ຕະຫຼອດໄລຍະ 5 ປີຜ່ານມາ ພາຍໃຕ້ການນໍາພາ-ຊີ້ນໍາຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ແຂວງໄຊຍະບູລີ ໄດ້ສຸມໃສ່ຜັນຂະຫຍາຍແນວທາງປ້ອງກັນຊາດ(ປກຊ)-ປ້ອງກັນຄວາມສະຫງົບ (ປກສ) ທົ່ວປວງຊົນຮອບດ້ານ ທີ່ກຳນົດອອກໃນມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ຄະນະກຳມະການ ປກຊ-ປກສ ແຂວງ ໄດ້ເປັນເຈົ້າການສົມທົບກັບກະຊວງທີ່ກ່ຽວຂ້ອງ ຜັນຂະຫຍາຍແນວທາງການຕ່າງປະເທດເຂົ້າສູ່ສະພາບຄວາມເປັນຈິງ.
ທ່ານ ເພັງນິລັນ ຄຳພັນເພັງ ເລຂາຄະນະບໍລິຫານງານພັກແຂວງໄຊຍະບູລີ ປະກອບຄໍາເຫັນກ່ຽວກັບ“ບົດຮຽນການຮັກສາຄວາມສະຫງົບຕາມຊາຍແດນຢູ່ແຂວງໄຊຍະບູລີ” ຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ໃນວັນທີ 6 ມັງກອນຜ່ານມາວ່າ: ພວກເຮົາໄດ້ຖືສໍາຄັນກົນໄກປະສານງານຂອງຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນ ລາວ-ໄທ ໂດຍຜັດປ່ຽນກັນເປັນເຈົ້າພາບເພື່ອສ້າງຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ ຊຸກຍູ້ກົນໄກປະສານງານລະຫວ່າງເມືອງກັບເມືອງຢ່າງໜ້ອຍປີລະຄັ້ງ ເພື່ອທົບທວນການຈັດຕັ້ງປະຕິບັດບົດບັນທຶກຮ່ວມກັນຢ່າງເປັນປົກກະຕິ, ເອົາໃຈໃສ່ປົກປັກຮັກສາຫຼັກໝາຍຊາຍແດນ ຕ້ານ ແລະ ສະກັດກັ້ນການຄ້າ-ຂາຍຢາເສບຕິດ, ການຄ້າມະນຸດ ແລະ ການຄຸ້ມຄອງແຮງງານ, ທັງສອງຝ່າຍໄດ້ຮ່ວມກັນແກ້ໄຂບັນຫາຕ່າງໆ ໂດຍປະສານສົມທົບກັບກຳລັງທະຫານຊາຍແດນລົງຕິດຕາມ, ກວດກາການທໍາການຜະລິດຂອງປະຊາຊົນທັງສອງຝ່າຍຢູ່ລຽບຕາມຊາຍແດນ, ພ້ອມກັນປົກປັກຮັກສາ ແລະ ອະ ນາໄມຫຼັກໝາຍຊາຍແດນ ອໍານວຍຄວາມສະດວກໃນການບໍລິການເຂົ້າ-ອອກດ່ານ ເຮັດໃຫ້ການພົວພັນ, ການແລກປ່ຽນສິນຄ້າ ແລະ ການພົວພັນປະສານງານດ້ານຕ່າງໆ ມີບັນຍາກາດດີຂຶ້ນ, ຫັນເອົາກໍາລັງລົງກໍ່ສ້າງຮາກຖານ, ສຶກສາອົບຮົມປະຊາຊົນຕາມເຂດຊາຍແດນໃຫ້ເຂົ້າໃຈຕໍ່ແນວທາງ ປກຊ-ປກສ, ລະດົມບໍ່ໃຫ້ທຳການຜະລິດລ່ວງລໍ້າເຂດແດນ ແລະ ນໍາພາສ້າງເສດຖະກິດແບບກຸ້ມຕົນເອງ, ເພິ່ງຕົນເອງ, ໄດ້ສ້າງຄວາມເຂັ້ມແຂງໃຫ້ກໍາລັງທະຫານຊາຍແດນ ແລະ ກອງຫຼອນບ້ານໃນການລາດຕະເວນກວດກາ ຈັດວາງປ້ອມຈັ້ງທ່າ ແລະ ສ້າງແຜນການປ້ອງກັນບໍລິເວນແຂວງ-ເມືອງ, ສ້າງບ້ານປ້ອມໝັ້ນສູ້ຮົບເອກະລາດໄດ້ 97 ບ້ານ, ສ້າງກຸ່ມບ້ານສູ້ຮົບຕິດລຽນໄດ້ 73 ກຸ່ມ. ມາຮອດປັດຈຸບັນ ສາມາດສ້າງບ້ານປ້ອງກັນຊາດເຂັ້ມແຂງໄດ້ 427 ບ້ານ (ເພີ່ມຂຶ້ນ 19 ບ້ານ) ສ້າງບ້ານປ້ອງກັນຄວາມສະຫງົບດີໄດ້ 425 ບ້ານ (ເພີ່ມຂຶ້ນ 6 ບ້ານ). ຜົນງານພົ້ນເດັ່ນແມ່ນການພັດທະນາພື້ນຖານໂຄງລ່າງເຊັ່ນ: ເສັ້ນທາງອອກສູ່ຊາຍແດນ, ກໍ່ສ້າງຕ້ານເຈື່ອນ ແລະ ຍົກລະດັບດ່ານສາກົນ ເຮັດໃຫ້ການຄ້າ-ການບໍລິການຂະຫຍາຍຕົວດີຂຶ້ນ. ພ້ອມກັນນັ້ນ, ໄດ້ເອົາໃຈໃສ່ຕິດຕາມ ກວດກາ ແລະ ແກ້ໄຂການຄ້າຂາຍເຖື່ອນ ແລະ ຢາເສບຕິດ. ຢຶດຂອງກາງລົດໃຫຍ່ 36 ຄັນ, ຢາບ້າ 27 ລ້ານ 56 ພັນກວ່າເມັດ, ຢາໄອ 1,774 ກິໂລກຣາມ, ກັນຊາ 9 ແທ່ງ, ລົດຈັກ 283 ຄັນ, ລົດຊິ້ງ, ຈັກສະຕິນ ແລະ ອຸປະກອນສື່ສານຈໍານວນໜຶ່ງ. ແຕ່ເຖິງຢ່າງໃດກໍຕາມ ພວກເຮົາຍັງມີຂໍ້ຫຍຸ້ງຍາກ, ສິ່ງທ້າທາຍບໍ່ໜ້ອຍ ກໍຄືບາງບັນຫາທີ່ຄວນເອົາໃຈໃສ່ ສໍາລັບການຮັກສາຄວາມສະຫງົບຮຽບຮ້ອຍຕາມຊາຍແດນ ເນື່ອງຈາກພື້ນທີ່ສ່ວນໃຫຍ່ເປັນເຂດພູດອຍ ດິນຕໍ່ແຜ່ນ ເສັ້ນທາງຍັງເຂົ້າບໍ່ທັນເຖິງ ພາໃຫ້ຫຍຸ້ງຍາກໃນການກວດກາ, ການເຄື່ອນໄຫວຂອງພວກກໍາລັງປໍລະປັກ ແລະ ພວກຄົນບໍ່ດີໄດ້ສວຍໂອກາດລັກລອບເຄື່ອນໄຫວຜິດກົດໝາຍ, ໂຄສະນາບິດເບືອນ, ນໍາໃຊ້ກໍາລັງປະສິດຊາຍແດນ, ເຄື່ອນໄຫວກິດຈະການຕ່າງໆ ຕາມເສັ້ນຊາຍແດນແບບບໍ່ຖືກຕ້ອງ, ນໍາໃຊ້ຍົນ, ນໍາໃຊ້ໂດຣນ ບິນລ່ວງລໍ້ານ່ານຟ້າເຂົ້າເລິກມາໃນດິນແດນລາວຫຼາຍຄັ້ງ, ຂຸດຄົ້ນເຄື່ອງປ່າຂອງດົງ ລ່າສັດເລິກເຂົ້າມາດິນລາວ ແລະ ຫາທຸກວິທີສ້າງສະຖານະການຕ່າງໆ ລຽບຕາມຊາຍແດນເພື່ອຫວັງຈະເຊື່ອມຢຶດດິນແດນຢູ່ບາງຈຸດ.
ທ່ານ ເພັງນິລັນ ຄຳພັນເພັງ ກ່າວຕື່ມວ່າ: ເພື່ອສືບຕໍ່ຮັກສາຄວາມສະຫງົບຕາມຊາຍແດນໃຫ້ໝັ້ນຄົງ ແຂວງໄຊຍະບູລີ ຈະສຸມໃສ່ບາງວຽກງານຈຸດສຸມຄື: ສືບຕໍ່ຜັນຂະຫຍາຍແນວທາງ ປກຊ-ປກສ ແລະ ການຕ່າງປະເທດຂອງພັກເຂົ້າສູ່ຊີວິດຕົວຈິງ, ຈັດຕັ້ງປະຕິບັດບົດບັນທຶກຊ່ວຍຈຳລະຫວ່າງແຂວງ ແລະ ແຂວງໃຫ້ປະກົດຜົນເປັນຈິງ ແນໃສ່ຮັບປະກັນສະຖຽນລະພາບການເມືອງ, ສັງຄົມມີຄວາມສະຫງົບຢ່າງໜັກແໜ້ນ; ສືບຕໍ່ຫັນລົງກໍ່ສ້າງຮາກຖານ ເພື່ອອັດປ່ອງຂ້າມລອຍຂອງກຸ່ມຄົນບໍ່ດີ ແລະ ສຶກສາອົບຮົມປະຊາຊົນບັນດາເຜົ່າເຂດຊາຍແດນໃຫ້ມີສະຕິລະວັງຕົວ, ເຂົ້າຮ່ວມວຽກງານ ປກຊ-ປກສ ຢ່າງຕັ້ງໜ້າ, ປົກປັກຮັກສາຫຼັກໝາຍຊາຍແດນພັດທະນາພື້ນຖານໂຄງລ່າງ ແລະ ສິ່ງອໍານວຍຄວາມສະດວກອື່ນໆ; ສືບຕໍ່ແກ້ໄຂປະກົດການຫຍໍ້ທໍ້ຕາມບໍລິເວນຊາຍແດນໃຫ້ມີຄວາມສະຫງົບປອດໄພໂດຍພື້ນຖານ ສືບຕໍ່ປະຕິບັດກົນໄກປະສານງານຂອງຄະນະກຳມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນຂອງສອງຝ່າຍ ສົ່ງເສີມການຄ້າ, ການລົງທຶນ, ການບໍລິການຊາຍແດນ, ການແລກປ່ຽນວັດທະນະທຳ ແລະ ຮີດຄອງປະເພນີອັນດີງາມຂອງສອງຊາດ.
ຄໍາເຫັນ