ເຊກອງ ເຂັ້ມງວດຄຸ້ມຄອງ-ກວດກາລາຄາສິນຄ້າ ຫຼັງມີການປັບຂຶ້ນລາຄານໍ້າມັນເຊື້ອໄຟ

ທ່ານ ນາງ ວິລະຄອນ ບັນທະເວີ ກ່າວວ່າ: ການລົງກວດກາຄັ້ງນີ້, ກໍເພື່ອເປັນການປົກປ້ອງຄຸ້ມຄອງລາຄາສິນຄ້າທີ່ນອນໃນບັນຊີຄວບຄຸມ ແລະ ສິນຄ້າທີ່ມີຜົນກະທົບໄວຕໍ່ຊີວິດການເປັນຢູ່ ຂອງປະຊາຊົນບັນດາເຜົ່າ, ເຮັດໃຫ້ການຊື້-ຂາຍສິນຄ້າໃນທ້ອງຕະຫຼາດມີຄວາມສະຫງົບ, ຮັກສາສະຖຽນລະພາບທາງດ້ານລາຄາ ແລະ ສິ່ງສໍາຄັນ ແມ່ນເປັນການປົກປ້ອງຜົນປະໂຫຍດຂອງຜູ້ຊົມໃຊ້, ຫຼີກເວັ້ນການສວຍໂອກາດຂຶ້ນລາຄາສິນຄ້າທີ່ບໍ່ສົມເຫດສົມຜົນ ໃນຊ່ວງໄລຍະທີ່ມີການເໜັງຕີງຂອງລາຄານໍ້າມັນເຊື້ອໄຟ ທີ່ເກີດຈາກສະພາບຄວາມບໍ່ສະຫງົບຢູ່ພາກພື້ນຕາເວັນອອກກາງ.

ຜ່ານການຕິດຕາມ, ກວດກາຕົວຈິງເຫັນໄດ້ວ່າ: ບັນດາສິນຄ້າຄວບຄຸມຖືວ່າຢູ່ໃນລາຄາປົກກະຕິ, ພໍ່ຄ້າ-ແມ່ຄ້າໄດ້ປະຕິບັດຖືກຕ້ອງຕາມລະບຽບກົດໝາຍ ແລະ ສິນຄ້າປະເພດພືດຜັກ ໂດຍສະເພາະ ສິນຄ້າທີ່ຜະລິດໄດ້ຕາມລະດູການ ດ້ານລາຄາແມ່ນມີທ່າອ່ຽງຫຼຸດລົງ, ສ່ວນສິນຄ້າທີ່ບໍ່ສາມາດຜະລິດໄດ້ ແມ່ນມີການປັບເພີ່ມຂຶ້ນເລັກນ້ອຍ ຫຼື ບວກ-ລົບຢູ່ໃນລະດັບ 5%. ຄາດວ່າໃນຕໍ່ໜ້າ ອາດຈະມີຜົນກະທົບເຮັດໃຫ້ລາຄາສິນຄ້າບາງປະເພດເພີ່ມຂຶ້ນ, ແຕ່ທາງພາກລັດ ກໍຄື ຂະແໜງອຸດສາຫະກໍາ ແລະ ການຄ້າຈະເອົາໃຈໃສ່ຄວບຄຸມໃຫ້ຢູ່ໃນກົນໄກຕະຫຼາດ.

(ຂ່າວ: ສັນຍາ, ພາບ: ພະແນກ ອຄ ແຂວງ)