ອົສຕຣາລີ ສະເໜີວີຊາໃຫ້ກັບພົນລະເມືອງຕູວາລູ 280 ຄົນຕໍ່ປີ ພາຍໃຕ້ຂໍ້ຕົກລົງການຍົກຍ້າຍຖິ່ນຖານ ເນື່ອງຈາກສະພາບດິນຟ້າອາກາດ ຊຶ່ງລັດຖະບານອົສຕຣາລີເອີ້ນວ່າ:“ຂໍ້ຕົກລົງວີຊາສະພາບດິນຟ້າອາກາດຄັ້ງທຳອິດຂອງໂລກ”. ໂດຍຊາວຕູວາລູ ຫຼາຍກວ່າ 3,000ຄົນ ໄດ້ເຂົ້າຮ່ວມລົງຄະແນນສຽງເພື່ອຂໍວີຊາຊຸດທໍາອິດແລ້ວ, ອີງຕາມໂຕເລກຢ່າງເປັນທາງການຂອງໂຄງການອົສຕຣາລີ ຊຶ່ງຄິດເປັນເກືອບໜຶ່ງສ່ວນສາມຂອງປະຊາກອນທົ່ວປະເທດ.
ນັກວິທະຍາສາດຢ້ານວ່າ ຕູວາລູ ຊຶ່ງເປັນໜຶ່ງໃນພື້ນທີ່ທີ່ໄດ້ຮັບຜົນກະທົບຈາກການປ່ຽນແປງຂອງດິນຟ້າອາກາດຫຼາຍທີ່ສຸດແຫ່ງໜຶ່ງຂອງໂລກຈະບໍ່ສາມາດອາໄສຢູ່ໄດ້ພາຍໃນ 80 ປີຂ້າງໜ້າ, ໂດຍພົບວ່າເກາະປະກາລັງ 9 ແຫ່ງ ຂອງໝູ່ເກາະນີ້ ມີ 2 ແຫ່ງໄດ້ຈົມຢູ່ໃຕ້ນ້ຳແລ້ວ.
ກະຊວງການຕ່າງປະເທດອົສຕຣາລີກ່າວວ່າ: "ອົສຕຣາລີຮັບຮູ້ເຖິງຜົນກະທົບທີ່ຮ້າຍແຮງຂອງການປ່ຽນແປງດິນຟ້າອາກາດຕໍ່ຊີວິດການເປັນຢູ່, ຄວາມປອດໄພແລະສະຫວັດດີການຂອງປະເທດແລະປະຊາຊົນທີ່ມີຄວາມສ່ຽງຕໍ່ສະພາບອາກາດ, ໂດຍສະເພາະໃນພາກພື້ນປາຊີຟິກ."
ອົສຕຣາລີ ແລະ ຕູວາລູ ໄດ້ລົງນາມໃນສົນທິສັນຍາສະຫະພາບ Falepili ຂອງອົສຕຣາລີ - ຕູວາລູ ຊຶ່ງຖືເປັນການເລີ່ມຕົ້ນທີ່ສໍາຄັນໃນປີ 2024. ພາຍໃຕ້ຂໍ້ຕົກລົງດັ່ງກ່າວ, ອົສຕຣາລີໄດ້ເປີດວີຊາປະເພດໃໝ່ສຳລັບພົນລະເມືອງຕູວາລູທີ່ເປັນຜູ້ໃຫຍ່ແລະ ໃນຂະນະດຽວກັນກໍມີສັນຍານວ່າໂຄງການນີ້ຈະມີຜູ້ສະໝັກເກີນຈຳນວນຫຼວງຫຼາຍ.
ຂໍ້ມູນຢ່າງເປັນທາງການກ່ຽວກັບໂຄງການນີ້ສະແດງໃຫ້ເຫັນວ່າຊາວຕູວາລູ 3,125ຄົນ ເຂົ້າຮ່ວມການສະໝັກຂໍວີຊາແບບສຸ່ມພາຍໃນ 4 ມື້ ຫຼັງຈາກເປີດໃຫ້ລົງທະບຽນໃນອາທິດທີ່ຜ່ານມາ.
ໂຄສົກຂອງກະຊວງການຕ່າງປະເທດຂອງອົສຕຣາລີ ກ່າວວ່າ: "ແມ່ນຂໍ້ຕົກລົງປະເພດນີ້ຄັ້ງທໍາອິດໃນໂລກ ຊຶ່ງເປີດເສັ້ນທາງສໍາລັບການຍົກຍ້າຍທີ່ມີກຽດໃນຂະນະທີ່ຜົນກະທົບດ້ານສະພາບດິນຟ້າອາກາດຮ້າຍແຮງຂຶ້ນ," ຈາກຂໍ້ມູນສຳມະໂນຄົວ ທີ່ຮວບຮວມໃນປີ 2022 ລະບຸວ່າ: ປະເທດຕູວາລູ ມີປະຊາກອນ 10,643 ຄົນ.
ວີຊາດັ່ງກ່າວມີຄ່າລົງທະບຽນ 25 ໂດລາ ໂດຍສະປິດຮັບການລົງທະບຽນ ໃນວັນທີ 18 ກໍລະກົດ ຈະມາເຖິງນີ້.
ຄໍາເຫັນ