ແຂວງເຊກອງຂຶ້ນໃນວັນທີ 7 ມັງກອນ 2025 ທີ່ພະແນກ ຍທຂ ແຂວງ ໂດຍພາຍໃຕ້ການເປັນປະທານຮ່ວມຂອງ ທ່ານ ບຸນທະວີ ນະຄອນສິດ ຫົວໜ້າພະແນກ ຍທຂ ແຂວງ, ທ່ານ ຕຸລາວັນ ວົງໄຊ ເຈົ້າເມືອງລະມາມ ປະທານອົງການພັດທະນາ ແລະ ບໍລິຫານຕົວເມືອງ, ມີພາກພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ຄໍາຜົນ ຈັນທະວົງ ຮອງຫົວໜ້າຂະແໜງເຄຫາ ແລະ ຜັງເມືອງ ພະແນກ ຍທຂ ແຂວງ ໄດ້ຂຶ້ນນໍາສະເໜີກ່ຽວກັບການແບ່ງຄວາມຮັບຜິດຊອບວຽກງານຄຸ້ມຄອງການປຸກສ້າງ ລະຫວ່າງ ພະແນກ ຍທຂ ແຂວງ ກັບ ອົງການປົກຄອງເມືອງລະມາມ ຫຼື ອພບຕ. ໃນນີ້, ຂັ້ນແຂວງຮັບຜິດຊອບ ແມ່ນອາຄານປະເພດສໍານັກງານຂອງລັດ ເປັນຕົ້ນ ແມ່ນໂຮງໝໍ, ສຸກສາລາ, ໂຮງຮຽນ, ອາຄານທີ່ຢູ່ອາໄສ 2 ຊັ້ນຂຶ້ນໄປ, ກຳແພງ, ຮົ້ວອ້ອມອາຄານສໍານັກງານຂອງລັດ, ປະເພດຮ້ານອາຫານ, ເຮືອນພັກ, ໂຮງແຮມ, ປໍ້ານໍ້າມັນ, ຕະຫຼາດສົດ, ຮ້ານຄ້າທຸກປະເພດ, ສາງເກັບມ້ຽນສິນຄ້າ ແລະ ໂຮງງານອຸດສາຫະກຳທຸກປະເພດ, ຄຸ້ມຄອງ-ອອກອະນຸຍາດວຽກຖົມດິນທີ່ມີບໍລິມາດໃຫ່ຍກວ່າ 500 ແມັດກ້ອນຂຶ້ນໄປ, ຈັດວາງລະບົບສິ່ງສາທາລະນຸປະໂພກ ຄື: ໄຟເຍືອງທາງ, ຕາຂ່າຍໄຟຟ້າ, ນໍ້າປະປາ, ຕົ້ນໄມ້ປະດັບຕາມເສັ້ນທາງ, ແລວຕ່າຂ່າຍຄົມມະນາຄົມ, ພູມີທັດຕົວເມືອງ ແລະ ປະຕິບັດໜ້າທີ່ອື່ນໆ ຕາມສິດ-ພາລະບົດບາດທີ່ກົດໝາຍກຳນົດ ແລະ ຂັ້ນເມືອງ ຫຼື ອພບຕ ຮັບຜິດຊອບວຽກຈັດສັນຄວາມເປັນລະບຽບຮຽບຮ້ອຍໃນຕົວເມືອງ, ວຽກຄຸ້ມຄອງຂີ້ເຫຍື້ອ ແລະ ສິ່ງແວດລ້ອມຕົວເມືອງ, ຄຸ້ມຄອງປ້າຍຈາລະຈອນຕ່າງໆ ທີ່ກໍ່ສ້າງສຳເລັດແລ້ວ, ຄຸ້ມຄອງສັດລ້ຽງປະເພດ (ຄວາຍ, ງົວ, ໝູ ແລະ ແບ້), ຄຸ້ມຄອງຄວາມເປັນລະບຽບຮຽບຮ້ອຍ ແລະ ປະດັບປະດາ ຕາມເສັ້ນທາງ ໃນເທສະບານເມືອງທີ່ກໍ່ສ້າງສຳເລັດແລ້ວ ເຊັ່ນ: ປ້າຍ, ຕົ້ນໄມ້ປະດັບ, ດອກໄມ້, ການເຊົ່າສະຖານທີ່ເຂດສາທາລະນະຕ່າງໆຊົ່ວຄາວ ແລະ ປະຕິບັດໜ້າທີ່ອື່ນໆຕາມສິດ-ພາລະບົດບາດທີ່ກົດໝາຍກຳນົດ.
ທ່ານ ບົວລີ ສຸຂະວົງ ຮອງຫົວໜ້າພະແນກ ຍທຂ ແຂວງ ໃຫ້ຮູ້ວ່າ: ໃນໄລຍະຜ່ານມາ, ໄດ້ເອົາໃຈໃສ່ຄຸ້ມຄອງວຽກງານການປຸກສ້າງ ດ້ວຍການໂຄສະນາເຜີຍແຜ່ກົດໝາຍ ແລະ ນິຕິກໍາໃຕ້ກົດໝາຍໃຫ້ປະຊາຊົນ, ບໍລິສັດ-ລັດວິສາຫະກິດ ມີຄວາມຮັບຮູ້-ເຂົ້າໃຈຢ່າງຈະແຈ້ງ ແລະ ຈັດຕັ້ງປະຕິບັດ ເພື່ອແນໃສ່ເຮັດໃຫ້ຕົວເມືອງລະມາມ ຊຶ່ງເປັນເມືອງເທສະບານແຂວງເຊກອງ ມີຄວາມເປັນລະບຽບ ແລະ ສວຍງາມ ຕາມຄຳຂວັນ 4 ສໍ ຄື: ສ. ສະອາດ, ສ. ສີຂຽວ, ສ. ສະຫງົບ, ສ. ສີວິໄລ.
(ຂ່າວ: ອັດສະວິນ)
ຄໍາເຫັນ