ທ່ານ ບຸນມີ ສະຫວັດ ຫົວໜ້າພະແນກກະສິກຳ ແລະ ປ່າໄມ້ແຂວງຫຼວງພະບາງ ໄດ້ໃຫ້ສຳພາດວ່າ: ສຳລັບພິທີປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ, ແຂວງໄດ້ກະກຽມສະຖານທີ່ປູກ ຢູ່ບ້ານຫຼັກສິບ ນະຄອນ ຫຼວງພະບາງ ໃນເນື້ອທີ່ປະມານ 13 ເຮັກຕ່າ, ໂດຍຈະປູເບ້ຍໄມ້ຮັກສາແຫຼ່ງນ້ຳ ເປັນຕົ້ນ ໄມ້ສົ້ມຝາດ, ໄມ້ແຕ້ຂ່າ, ໄມ້ຕີ້ວ ແລະ ໄມ້ອື່ນໆ. ປັດຈຸບັນກໍາລັງກະກຽມຄວາມພ້ອມແຕ່ລະດ້ານ ໃນການຈັດພິທີຄາດວ່າ ຈະຈັດພິທີຕົວຈິງໃນວັນທີ 1 ມິຖຸນາ 2025. ສ່ວນບັນດາເມືອງທີ່ມີເງື່ອນໄຂ ອາດຈະຈັດກ່ອນ ຫຼື ຫຼັງວັນທີ່ 1 ເພື່ອໃຫ້ຄົບຕາມເນື້ອທີ່ ທີ່ໄດ້ກໍານົດ 200 ກວ່າເຮັກຕ່າ. ນອກນັ້ນ, ຈະມີບັນດາບໍລິສັດ ແລະ ໂຄງການສົ່ງເສີມການປູກຕົ້ນໄມ້ຢູ່ບັນດາເມືອງ ລວມທັງປະຊາຊົນບັນດາເຜົ່າ ຈະຈັດພິທີປູກຕົ້ນໄມ້ ຢູ່ພື້ນທີ່ຂອງຕົນຈົນກວ່າຈະສີ້ນສຸດລະດູຝົນ ຕື່ມອີກ. ທ່ານຫົວໜ້າພະແນກກະສິກຳ ແລະ ປ່າໄມ້ແຂວງ ໃຫ້ຮູ້ຕື່ມວ່າ: ນອກຈາກການກະກຽມຂະບວນການປູກຕົ້ນໄມ້ ໃນໄລຍະຜ່ານມາ, ຄະນະນຳພະແນກກະສິກຳ ແລະ ປ່າໄມ້ແຂວງ ຍັງໄດ້ຊີ້ນຳໃຫ້ທຸກພາກສ່ວນ ທີ່ດຳເນີນການປູກຕົ້ນໄມ້ໃນຫຼາຍປີຜ່ານມາ, ພ້ອມກັນປົກປັກຮັກສາ ແລະ ບົວລະບັດຕົ້ນໄມ້ທີ່ປູກໄປແລ້ວ ໃຫ້ມີການຈະເລີນເຕີບໂຕ ແລະກວດກາຄືນ ບັນດາຕົ້ນໄມ້ທີ່ຕາຍ ແລະ ເສຍຫາຍ ເພື່ອຈັດຕັ້ງການປູກທົດແທນຄືນ, ເມື່ອຕົ້ນໄມ້ຄົບອາຍຸ 3 ປີ ແມ່ນໃຫ້ຂຶ້ນທະບຽນຕົ້ນໄມ້ ສົ່ງໃຫ້ພະແນກກະສິກໍາ ແລະ ປ່າໄມ້ແຂວງ ເປັນຜູ້ຄຸ້ມຄອງຕາມລະບຽບການ.
ເພື່ອກະກຽມ ແລະ ສ້າງຂະບວນການໃຫ້ແກ່ ວັນປູກຕົ້ນໄມ້ແຫ່ງຊາດ ວັນທີ່ 1 ເດືອນ ມິຖຸນາປີນີ້ ໃຫ້ຝົດຝື້ນກວ້າງຂວາງ ແລະ ເລິກເຊີ່ງ, ທ່ານ ບຸນມີ ສະຫວັດ ຍັງໄດ້ຮຽກຮ້ອງໃຫ້ທຸກພາກສ່ວນ ນັບທັງພາກລັດ, ພາກທຸລະກິດ-ເອກະຊົນ ແລະ ປະຊາຊົນບັນດາເຜົ່າ ປະກອບສ່ວນ ແລະ ເຂົ້າຮ່ວມຂະບວນການປູກຕົ້ນໄມ້ ທີ່ຈະຈັດຂຶ້ນຢູ່ທຸກທ້ອງຖີ່ນ ເພື່ອເຮັດໃຫ້ອັດຕາສ່ວນການປົກຫຸ້ມຂອງປ່າໄມ້ ບັນລຸຕາມແຜນການທີ່ລັດຖະບານ ກໍຄືອົງການປົກຄອງທ້ອງຖີ່ນວາງອອກ.
(ຂ່າວ: ອາພຸດເດດ ບຸບຜາ)
ຄໍາເຫັນ