ການວາງກະຕ່າດອກໄມ້ໃນຄັ້ງນີ້, ເປັນການເຄົາລົບ, ລະນຶກເຖິງຄຸນງາມຄວາມດີອັນປະເສີດຂອງປະທານໄກສອນພົມວິຫານຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ, ທັງເປັນແບບຢ່າງທີ່ດີໃຫ້ທົ່ວພັກ, ທົ່ວລັດ, ທົ່ວກຳລັງປະກອບອາວຸດແລະທົ່ວປວງຊົນລາວທັງຊາດ. ທ່ານໄດ້ອຸທິດຊີວິດສຸມທຸກສະຕິປັນຍາແລະຄວາມຮູ້ຄວາມສາມາດຂອງຕົນເຂົ້າໃນພາລະກິດປົດປ່ອຍຊາດກໍຄືພາລະກິດປົກປັກຮັກສາແລະສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ, ມີຄວາມເຂັ້ມແຂງຕະຫຼອດມາ. ທັງເປັນການສະແດງເຖິງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຕໍ່ຜົນງານອັນໃຫຍ່ຫຼວງຂອງປະທານໄກສອນພົມວິຫານທີ່ໄດ້ນຳພາປະຊາຊົນລາວທັງຊາດລຸກຮືຂຶ້ນຕໍ່ສູ້ຕ້ານພວກຈັກກະພັດຕ່າງດ້າວຈົນໄດ້ຮັບໄຊຊະນະແລະນຳເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າຕະຫຼອດໄລຍະທີ່ຜ່ານມາ. ຍາມໃດປະທານກໍອຸທິດຕົນເພື່ອຊາດ, ເພື່ອປະຊາຊົນດ້ວຍນໍ້າໃຈບໍລິສຸດມີນໍ້າໃຈເດັດດ່ຽວກ້າຫານ, ດຸໝັ່ນປະຢັດ, ມີທັດສະນະມະຫາຊົນສະເໝີຕົ້ນສະເໝີປາຍ, ທັງນຳພາດ້ານທິດສະດີ, ນັກວິທະຍາສາດທີ່ມີວິໄສທັດກວ້າງໄກ, ສາມາດຕີລາຄາຊັ່ງຊາສະພາບການທັງພາຍໃນແລະສາກົນໄດ້ຢ່າງແມ່ນຢຳແລະໄດ້ກາຍເປັນຜູ້ນຳທີ່ດີເດັ່ນແລະເປັນວິລະບູລຸດຂອງຊາດລາວທີ່ໄດ້ນຳພາປວງຊົນບັນດາເຜົ່າຍາດໄດ້ໄຊຊະນະແລະສະຖາປະນາສາທາລະນະລັດປະຊາທິປະໄຕປະຊາຊົນລາວ.
ໃນໂອກາດນີ້, ຄະນະພັກ, ຄະນະນໍາອອປສ ໄດ້ໃຫ້ຄຳໝັ້ນສັນຍາຕໍ່ທ່ານປະທານໄກສອນພົມວິຫານວ່າ: ຈະຕັ້ງໜ້າຮໍ່າຮຽນເອົາແບບຢ່າງທີ່ດີແລະເຕັມໄປດ້ວຍຄຸນສົມບັດ, ສິນທໍາປະຕິວັດແລະຜ່ານຜ່າທຸກຄວາມຫຍຸ້ງຍາກໃນການຕໍ່ສູ້ກູ້ຊາດອັນຜ່ອງໃສຂອງປະທານແລະພ້ອມກັນເດີນຕາມແນວທາງນະໂຍບາຍຂອງປະທານຕັ້ງໄວ້ຢ່າງບໍ່ມີວັນປ່ຽນແປງ, ຂໍໃຫ້ຄຸນງາມຄວາມດີຂອງທ່ານຍືນຍົງຢູ່ໃນພາລະກິດປະຕິວັດ ແລະ ຝັງແໜ້ນໃນດວງໃຈຂອງປະຊາຊົນລາວທັງຊາດຕະຫຼອດໄປ, ເວົ້າລວມ, ເວົ້າສະເພາະແມ່ນພະນັກງານອົງການໄອຍະການປະຊາຊົນ.
(ຂ່າວ-ພາບ: ວັນເພັງ)
ຄໍາເຫັນ