ຜູ້ຊີ້ນຳຂົງເຂດເສດຖະກິດ-ສັງຄົມ ປະທານຄະນະກໍາມະການດ້ານຄວາມປອດໄພທາງຫຼວງຂັ້ນແຂວງ, ມີຫົວໜ້າ-ຮອງຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ, ຄູອາຈານ ແລະ ນ້ອງນັກຮຽນເຂົ້າຮ່ວມ.
ທ່ານ ໄຊສົມພັນ ລີເຕັງເບຼຍຈື່ ຫົວໜ້າພະແນກໂຍທາທິການ ແລະ ຂົນສົ່ງແຂວງ ໄດ້ຂຶ້ນລາຍງານກ່ຽວກັບງານສັບປະດາແຫ່ງຊາດດ້ານຄວາມປອດໄພທາງຫຼວງ ປະຈຳປີ 2025 ໃຫ້ຮູ້ວ່າ: ງານສັບປະດາແຫ່ງຊາດດ້ານຄວາມປອດໄພທາງຖະໜົນ ປີນີ້ແມ່ນຈັດຂຶ້ນພາຍໃຕ້ຫົວຂໍ້: ຖະໜົນເພື່ອຊີວິດ, ຂັບລົດຊ້າ, ຊີວິດຍືນຍາວ. ຈາກນັ້ນ, ທ່ານໄດ້ຍົກໃຫ້ເຫັນຄວາມເສຍຫາຍຈາກອຸປະຕິເຫດທາງທ້ອງຖະໜົນ. ໃນທົ່ວໂລກ ປີໜຶ່ງມີຜູ້ເສຍຊີວິດເຖິງ 1,2 ລ້ານກວ່າຄົນ. ສຳລັບ ສປປ ລາວ ຄິດສະເລ່ຍມີຜູ້ເສຍຊີວິດຈາກການເກີດອຸປະຕິເຫດທາງຫຼວງແຕ່ລະປີ ສະເລ່ຍປະມານ 1 ພັນກວ່າຄົນ/ປີ. ສະເພາະແຂວງໄຊສົມບູນ ໃນປີຜ່ານມາມີອຸປະຕິເຫດເກີດຂຶ້ນ 131 ຄັ້ງ, ມີຜູ້ເສຍຊີວິດ 11 ຄົນ ຍິງ 3, ພາຫະນະເປ່ເພ ທັງໝົດ 59 ຄັນ ມູນຄ່າເສຍຫາຍ 5.7 ຕື້ກວ່າກີບ. ອົງການສະຫະປະຊາຊາດ ໄດ້ກຳນົດມາດຕະການປ້ອງກັນ ແລະ ແກ້ໄຂ ໂດຍມີ 5 ເສົາຄໍ້າຄື: ໂຄງລ່າງຄົມມະນາຄົມ-ຂົນສົ່ງປອດໄພ, ພາຫະນະປອດໄພ, ຄົນໃຊ້ລົດໃຊ້ທາງຫຼວງປອດໄພ, ການກອບກູ້ຊີວິດຫຼັງເກີດອຸບັດປະຕິເຫດ ແລະ ການຄຸ້ມຄອງຄວາມປອດໄພ ເພື່ອໂຄສະນາເຜີຍແຜ່ ແລະ ປູກຈິດສຳນຶກ ໃຫ້ຜູ້ຂັບຂີ່ລົດໃຫຍ່, ລົດຖີບ, ລົດຈັກ ໃສ່ສາຍຫັດນິລະໄພ, ໃສ່ໝວກກັນກະທົບ ເວລາຂັບຂີ່ ແລະ ຕື່ນຕົວ ປະຕິບັດລະບຽບກົດໝາຍຈາລະຈອນຢ່າງເຂັ້ມງວດ.
ທ່ານ ສຸກສະຫວາດ ວົງພູມເຫຼັກ ໄດ້ມີຄຳເຫັນກ່າວເປີດງານສັບປະດາແຫ່ງຊາດດ້ານຄວາມປອດໄພທາງຫຼວງ ແລະ ປ່ອຍປຸມເປົ່າເປີດພິທີ ຂຶ້ນຢ່າງເປັນທາງການ. ຈາກນັ້ນ ຜູ້ເຂົ້າຮ່ວມຍັງໄດ້ຍ່າງມາລາທອນເພື່ອສຸຂະພາບ ທັງເປັນການໂຄສະນາດ້ານຄວາມປອດໄພທາງຫຼວງ ໃຫ້ສັງຄົມຮັບຮູ້ ແລະ ຮັບຊົມລະຄອນເວທີ, ກິດຈະກໍາຖາມ-ຕອບຄວາມຮູ້ກ່ຽວກັບລະບຽບການຈະລາຈອນ ເພື່ອຮັບລາງວັນ ເປັນໜວກກັນກະທົບ ແລະ ອື່ນໆ ດ້ວຍບັນຍາກາດຟົດຟຶ້ນ.
(ພາບ-ຂ່າວ: ຟອງ ນໍ່ນິນທາ)
ຄໍາເຫັນ