ສະຫາຍໄດ້ລາຍງານວ່າ: ພາຍໃຕ້ການນໍາພາ-ບັນຊາຂອງຄະນະພັກທຸກຂັ້ນ ໄດ້ກໍາແໜ້ນ 2 ໜ້າທີ່ຍຸດທະສາດ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ຜັນຂະຫຍາຍ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດ ແລະ 4 ແຜນງານ 41 ໂຄງການຂອງກະຊວງປ້ອງກັນຄວາມສະຫງົບວາງອອກ ຕິດພັນກັບການຈັດຕັ້ງຜັນຂະຫຍາຍມະຕິ 111 ແລະ ມະຕິ 02 ຂອງກົມການເມືອງສູນການພັກ ລົງສູ່ກົມກອງ, ຮາກຖານ ເຮັດໃຫ້ຕາໜ່າງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ມີຄວາມເຂັ້ມແຂງ, ແກ້ໄຂ 4 ເຖື່ອນ, 9 ຫົວຂໍ້ສໍາມະນາວິທະຍາສາດ; ສາມາດຍາດໄດ້ຜົນງານຫຼາຍດ້ານທີ່ພົ້ນເດັ່ນ ດັ່ງນີ້: ຫັນກໍາລັງລົງກໍ່ສ້າງຮາກຖານຕາມສາຍຕັ້ງ, ສາຍຂວາງ ໂດຍຢຶດໝັ້ນ ແລະ ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ເພື່ອເຮັດໃຫ້ແຂວງມີຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ, ຕິດພັນກັບວຽກ 3 ສ້າງ ໂດຍສ້າງຄອບຄົວ ແລະ ບ້ານປອດຢາເສບຕິດ, ການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ; ຫັນເອົາກໍາລັງປ້ອງກັນຄວາມສະຫງົບຂອງກະຊວງ,ແຂວງ, ເມືອງ, ລົງກໍ່ສ້າງຮາກຖານຢູ່ເມືອງປາກກະດິງ ແລະ ເມືອງວຽງທອງ, ປະກາດສ້າງບ້ານປ້ອງກັນຊາດເຂັ້ມແຂງໄດ້ 284 ບ້ານ, ປະກາດຮັບຮອງເປັນຄອບຄົວປ້ອງກັນຊາດ ເຂັ້ມແຂງ 54,150 ຄອບຄົວ, ສ້າງກຸ່ມບ້ານສູ້ຮົບຕິດລຽນໄດ້ 2 ກຸ່ມບ້ານ, ສ້າງບ້ານປ້ອມໝັ້ນສູ້ຮົບໄດ້ 10 ບ້ານ, ປະກາດສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຈໍານວນ 284 ບ້ານ, ໄດ້ຮັບໃບຢັ້ງຢືນບ້ານປ້ອງກັນຄວາມສະຫງົບດີ 284 ບ້ານ.
ຜ່ານການຈັດຕັ້ງປະຕິບັດ ແຜນຜັນຂະຫຍາຍວາລະແຫ່ງຊາດ ກ່ຽວກັບການສະກັດກັ້ນ ແລະ ແກ້ໄຂບັນຫາຢາເສບຕິດຢູ່ ແຂວງບໍລິຄໍາໄຊ ໃນໄລຍະທີ 2021- 2023 ແລະ ໄລຍະສືບຕໍ່ 2024-2025 ສາມາດສະຫຼຸບໄດ້ດັ່ງລຸ່ມນີ້: ບັນຫາຢາເສບຕິດ ຍັງແມ່ນປະກົດການຫຍໍ້ທໍ້ໜຶ່ງ ທີ່ຕິດພັນກັບສັງຄົມ ແລະ ເຊື່ອມໂຍງກັບ ອາຊະຍາກໍາຂ້າມຊາດ ຊຶ່ງມີຄວາມອັນຕະລາຍຮ້າຍແຮງ, ເປັນໄພຂົມຂູ່ຕໍການພັດທະນາເສດຖະກິດ, ການເມືອງ ແລະ ຄວາມໝັ້ນຄົງປອດໄພໃນສັງຄົມ ແລະ ຍັງມີລັກສະນະເກີດຂຶ້ນຢ່າງຕໍ່ເນື່ອງ-ຮຸ່ນແຮງ, ກຸ່ມແກ້ງ, ມີເຄືອຄ່າຍເຊື່ອມໂຍງກັບພາຍໃນ ແລະ ຕ່າງປະເທດ, ນໍາໃຊ້ອາວຸດເສິກ, ພາຫະນະ, ອຸປະກອນເຄື່ອງມືທີ່ທັນສະໄໝ ສາມາດຕອບໂຕ້ກັບເຈົ້າໜ້າທີ່.
ເພື່ອສືບຕໍ່ນໍາພາ-ຊີ້ນຳກໍາລັງປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມໜັກແໜ້ນ, ເຂັ້ມແຂງ ພວກເຮົາຕ້ອງໄດ້ຕັ້ງໜ້າຜັນຂະຫຍາຍມະຕິ 111, ມະຕິ 02 ຂອງກົມການເມືອງສູນການພັກ ແລະ ເຮັດໃຫ້ມະຕິກອງປະຊຸມໃຫຍ່ຄັ້ງນີ້ໄດ້ຮັບຜົນເປັນຈິງ, ພວກເຮົາຈະສຸມໃສ່ບາງວຽກຕົ້ນຕໍດັ່ງນີ້: ສືບຕໍ່ຫັນເອົາແນວທາງປ້ອງກັນຊາດ-ປ້ອງກັນຄວາມສະຫງົບຂອງພັກ ໃຫ້ເປັນຂອງທົ່ວປວງຊົນຮອບດ້ານ ໂດຍເລີ່ມຈາກຄະນະພັກ, ອົງການປົກຄອງ ແລະ ປະຊາຊົນບັນດາເຜົ່າຢ່າງເປັນເຈົ້າການ, ເພີ່ມທະວີລະບອບປະຈຳການກຽມພ້ອມສູ້ຮົບ, ຫັນເອົາພະນັກງານນັກຮົບ ລົງກໍ່ສ້າງຮາກຖານການເມືອງຕິດພັນວຽກງານ 3 ສ້າງ ແກ້ໄຂໜໍ່ແໜງຄວາມບໍ່ສະຫງົບ, ສືບຕໍ່ປະຕິບັດຍຸດທະສາດສືບຂ່າວຕາມຊາຍແດນ, ເກັບກຳການເຄື່ອນໄຫວຂອງອິດທິກຳລັງປໍລະປັກ ແລະ ກຸ່ມຄົນບໍ່ດີແຕ່ໄກຫາໃກ້ໃຫ້ມີຄຸນນະພາບ, ມີຄວາມແນ່ນອນຊັດເຈນ, ທັນເວລາ ເພື່ອຕອບສະໜອງໃຫ້ແກ່ແຜນການສະກັດກັ້ນ, ຕ້ານ ແລະ ແກ້ໄຂໄດ້ທັນເວລາ, ເພີ່ມທະວີວຽກງານປ້ອງກັນພາຍໃນ, ປ້ອງກັນຕົວ, ຊອກຮູ້ພວກສັດຕູ-ກຸ່ມຄົນບໍ່ດີທີ່ແອບແຝງ ຢູ່ໃນການຈັດຕັ້ງພັກ-ລັດ ແລະ ກຳລັງ; ເອົາໃຈໃສ່ກວດກາຄົນ ເຂົ້າ-ອອກເມືອງ ແລະ ຄຸ້ມຄອງຄົນຕ່າງປະເທດຢ່າງເຂັ້ມງວດ; ເກັບກຳສະຖິຕິ, ຂຶ້ນບັນຊີ, ຄຸ້ມຄອງຄົນຕ່າງດ້າວ ແລະ ຄົນຕ່າງປະເທດ ທີ່ມາເຄື່ອນໄຫວໃຫ້ຖືກຕ້ອງຕາມກົດໝາຍ, ສືບຕໍ່ຈັດຕັ້ງຜັນຂະຫຍາຍມະຕິ 111 ແລະ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດ ແລະ 4 ແຜນງານໃຫຍ່ 41 ໂຄງການ ຂອງກະຊວງປ້ອງກັນຄວາມສະຫງົບ, ການແກ້ໄຂ 4 ເຖື່ອນ, 9 ຫົວຂໍ້ວິທະຍາສາດ ແລະ ວາລະແຫ່ງຊາດ ໃຫ້ເປັນຮູບປະທຳເພື່ອເຮັດໃຫ້ບັນດາປະກົດການຫຍໍ້ທໍ້ໃນສັງຄົມຫຼຸດລົງເທື່ອລະກ້າວ, ສືບຕໍ່ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍປະສານສົມທົບກັບທຸກພາກສ່ວນ ໂຄສະນາສຶກສາອົບຮົມອະທິບາຍຜົນຮ້າຍຂອງສິ່ງເສບຕິດໃຫ້ນັກຮຽນ, ໄວໜຸ່ມ ປະຊາຊົນໄດ້ຮັບຮູ້ ແລະ ເຂົ້າໃຈ; ລົງຕິດຕາມ ແລະ ຂຶ້ນບັນຊີແບ່ງປະເພດເປົ້າໝາຍທີ່ພົວພັນ ແລະ ຄ້າຂາຍສິ່ງເສບຕິດ ພ້ອມທັງແກ້ໄຂ, ເລີກຮື້ບັນດາເປົ້າໝາຍໃຫ້ຫຼຸດລົງ, ສືບຕໍ່ເອົາກໍາລັງລົງກໍ່ສ້າງຮາກຖານການເມືອງໃນແຕ່ລະໄລຍະໃຫ້ແຂງແຮງ, ປັບປຸງກອງຫຼອນ, ປກສ ບ້ານໃຫ້ມີຄວາມເຂັ້ມແຂງ, ສາມາດຮັບປະກັນຄວາມສະຫງົບຢູ່ຂັ້ນບ້ານໃຫ້ດີຂຶ້ນ, ແກ້ໄຂຫາງສຽງວິພາກວິຈານຂອງປະຊາຊົນຕໍ່ກໍາລັງໃຫ້ໝົດໄປ ແລະ ສົມທົບກັບອໍານາດການປົກຄອງບ້ານ ກວດກາ, ຄຸ້ມຄອງພົນລະເມືອງ, ສ້າງບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີໃຫ້ໄດ້ຫຼາຍກວ່າເກົ່າ, ກວດກາ ແລະ ແກ້ໄຂການຍົກຍ້າຍຖິ່ນຖານພູມລໍາເນົາຊະຊາຍ ຢູ່ພາຍໃນແຂວງ, ປັບປຸງວຽກງານສຳມະໂນຄົວ, ອອກປຶ້ມສຳມະໂນຄົວ ແລະ ບັດປະຈຳຕົວ ແບບທັນສະ ໃໝ່ຕາມລະບຽບຫຼັກການຢ່າງເຂັ້ມງວດ.
ຄໍາເຫັນ