ວທ ເປີດຊຸດອົບຮົມວຽກງານກວດກາ

ທ່ານ ນາງ ສວນສະຫັວນ ວິຍະເກດ ໄດ້ກ່າວວ່າ: ວຽກງານຕິດຕາມ, ກວດກາແມ່ນວຽກງານໜຶ່ງທີ່ຕິດພັນກັບທຸກຂົງເຂດວຽກງານ, ເປັນວຽກທີ່ຄະນະພັກຮັບຜິດຊອບໂດຍກົງ, ຕ້ອງເຮັດເປັນປົກກະຕິຕໍ່ເນື່ອງ ແລະ ຂາດບໍ່ໄດ້ສໍາລັບການນຳພາຂອງພັກ ແລະ ການຄຸ້ມຄອງລັດ; ການກວດກາ ແມ່ນໜຶ່ງໃນບັນດາປັດໄຈສຳຄັນຕັດສິນຜົນໄດ້ຜົນເສຍຂອງການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍຂອງລັດ ແລະ ເປັນເຄື່ອງມືທີ່ສຳຄັນອັນໜຶ່ງ ເພື່ອແກ້ໄຂບັນຫາຕ່າງໆໃຫ້ໂລ່ງລ່ຽນ ໃນການພົວພັນຢູ່ພາຍໃນພັກ, ອົງການຈັດຕັ້ງລັດ; ພັກເຮົາຍາມໃດກໍຢືນຢັນວ່າ: ວຽກງານກວດກາແມ່ນໜຶ່ງໃນພາລະບົດບາດ ແລະ ແບບແຜນການນຳພາທີ່ສຳຄັນຂອງພັກ “ ບໍ່ມີການກວດກາ ກໍໝາຍຄວາມວ່າບໍ່ມີການນຳພາ” ແລະ ຍ້ອນເຫັນໄດ້ຄວາມສຳຄັນ ຂອງວຽກງານກວດກາ ຄະນະບໍລິຫານງານພັກກະຊວງຈຶ່ງໄດ້ເອົາໃຈໃສ່ຕໍ່ວຽກງານກວດກາ, ໂດຍໄລຍະທີ່ຜ່ານມາບັນດາຜູ້ຮັບຜິດຊອບວຽກງານກວດກາແຕ່ລະຂັ້ນ ໄດ້ຕັ້ງໜ້າຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ, ເພື່ອເປັນເສນາທິການໃຫ້ແກ່ຄະນະພັກ ໃນການກວດກາພັກ-ກວດກາລັດ, ຕ້ານການສໍ້ລາດບັງຫຼວງ ປະກອບສ່ວນເຂົ້າໃນວຽກງານການປົກປ້ອງພັກ-ພະນັກງານການປະຕິບັດກົດລະບຽບຂອງພັກ, ກົດໝາຍຂອງລັດ ຕິດຕາມ, ກວດກາ ສະກັດກັ້ນ ແລະ ດໍາເນີນການຕໍ່ຜູ້ລະເມີດ, ເປັນເຈົ້າການໃນການຄຸ້ມຄອງບໍລິຫານລັດໃຫ້ມີຄວາມໂປ່ງໃສ.

ທ່ານ ນາງ ສວນສະຫັວນ ວິຍະເກດ ໄດ້ກ່າວຕື່ມວ່າ: ຈຸດປະສົງຂອງການຝຶກອົບຮົມ ໃນຄັ້ງນີ້ ກໍເພື່ອໃຫ້ຮັບຮູ້ໜ້າທີ່, ສິດພື້ນຖານຂອງຕົນ ແລະ ເພື່ອສ້າງຄວາມເຂັ້ມແຂງທາງດ້ານຄວາມຮູ້ກ່ຽວກັບ ຫຼັການ, ຮູບການ, ເນື້ອໃນ, ບາດກ້າວດຳເນີນການກວດກາ, ສາມາດເຄື່ອນໄຫວວຽກງານກວດກາໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ. ດັ່ງນັ້ນ, ຮຽກຮ້ອງໃຫ້ຜູ້ເຂົ້າຮ່ວມເອົາໃຈໃສ່ຄົ້ນຄວ້າຮໍ່າຮຽນ, ຕັ້ງຄໍາຖາມແລກປ່ຽນ ໃນບັນຫາທີ່ເຫັນວ່າຍັງບໍ່ແຈ້ງ ຍົກບັນຫາ ແລະ ພຶດຕິກຳຕົວຈິງທີ່ເກີດຂຶ້ນໃນບ່ອນເຮັດວຽກແຕ່ລະບ່ອນຂຶ້ນມາສົນທະນາໃນເວລາຄົ້ນຄວ້າ, ເພື່ອສ້າງຄວາມເຂົ້າໃຈໃຫ້ເລິກເຊິ່ງກ່ຽວກັບທິດສະດີ, ຫຼັກການ ແລະ ຂັ້ນຕອນຂອງການກວດກາໃຫ້ແໜ້ນ, ຄົ້ນຄວ້າວິທີການຈັດຕັ້ງປະຕິບັດການກວດກາທີ່ສອດຄ່ອງກັບສະພາບຕົວຈິງເພື່ອແກ້ໄຂບັນຫາທີ່ເປັນຈຸດຄົງຄ້າງຜ່ານມາການກວດກາຊັກຊ້າແກ່ຍາວ, ກວດກາຫຼາຍຄັ້ງ, ມາດຕະການຕ່າງໆ ຫຼັງຈາກກວດກາແລ້ວ ກໍຈັດຕັ້ງປະຕິບັດຍາກ ແລະ ອື່ນໆ.

ຂ່າວ-ພາບ: ບຸນອູ້ມ