ວົງເງິນສົ່ງອອກນ້ຳມັນດິບຂອງ ອີຣານ ບັນລຸ 35 ຕື້ໂດລາ

ຂ່າວສານຫວຽດນາມລາຍງານວ່າ: ໃນວັນທີ 2 ເມສາ ຜ່ານມານີ້, ທ່ານ ໂມຮາມັດ ຣີຊວານີຟຣາ ຫົວໜ້າຫ້ອງການພາສີ ອີຣານ ໃຫ້ຮູ້ວ່າ: ວົງເງິນສົ່ງອອກນ້ຳມັນດິບຂອງປະເທດບັນລຸ 35 ຕື້ໂດລາ ໃນ 12 ເດືອນ (ໄລ່ຮອດທ້າຍເດືອນມີນາຜ່ານມາ).
ຂ່າວລະບຸວ່າ: ເມື່ອເດືອນຜ່ານມາ, ກະຊວງນ້ຳມັນເຊື້ອໄຟ ແລະ ວິສາຫະກິດ ອີຣານ ໄດ້ລົງນາມໃນຂໍ້ຕົກລົງທີ່ມີມູນຄ່າ 13 ຕື້ໂດລາ ກັບບັນດາບໍລິສັດພາຍໃນປະເທດ ເພື່ອເພີ່ມປະລິມານການຜະລິດນ້ຳມັນ 350.000 ບາເຣນ/ວັນ. ນີ້ແມ່ນ ສັນຍານ້ຳມັນໃຫຍ່ທີ່ສຸດຂອງອີຣານໃນທົດສະວັດທີ່ຜ່ານມາ.
ຕາມສະຖິຕິຂອງອົງການບໍລິຫານຂໍ້ມູນຂ່າວສານພະລັງງານຂອງອາເມຣິກາ (EIA) ໃຫ້ຮູ້ວ່າ: ອີຣານ ແມ່ນປະເທດຜະລິດນ້ຳມັນດິບໃຫຍ່ອັນດັບ 7 ໃນໂລກໃນປີ 2022. ອີຣານ ຍັງມີຄັງສໍາຮອງນໍ້າມັນທີ່ໃຫຍ່ທີ່ສຸດເປັນອັນດັບ 3 ຂອງໂລກ, ຖັດຈາກເວເນຊູເອລາ ແລະ ຊາອຸດິດ ອາຣາບີ.
ທ່ານ ໂມຮາມັດ ຣີຊວານີຟຣາ ຍັງໃຫ້ຮູ້ວ່າ: ວົງເງິນການຄ້າທົ່ວປະເທດໃນ 12 ເດືອນໄລ່ຮອດທ້າຍເດືອນ 3 ຜ່ານມາເພີ່ມຂຶ້ນ 2,6%, ໃນນັ້ນມູນຄ່າການສົ່ງອອກບັນລຸ 86,8 ຕື້ໂດລາ.