ໄຊຍະບູລີ ສະຫຼຸບການຈັດຕັ້ງແຜນງົບປະມານແຫ່ງລັດ ປະຈໍາປີ 2023

ກອງປະຊຸມ ສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ທົ່ວແຂວງ ໄຊຍະບູລີ ໄດ້ຈັດຂຶ້ນເມື່ອບໍ່ດົນມານີ້, ທີ່ຫ້ອງປະຊຸມ ພະແນກສືກສາທິການ ແລະ ກິລາແຂວງ, ໂດຍການເຂົ້າຮ່ວມທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ມີບັນດາຫົວໜ້າ, ຮອງຫົວໜ້າພະແນກການ ແລະ ພາກສ່ວນກ່ຽວຂ້ອງຈາກ 11 ເມືອງເຂົ້າຮ່ວມ.
    ໃນກອງປະຊຸມ, ທ່ານ ນາງ ພອນທີບ ລິນທະວົງ ຮອງຫົວໜ້າ ພະແນກ ການເງິນ ໄດ້ຜ່ານ ບົດສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນງົບປະມານ ປະຈໍາປີ 2024 ຊຶ່ງມີບາງຕອນທ່ານກ່າວວ່າ: ຜ່ານມາພະແນກການເງິນໄດ້ເອົາໃຈໃສ່ຊີ້ນຳໆພາໃນການຈັດຕັ້ງປະຕິບັດວຽກງານຕາມຄວາມຮັບຜິດຊອບຢ່າງໃກ້ຊິດຕິດແທດ ຢູ່ແຕ່ລະຂະແໜງການຮັບຜິດຊອບນັບທັງຂັ້ນແຂວງ ລົງຮອດຂັ້ນເມືອງ ໃນການຈັດຕັ້ງປະຕິບັດວຽກງານ ຄຸ້ມຄອງລາຍຮັບງົບປະມານໂດຍຫັນເປັນທັນສະໄໝ ແລະ ປະຕິບັດລາຍຈ່າຍຕາມແຜນທີ່ສະພາຮັບຮອງໃຫ້ບັນລຸຕາມຄາດໝາຍແຜນການຄື: ດ້ານລາຍຮັບໃນປີ 2023 ປະຕິບັດໄດ້ທັງໜົດ 1.769,67 ຕື້ກີບ, ເທົ່າກັບ 116,83% ຂອງແຜນການປີ, (ລື່ນແຜນການ 16,83% ເປັນເງິນ 254,93 ຕື້ກີບ), ທຽບໃສ່ໄລຍະດຽວກັນຂອງປີຜ່ານມາເທົ່າກັບ 147,74%. ໃນນີ້, ລາຍຮັບພູດສູນກາງ ປະຕິບັດໄດ້ທັງໝົດ 1.101,12 ຕື້ກີບ, ເທົ່າກັບ 109,02% ຂອງແຜນການປີ,  ທຽບໃສ່ໄລຍະດຽວກັນຂອງປີຜ່ານມາເທົ່າກັບ 119,64%. ລາຍຮັບຂອງແຂວງ ປະຕິບັດໄດ້ທັງໝົດ 668,54 ຕື້ກີບ ເທົ່າກັບ 132,45% ຂອງແຜນການປີ (ລື່ນແຜນ 32,45%, ເປັນເງິນລື່ນ 163,80 ຕື້ກີບ), ທຽບໃສ່ເວລາດຽວກັນເທົ່າກັບ 240,91%. ລາຍຮັບສູນກາງ ຄຸ້ມຄອງມອບໃຫ້ແຂວງ 13 ຫົວໝ່ວຍ ປະຕິບັດໄດ້ 395,31 ຕື້ກີບ ເທົ່າກັບ 145,22% ຂອງແຜນການປີ (ລື່ນແຜນ 45,22 % ເປັນເງິນ 87,09 ຕື້ກີບ). ດ້ານລາຍຈ່າຍ:ປະຕິບັດທັງໝົດ 601,44 ຕື້ກີບ, ເທົ່າກັບ 120,46% ຂອງແຜນເບື້ອງຕົ້ນ, ເທົ່າກັບ 97,59% ຂອງແຜນດັດແກ້, ທຽບໃສ່ເວລາດຽວກັນປີຜ່ານມາເທົ່າກັບ 112,11%. ກອງປະຊຸມດັ່ງກ່າວຍັງໄດ້ເຊື່ອມຊຶມບັນດາເອກະສານ, ນິຕິກຳຕ່າງໆ, ພ້ອມກັນຄົ້ນຄວ້າປະກອບຄຳເຫັນ ເພື່ອຍົກໃຫ້ເຫັນດ້ານດີຜົນສຳເລັດ, ດ້ານອ່ອນຂໍ້ຄົງຄ້າງ ແລະ ວິທີການແກ້ໄຂໃນຕໍ່ໜ້າ, ພ້ອມກັນກຳນົດທິດທາງແຜນການ, ມາດຕະການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2024 ແລະ ໄດ້ມອບໃບຍ້ອງຍໍໃຫ້ຜູ້ທີ່ມີຜົນງານດີເດັ່ນໃນປີ 2023 ຕື່ມອີກ.
(ຂ່າວ-ພາບ: ອຸ່ນເຮືອນ ໂພທິລັກ)