ໄຊຍະບູລີສ້າງຄວາມເຂັ້ມແຂງດ້ານການຈັດເກັບລາຍຮັບງົບປະມານ ແລະ ວຽກງານຄຸ້ມຄອງລາຍຈ່າຍ

ໂດຍ:ຕະວິນຍານ

ໂດຍຈັດຕັ້ງປະຕິບັດຕາມຄໍາສັ່ງ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍ ການເພີ່ມທະວີການຄຸ້ມຄອງແລະຕ້ານການຮົ່ວໄຫຼຂອງລາຍຮັບງົບປະມານ,ປະຕິບັດບັນດາມາດຕະການປະຢັດຢ່າງເຂັ້ມງວດ. ໃນປີ 2021-2023 ຜ່ານມາ,ແຂວງໄຊຍະບູລີໄດ້ເອົາໃຈໃສ່ສ້າງຄວາມເຂັ້ມແຂງດ້ານການຈັດເກັບລາຍຮັບງົບປະມານ ແລະ ວຽກງານຄຸ້ມຄອງລາຍຈ່າຍໄດ້ດີ.

ທ່ານ ວັນດາວ ແວວລະນັດສີ ຫົວໜ້າພະແນກການເງິນແຂວງໄຊຍະບູລີ ກ່າວວ່າ:ເພື່ອເຮັດໃຫ້ສໍາເລັດຕາມວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ແຂວງໄດ້ປັບປຸງ ແລະ ນໍາໃຊ້ເຄື່ອງມືທີ່ທັນສະໄໝ ເພື່ອອັດຊ່ອງວ່າງການຮົ່ວໄຫຼ ແລະ ປະຕິບັດຕາມນະໂຍບາຍໃໝ່ ເພື່ອສ້າງລາຍຮັບຕາມທິດຍືນຍົງ ຮັບປະກັນການເພີ່ມຂຶ້ນ ຂອງລາຍຮັບພາຍໃນ ໂດຍການສ້າງຖານຂໍ້ມູນລາຍຮັບໃໝ່ ດ້ວຍ

ການກວດກາຖານຂໍ້ມູນແຫຼ່ງລາຍຮັບ ແລະ ປະຕິບັດຕາມກົດໝາຍ ຢ່າງຄົບຖ້ວນເຂັ້ມງວດ ເຊັ່ນ: ໄດ້ນໍາໃຊ້ລະບົບ Asycuda, SmartTax ແລະ ລະບົບດີຈີຕອນຄຸ້ມຄອງລາຍຮັບພາສີ; ນໍາໃຊ້ລະບົບ TaxRis ຄຸ້ມຄອງຈັດເກັບລາຍຮັບສ່ວຍສາອາກອນ ແລະ ລາຍຮັບຊັບສິນແຫ່ງລັດ; ໃຊ້ລະບົບ RTMS ເຂົ້າໃນການຄຸ້ມຄອງເກັບລາຍຮັບຄ່າທໍານຽມທາງ.ສາມາດຂະຫຍາຍຂໍ້ມູນຖານລາຍຮັບໃໝ່ ຕາມສະຖິຕິຫົວໜ່ວຍທຸລະກິດທັງໝົດ 6.897 ຫົວໜ່ວຍ, ຂັ້ນແຂວງ 736 ຫົວໜ່ວຍ ມາຮອດປັດຈຸບັນ, ທົ່ວແຂວງໄດ້ນຳໃຊ້ລະບົບທັນສະໄໝເຂົ້າໃນການຄຸ້ມຄອງລາຍຮັບງົບປະມານແຫ່ງລັດລະບົບແທັກລິດ ໄດ້ທັງໝົດ 5.297 ຫົວໜ່ວຍ, ເອົາຫົວໜ່ວຍເຂົ້າລະບົບອາກອນມູນຄ່າເພີ່ມ 365 ຫົວໜ່ວຍ ເທົ່າກັບ 61,14%, ຕິດຕັ້ງໂປຣແກຣມບັນຊີ ແລະ ໃບເກັບເງິນ 191 ຫົວໜ່ວຍ, ຜັນຂະຫຍາຍການມອບຫົວໜ່ວຍຄຸ້ມຄອງຕາມວາລະແຫ່ງຊາດ,ກົມມອບໃຫ້ ຂັ້ນແຂວງ 132 ຫົວໜ່ວຍ ປະຕິບັດໄດ້ແລ້ວ 94 ຫົວໜ່ວຍ, ຂັ້ນເມືອງ 123 ຫົວໜ່ວຍ ປະຕິບັດໄດ້ແລ້ວ 23 ຫົວໜ່ວຍ; ການຈັດເກັບລາຍຮັບ ໃນໄລຍະ 2 ປີ 9 ເດືອນ ໄດ້ທັງໝົດ 3.590,62 ຕື້ກີບ ເທົ່າກັບ 94,90%ຂອງແຜນການ ໃນນີ້: ລາຍຮັບສູນກາງປະຕິບັດຢູ່ແຂວງ ໄດ້ 2.499,32 ຕື້ກີບ, ເທົ່າກັບ 91,16%, ລາຍຮັບຂອງແຂວງປະຕິບັດໄດ້ 1.041,74 ຕື້ກີບ ເທົ່າກັບ 104,76%.

ການຄຸ້ມຄອງລາຍຈ່າຍງົບປະມານຂອງທ້ອງຖິ່ນແຂວງ ແມ່ນໄດ້ຈັດຕັ້ງປະຕິບັດຕາມ ກົດໝາຍງົບປະມານແຫ່ງລັດສະບັບເລກທີ 71/ສພຊ, ລົງວັນທີ 16 ທັນວາ 2016 ແລະ ຄຸ້ມຄອງລາຍຈ່າຍຕາມແຜນທີ່ສະພາຮັບຮອງໃນແຕ່ລະປີ ເພື່ອຄຸ້ມຄອງນຳໃຊ້ຈັດສັນແຜນລາຍຈ່າຍງົບປະມານໃຫ້ຫົວໜ່ວຍງົບປະມານຂັ້ນແຂວງ ແລະ ເມືອງຄຸ້ມຄອງເບີກຈ່າຍ ໂດຍໄດ້ອອກນິຕິກຳຄຳສັ່ງແນະນຳຂອງທ່ານເຈົ້າແຂວງວ່າດ້ວຍການຈັດຕັ້ງປະຕິບັດແຜນງົບປະ

ມານແຫ່ງລັດໃນແລະປີ ເພື່ອເປັນບ່ອນອີງໃນການຈັດຕັ້ງປະຕິບັດ ລາຍຮັບ-ລາຍຈ່າຍ ໃຫ້ມີປະສິດທິພາບ ແລະ ປະສິດທິຜົນໃນແຕ່ລະປີ; ສິ່ງສຳຄັນແມ່ນການຫັນເປັນທັນສະໄໝໃນລະບົບຄັງເງິນ ຕາມແຜນສູ້ຊົນ 5 ເມືອງ ໃນການນຳໃຊ້ລະບົບ RTIS ແມ່ນສຳເລັດ ແລະ ຄັງເງິນແຂວງໄດ້ຂະຫຍາຍອີກ 6 ເມືອງ ໃນການທົດລອງການນໍາໃຊ້ລະບົບດັ່ງກ່າວ.ມາຮອດປັດຈຸບັນ,ການນຳໃຊ້ລະບົບ RTIS ເຂົ້າໃນການບັນທຶກບັນຊີລາຍຮັບ-ລາຍຈ່າຍງົບປະມານແລະຄັງເງິນສຳເລັດໃນທົ່ວແຂວງແລ້ວ; ໄປຄ່ຽງຄູ່ກັນນີ້,ແຂວງໄດ້ເອົາໃຈໃສ່ການເບີກຈ່າຍເງິນເດືອນໃຫ້ສາມາດປະຕິບັດໄດ້ທັນກຳນົດເວລາ ແລະ ບໍ່ມີເງິນເດືອນຄ້າງຈ່າຍ; ສຸມໃສ່ການປະຕິບັດວຽກງານບັນຊີຄູ່ຂອງອົງການຈັດຕັ້ງລັດ ແມ່ນປະຕິບັດໄດ້ກວມ 90% ຂອງຫົວໜ່ວຍງົບປະມານທັງໝົດ, ຂັ້ນເມືອງແມ່ນປະຕິບັດໄດ້ກວມ 40% ຂອງຫົວ

ໜ່ວຍງົບປະມານທັງໝົດ; ການດຸ່ນດ່ຽງຂອງສູນກາງແຜນ 660,45 ຕື້ກີບ, ປະຕິບັດໄດ້ 614,18 ຕື້ກີບ, ເທົ່າກັບ 92,99% ຂອງແຜນ 3 ປີ, ການດຸ່ນດ່ຽງງົບປະມານແມ່ນປະຕິບັດຕາມການແຈ້ງແຜນລາຍຮັບ-ລາຍຈ່າຍງົບປະມານປະຈຳປີ ແລະ ສືບຕໍ່ເປັນແຂວງຂາດດຸນງົບປະມານ.ສັງລວມແລ້ວຕະຫອດໄລຍະ 2021-2023 ແຂວງໄຊຍະບູລີ ສາມາດປະຕິບັດລາຍຮັບໃໝ່ເພີ່ມຂຶ້ນ 709,87ຕື້ ເພີ່ມຂຶ້ນ 124,64% ເມື່ອທຽບກ່ອນການປະຕິບັດວາລະແຫ່ງຊາດ.