 |
ສະຫາຍ ພູວຽງ ພົງສະຫວັດດີ ກ່າວວ່າ: ການນໍາພາຊາວໜຸ່ມ ຄອສພ ໄປທັດສະນະສຶກສາໃນຄັ້ງນີ້, ເພື່ອສະເຫຼີມສະຫຼອງຜົນສຳເລັດ ຂອງກອງປະຊຸມຄົບຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ຄັ້ງທີ II ສະໄໝທີ IX; ເພື່ອສ້າງຂະບວນການຕ້ອນຮັບກອງປະຊຸມໃຫຍ່ ອົງຄະນະພັກ ຄອສພ ທີ່ໃກ້ຈະມາເຖິງນີ້. ພ້ອມນັ້ນ, ເພື່ອໃຫ້ຊາວໜຸ່ມໄດ້ຫວນຄືນປະຫວັດສາດ, ໄດ້ເຫັນ ແລະ ສໍາຜັດກັບສະຖານທີ່ ແລະ ເລື່ອງລາວຕົວຈິງຂອງປະທານ ໄກສອນ ພົມວິຫານ ຜູ້ນຳທີ່ຍິ່ງໃຫຍ່ ທີ່ແສນເຄົາລົບຮັກຂອງປວງຊົນລາວທັງຊາດ, ເພື່ອໃຫ້ຊາວໜຸ່ມໄດ້ຮຽນຮູ້ບົດຮຽນ, ປະສົບການ ໃນການນຳພາ-ຊີ້ນຳ ການກອບກູ້ປະເທດຊາດໃນແຕ່ລະໄລຍະ; ເພື່ອຝຶກຝົນຫຼໍ່ຫຼອມແນວຄິດ, ຮຽນຮູ້ແບບແຜນວິທີເຮັດວຽກ ແລະ ສິນທຳປະຕິວັດ ຂອງປະທານໄກສອນ ພົມວິຫານ ເພື່ອນໍາມາເປັນແຮງບັນດານໃຈໃນການພັດທະ ນາຕົນເອງ.
 |
ສະຫາຍ ພູວຽງ ພົງສະຫວັດດີ ກ່າວຕື່ມວ່າ: ປະທານ ໄກສອນ ພົມວິຫານ "ເພິ່ນບໍ່ພຽງແຕ່ເປັນນັກປະຕິວັດທີ່ຍິ່ງໃຫຍ່, ເພິ່ນຍັງເປັນແບບຢ່າງທີ່ບໍ່ມີວັນຕາຍສຳລັບຊາວໜຸ່ມລາວທຸກຄົນ” ແລະ ຊາວໜຸ່ມພວກເຮົາໃຫ້ຄໍາໝັ້ນສັນຍາວ່າ: ຈະນຳເອົາບົດຮຽນ ແລະ ແບບແຜນອັນດີງາມຂອງປະທານ ໄກສອນ ພົມວິ ຫານ ໄປຜັນຂະຫຍາຍເຂົ້າໃນການຮ່ຳຮຽນ ແລະ ການອອກແຮງງານ ເພື່ອເຮັດໃຫ້ພວກເຮົາໄດ້ເປັນດັ່ງ "ແຂນຂວາທີ່ເຂັ້ມແຂງຂອງພັກ", ເປັນຊາວໜຸ່ມທີ່ກ້າຄິດ, ກ້າເຮັດ, ກ້າຮັບຜິດຊອບ ເພື່ອເຮັດໃຫ້ປະເທດຊາດມັ່ງຄັ່ງເຂັ້ມແຂງ ຕາມຄວາມມຸ່ງມາດປາຖະໜາ. ໂອກາດນີ້, ສະຫາຍ ພູວຽງ ພົງສະຫວັດດີ ພ້ອມສະມາຊິກຊາວໜຸ່ມໄດ້ເຂົ້າວາງກະຕ່າດອກໄມ້ຢູ່ຕໍ່ໜ້າຮູບປັ້ນຫຼໍ່ປະທານ ໄກສອນ ພົມວິຫານ ເພື່ອສະແດງຄວາມກະຕັນຍູຮູ້ບຸນຄຸນ ຕໍ່ຄຸນງານຄວາມດີຂອງປະທານ ໄກສອນ ພົມວິຫານ.
 |
ຂ່າວ-ພາບ: ວັນເພັງ
ຄໍາເຫັນ