 |
ທ່ານ ບົວໄລ ພານຸວົງ ກ່າວວ່າ: ການກຳເນີດເກີດຂຶ້ນ ແລະ ພັດທະນາມາເປັນເວລາ 65 ປີຂອງ ວສລ ໄດ້ມີບາດກ້າວພັດທະນາຢ່າງຕັ້ງໜ້າ. ນັບແຕ່ມື້ກຳເນີດເກີດຂຶ້ນມາເຖິງປັດຈຸບັນ ວສລ ເປັນອາວຸດອັນແຫຼມຄົມຂອງພັກເພື່ອໂຄສະນາປຸກລະດົມຈິດໃຈຮັກຊາດປະກອບສ່ວນໃນພາລະກິດປົດປ່ອຍປະເທດຊາດຢ່າງສະຫງ່າງາມ ແລະ ສືບຕໍ່ຜັນຂະຫຍາຍມູນເຊື້ອອັນດີງາມຂອງຕົນເຂົ້າໃນພາລະກິດລວມແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ; ວສລ ເປັນພາຫານະສື່ມວນຊົນທີ່ກະຈາຍຄື້ນໄປໄດ້ກວ້າງໄກເຖິງເຂດຫ່າງໄກສອກຫຼີກ ແລະ ໄປເຖິງຫຼາຍປະເທດໃນໂລກ, ທັງເປັນເວທີສະແດງຄວາມຄິດເຫັນຂອງມະຫາຊົນໄດ້ກາຍເປັນສາຍໃຍຜູກພັນລະຫວ່າງພັກ-ລັດກັບປະຊາຊົນ. ໃນສະພາບທີ່ມີການປ່ຽນແປງທາງດ້ານເຕັກໂນໂລຊີ ແລະ ສື່ອອນລາຍມາແຮງເຮັດໃຫ້ພຶດຕິກຳຄວາມນິຍົມຕິດຕາມຂໍ້ມູນຂ່າວສານຂອງຜູ້ບໍລິໂພກສື່ປ່ຽນໄປ. ສະນັ້ນ, ພວກເຮົາມີຄວາມຈຳເປັນຕ້ອງໄດ້ຄົ້ນຄວ້າຢ່າງພາວະວິໃສໃນການພັດທະນາວຽກງານວິທະຍຸໃນຕໍ່ໜ້າ, ຄວນຈະປັບປຸງດ້ານເຕັກນິກຄືແນວໃດ, ຮູບແບບການຜະລິດລາຍການ, ການຜະລິດຂ່າວ ແລະ ລາຍງານຂ່າວຈະດຳເນີນຄືແນວໃດນັ້ນເປັນບັນຫາທີ່ຈະຕ້ອງໄດ້ຄົ້ນຄວ້າພິຈາລະນາຮ່ວມກັນຕໍ່ໜ້າ.
ທ່ານ ບົວໄລ ພານຸວົງ ກ່າວຕື່ມອີກວ່າ: ການຈັດງານຄັ້ງນີ້ເພື່ອຮັບຟັງການປະກອບຄຳຄິດເຫັນຂອງບັນດາວິທະຍຸທັງສູນກາງ ແລະ ທ້ອງຖິ່ນເພື່ອນຳໄປຄົ້ນຄວ້າພິຈາລະນາ ແລະ ກຳນົດເປັນທິດທາງ, ວິທີການພັດທະນາວຽກງານວິທະຍຸໃນຕໍ່ໜ້າໃນຍຸກດີຈີຕອນໃຫ້ມີຄວາມເຂັ້ມແຂງ ຕອບສະໜອງໄດ້ຕາມຄວາມຮຽກຮ້ອງຕ້ອງການໃນໄລຍະໃໝ່.
ຂ່າວ: ວສລ
ຄໍາເຫັນ