 |
ທ່າມກາງບັນຍາກາດອັນສະຫງົບ, ສົມກຽດ ແລະ ເປັນສິລິມຸງຄຸນ, ບັນດາຜູ້ແທນ ແລະ ພີ່ນ້ອງຊາວຫວຽດນາມ ໄດ້ຮ່ວມກັນຖວາຍທູບລະນຶກ, ຄໍາກ່າວເປີດພິທີ ແລະ ພິທີຂໍພອນ, ອຸທິດສ່ວນບຸນກຸສົນ ໂດຍພຣະສົງ ແລະ ພຸດທະສາສະນິກຊົນຂອງວັດເປັນຜູ້ດຳເນີນ. ພິທີຄັ້ງນີ້, ບໍ່ພຽງແຕ່ລະນຶກເຖິງບັນດາວິລະຊົນຜູ້ສະຫຼະຊີວິດ ຂອງລາວ - ຫວຽດນາມ ເທົ່ານັ້ນ, ແຕ່ຫາກຍັງໄດ້ໄວ້ອາໄລຢ່າງສຸດຊຶ້ງແກ່ນາຍທະຫານ ແລະ ພົນທະຫານ 64 ສະຫາຍ ຂອງກອງທັບເຮືອປະຊາຊົນຫວຽດນາມ ທີ່ໄດ້ສະຫຼະຊີວິດຢ່າງກ້າຫານ ໃນເຫດການ ກາກມາ (Gạc Ma) ໃນປີ 1988, ເຊິ່ງເປັນຂີດໝາຍຊຶ້ງບໍ່ມີວັນຈືດຈາງໃນປະຫວັດສາດ ການປົກປ້ອງອະທິປະໄຕອັນສັກກາລະບູຂອງຊາດ.
ຈຸດເດັ່ນຂອງກິດຈະກຳໃນຄັ້ງນີ້ ແມ່ນການປະສານກົມກຽວ ລະຫວ່າງ ຄຸນຄ່າທາງຈິດໃຈ - ສາສະໜາ, ຄວາມເລິກເຊິ່ງທາງປະຫວັດສາດ ແລະ ຄວາມໝາຍຕໍ່ຊຸມຊົນ. ພິທີສວດມົນອຸທິດສ່ວນບຸນກຸສົນ ແລະ ການຖວາຍ ທູບທຽນລະນຶກ ໄດ້ຖືກຈັດຂຶ້ນຢ່າງຕໍ່ເນື່ອງ, ສົມກຽດ ແລະ ເຄັ່ງຂຶມ ຊຶ່ງສະທ້ອນເຖິງຈັນຍາບັນ ແຫ່ງຄວາມກະຕັນຍູ, ຮູ້ບຸນຄຸນຕໍ່ຄົນຮຸ່ນກ່ອນ ທີ່ບໍ່ໄດ້ຫວັ່ນໄຫວຕໍ່ການເສຍສະຫຼະເລືອດເນື້ອ ແລະ ຊີວິດ ເພື່ອສັນຕິພາບ, ເອກະລາດ ແລະ ເພື່ອສາຍສຳພັນແຫ່ງການຮ່ວມຕໍ່ສູ້ອັນໝັ້ນແກ່ນ ລະຫວ່າງ ປະຊາຊົນສອງປະເທດ ຫວຽດນາມ ແລະ ລາວ. ນີ້ຍັງ ເປັນໂອກາດໃຫ້ຊຸມຊົນຊາວຫວຽດນາມໃນນະຄອນຫຼວງວຽງຈັນ ໄດ້ຮ່ວມກັນຫວນຄືນເສັ້ນທາງປະຫວັດສາດອັນ ສະຫງ່າງາມ ທີ່ສອງຊາດ ໄດ້ຢືນຄຽງບ່າຄຽງໄຫຼ່, ຮ່ວມສຸກຮ່ວມທຸກໃນໄລຍະເວລາຫຍຸ້ງຍາກທີ່ສຸດ.
ໃນມູມມອງຊີວິດຊຸມຊົນ, ພິທີດັ່ງກ່າວ, ຍັງມີຄວາມໝາຍເປັນກິດຈະກຳວັດທະນະທຳ ທີ່ມີພະລັງໃນການ ເຊື່ອມສານ. ເຖິງຈະຢູ່ຫ່າງໄກ ຈາກບ້ານເກີດເມືອງນອນ, ສະຖານທີ່ວັດເຟິດຕິກ ນັບແຕ່ໃດໆມາ ບໍ່ພຽງແຕ່ບ່ອນສຳລັບການປະກອບພິທີທາງສາສະໜາເທົ່ານັ້ນ, ແຕ່ຫາກຍັງເປັນສູນກາງແຫ່ງຄວາມຜູກພັນຂອງຊຸມຊົນ, ເປັນບ່ອນເຕົ້າໂຮມສະມາຄົມ, ວິສາຫະກິດ, ພີ່ນ້ອງຊາວຫວຽດນາມ ແລະ ຊາວຫວຽດທຸກພາກສ່ວນ ທີ່ກຳລັງດຳລົງຊີວິດ ແລະ ເຮັດວຽກຢູ່ນະຄອນຫຼວງວຽງຈັນ. ຫຼາຍກິດຈະກຳຂອງສະມາຄົມຊາວຫວຽດນາມນະຄອນຫຼວງວຽງຈັນ ແລະ ບັນດາອົງກອນຊຸມຊົນ ກໍໄດ້ຖືກຈັດຕັ້ງຕາມທິດ ທີ່ຖືສະຖານທີ່ແຫ່ງນີ້ເປັນ “ສາຍຄາຮ່ວມ”, ເປັນບ່ອນໃຫ້ພີ່ນ້ອງໄດ້ພົບພໍ້, ຊ່ວຍເຫຼືອເກື້ອກູນກັນ, ຮັກສາຊີວິດຈິດໃຈ ແລະ ເອກະລັກວັດທະນະທຳຫວຽດນາມ ໃນຜືນແຜ່ນດິນລ້ານຊ້າງ.
ຄວາມໝາຍອັນເລິກເຊິ່ງຂອງກິດຈະກຳຄັ້ງນີ້ ມັນບໍ່ແມ່ນພຽງແຕ່ພິທີລະນຶກໄວ້ອາໄລເທົ່ານັ້ນ, ແຕ່ຍັງເປັນຮູບ ແບບການສຶກສາມູນເຊື້ອ, ຮີດຄອງປະເພນີອັນເປັນຮູບປະທຳ ໃຫ້ແກ່ຄົນຮຸ່ນໃໝ່ ໃນຊຸມຊົນ. ຜ່ານຖ້ອຍ ຄຳລະນຶກ, ບົດ ຄໍາເຫັນລະນຶກເຖິງບຸນຄຸນ ແລະ ບັນຍາກາດອັນສັກສິດຂອງພິທີ, ຄົນຮຸ່ນໃໝ່ ໄດ້ມີ ໂອກາດເຂົ້າໃຈຢ່າງເລິກເຊິ່ງຍິ່ງຂຶ້ນ ເຖິງການເສຍສະຫຼະອັນຍິ່ງໃຫຍ່ຂອງຄົນຮຸ່ນກ່ອນ, ເຖິງຄຸນຄ່າຂອງສັນຕິພາບໃນປັດຈຸບັນ, ພ້ອມທັງຮັບຮູ້ເຖິງຄວາມ ຮັບຜິດຊອບ ໃນການສືບຕໍ່ຮີດຄອງປະເພນີແຫ່ງຄວາມສາມັກຄີ, ຄວາມເມດຕາ ແລະ ການຫັນໜ້າສູ່ຮາກເຫງົ້າຂອງຕົນ. ຈາກນັ້ນ ຈິດໃຈຮັກຊາດ, ຄວາມພາກພູມໃຈໃນຊາດ ແລະ ຈິດສຳນຶກແຫ່ງການຜູກພັນກັບຊຸມຊົນ ຈຶ່ງສືບຕໍ່ໄດ້ຮັບການບົ່ມຊ້ອນຢ່າງເປັນທຳມະຊາດ ແລະ ຍືນຍົງ.
ການເຄື່ອນໄຫວກິດຈະກຳນີ້ ບໍ່ແມ່ນເລື່ອງບັງເອີນ ທີ່ໄດ້ຮັບການຕອບຮັບຢ່າງກວ້າງຂວາງຈາກພີ່ນ້ອງຮ່ວມຊາດ. ສະມາຄົມຊາວຫວຽດນາມນະຄອນຫຼວງວຽງຈັນ ແມ່ນອົງກອນທີ່ມີປະຫວັດຫຼາຍກວ່າ 40 ປີ, ມີບົດບາດສຳຄັນໃນການ ເຕົ້າໂຮມ ແລະ ສົ່ງເສີມຄວາມສາມັກຄີຂອງຊາວຫວຽດນາມ ໃນຕ່າງແດນ, ຊ່ວຍເຫຼືອດ້ານຊີວິດການເປັນຢູ່ ຂອງສະ ມາຊິກ, ຮັກສາເອກະລັກວັດທະນະທຳຫວຽດນາມ ແລະ ຊ່ວຍໃຫ້ຊາວຫວຽດນາມ ປັບໂຕເຂົ້າກັບສັງຄົມປະເທດເຈົ້າພາບ ໄດ້ເປັນຢ່າງດີ. ພ້ອມກັນນັ້ນ ກໍເຄົາລົບ ແລະ ປະຕິບັດກົດໝາຍຂອງ ສປປ ລາວ ຢ່າງເຄັ່ງຄັດ. ດັ່ງນັ້ນ, ກິດຈະກຳທີ່ມີສີສັນດ້ານວັດທະນະທຳ - ຈິດໃຈ, ການກຸສົນ ຫຼື ການແລກປ່ຽນພົບປະຂອງຊຸມຊົນ ຈຶ່ງບໍ່ພຽງແຕ່ຕອບ ສະໜອງຄວາມຕ້ອງການດ້ານຈິດໃຈຂອງພີ່ນ້ອງເທົ່ານັ້ນ, ແຕ່ຍັງຊ່ວຍຫຼໍ່ຫຼອມພະລັງພາຍໃນ, ເສີມສ້າງຄວາມຜູກພັນ ລະຫວ່າງ ບັນດາສະມາຄົມ, ວິສາຫະກິດ ແລະ ແຕ່ລະຄອບຄົວຊາວຫວຽດນາມໃນລາວ ໃຫ້ແໜ້ນແຟ້ນຍິ່ງຂຶ້ນ.
ໃນຄວາມໝາຍກວ້າງ, ກິດຈະກຳວັດທະນະທຳຊຸມຊົນ, ພິທີຂໍພອນ ແລະ ພິທີອຸທິດສ່ວນບຸນກຸສົນ ເພື່ອລະນຶກເຖິງບັນດາວິລະຊົນຜູ້ເສຍສະຫຼະຊີວິດ ຂອງລາວ - ຫວຽດນາມ ໃນຄັ້ງນີ້, ຍັງເປັນຫຼັກຖານທີ່ມີຊີວິດຊີວາ ຂອງຄວາມສາມັກຄີມິດຕະພາບອັນຍິ່ງໃຫຍ່ພິເສດ ລະຫວ່າງສອງປະເທດ. ສາຍພົວພັນ ຫວຽດນາມ - ລາວ ໄດ້ຖືກສ້າງ ຂຶ້ນດ້ວຍເລືອດເນື້ອ, ການເສຍສະຫຼະອັນຍິ່ງໃຫຍ່ ແລະ ຈິດໃຈແຫ່ງຄວາມຊື່ສັດໝັ້ນແກ່ນ ທີ່ຫາໄດ້ຍາກ ໃນປະຫວັດ ສາດສາຍພົວພັນສາກົນ. ດັ່ງນັ້ນ, ການທີ່ຊຸມຊົນຊາວຫວຽດນາມ ໃນວຽງຈັນ ສືບຕໍ່ຮັກສາການຈັດກິດຈະກຳຕອບບຸນ ແທນຄຸນ, ລະນຶກໄວ້ອາໄລ ແລະ ແລກປ່ຽນວັດທະນະທຳ ຢ່າງສະໝ່ຳສະເໝີ ບໍ່ພຽງແຕ່ເປັນວິທີຮັກສາຄວາມຊົງຈຳ ທາງປະຫວັດສາດເທົ່ານັ້ນ, ແຕ່ຍັງເປັນຂົວຕໍ່ທີ່ສໍາຄັນແຫ່ງການເຊື່ອມໂຍງປະຊາຊົນສອງປະເທດ ໃນລະດັບຊຸມຊົນ, ຈາກນັ້ນຈຶ່ງຊ່ວຍເພີ່ມພູນຮາກຖານທາງສັງຄົມ ໃຫ້ແກ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ - ຫວຽດນາມ ໃຫ້ເລິກເຊິ່ງຍິ່ງຂຶ້ນ.
ພິທີໄດ້ປິດລົງດ້ວຍບັນຍາກາດທີ່ອົບອຸ່ນ, ສົມກຽດ ແລະ ເຕັມໄປດ້ວຍນ້ຳໃຈມິດໄມຕີ. ຄວັນທູບທຽນ ແຫ່ງການລະນຶກເຖິງບຸນຄຸນ, ຄຳອະທິຖານຂໍໃຫ້ປະເທດຊາດສະຫງົບສຸກ ປະຊາຊົນຢູ່ເຢັນເປັນສຸກ, ຂໍໃຫ້ດວງວິນຍານ ຂອງບັນດາວິລະຊົນຜູ້ເສຍສະຫຼະຊີວິດ ໄດ້ໄປສູ່ສຸຂະຄະຕິ, ລ້ວນແຕ່ເປັນຂໍ້ຄວາມອັນ ດີງາມທີ່ຊຸມຊົນຊາວຫວຽດ ນາມໃນວຽງຈັນ ຕ້ອງການສົ່ງຕໍ່ ຄືການຮູ້ຄຸນຄ່າຂອງອະດີດ, ການຮັກສາເອກະລັກ, ຄວາມສາມັກຄີຫັນໜ້າສູ່ປະເທດ ຊາດບ້ານເກີດ ແລະ ຄຽງຄູ່ກັບປະເທດທີ່ຕົນກຳລັງອາໄສຢູ່. ຈາກກິດຈະກຳ ຄວາມຮັກແພງຂອງຊຸມຊົນ ໄດ້ຮັບການບົ່ມຊ້ອນ, ເອກະລັກຂອງຊາດ ໄດ້ຖືກສືບທອດ ແລະ ຄວາມມິດຕະພາບພິເສດ ລາວ - ຫວຽດນາມ ໄດ້ຮັບການເສີມສ້າງໃຫ້ແໜ້ນແຟ້ນ ດ້ວຍການກະທຳທີ່ເປັນຮູບປະທຳ, ຈິງໃຈ ແລະ ເປັນມະນຸດສູງຂຶ້ນອີກ.
ຄໍາເຫັນ