ເຈົ້າແຂວງເຊກອງຫົວໜ້າຄະນະຊີ້ນໍາການສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ V ຂັ້ນແຂວງ, ມີຂະແໜງການກ່ຽວຂ້ອງອ້ອມຂ້າງແຂວງເຂົ້າຮ່ວມ.
ໃນກອງປະຊຸມ, ໄດ້ຮັບຟັງການລາຍງານກ່ຽວກັບຄວາມຄືບໜ້າໃນການກະກຽມການຈັດຕັ້ງປະຕິບັດການສໍາຫຼວດ, ແຜນດໍາເນີນງານການສໍາຫຼວດ ແລະ ການແບ່ງຄວາມຮັບຜິດຊອບຂອງຄະນະຊີ້ນໍາຂັ້ນແຂວງ ແລະ ຂັ້ນເມືອງ; ແຜນຈັດຕັ້ງປະຕິບັດການສໍາຫຼວດ, ເນື້ອໃນແບບສອບຖາມ ຂອງການສາຫຼວດ; ແຜນການສໍາຫຼວດ ແລະ ແຜນໂຄສະນາເຜີຍແຜ່ ກ່ຽວກັບການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ຈາກຄະນະຊີ້ນໍາຂັ້ນແຂວງ. ຈາກນັ້ນ, ກໍໄດ້ຮັບຟັງການປະກອບຄໍາເຫັນ ແລະ ແລກປ່ຽນບົດຮຽນໃນບາງບັນຫາທີ່ເຫັນວ່າ ຍັງບໍ່ທັນຈະແຈ້ງ, ຍັງບໍ່ທັນລະອຽດ ເພື່ອເຮັດໃຫ້ການຈັດຕັ້ງປະຕິບັດການສໍາຫຼວດຄັ້ງນີ້ ໄດ້ຮັບຜົນສໍາເລັດ ແລະ ມີຄຸນນະພາບ.
ທ່ານ ເຫຼັກໄຫຼ ສີວິໄລ ໄດ້ກ່າວວ່າ: ກອງປະຊຸມຄັ້ງນີ້, ແມ່ນເປັນການກະກຽມຄວາມພ້ອມຮອບດ້ານໃຫ້ແກ່ການສໍາຫຼວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ຂອງແຂວງເຊກອງ ໃຫ້ສາມາດດໍາເນີນໄປຕາມແຜນການ ແລະ ໄດ້ຮັບໝາກຜົນສູງສຸດ. ສະນັ້ນ, ຄະນະຊີ້ນໍາຂັ້ນແຂວງ, ຂັ້ນເມືອງ ແລະ ຂະແໜງການກ່ຽວຂ້ອງ ຕ້ອງຖືສໍາຄັນວຽກງານສໍາຫຼວດພົນລະເມືອງ ແລະທີ່ຢູ່ອາໄສ ເປັນວຽກບູລິມະສິດ, ເປັນພັນທະໜ້າທີ່ ແລະ ຕິດຕາມຊຸກຍູ້ວຽກງານດັ່ງກ່າວເປັນປະຈໍາ ເພື່ອເຮັດໃຫ້ການສໍາຫຼວດໄດ້ຮັບຂໍ້ມູນທີ່ມີຄຸນນະພາບ ຮັບໃຊ້ເຂົ້າໃນວຽກງານຕ່າງໆ, ໃຫ້ແຕ່ລະພາກສ່ວນກະກຽມຄວາມພ້ອມ ຮັບປະກັນການດໍາເນີນການສໍາຫຼວດໃຫ້ໄດ້ຈັດຕັ້ງປະຕິບັດຕາມແຜນການ; ຄະນະຊີ້ນໍາຂັ້ນແຂວງ-ເມືອງ ຕ້ອງໄດ້ເອົາໃຈໃສ່ໃກ້ຊິດຕິດແທດ ແລະ ປະຈໍາການປົກກະຕິ ເພື່ອລາຍງານຜົນການສໍາຫຼວດແຕ່ລະໄລຍະ, ກະກຽມງົບປະມານຮັບໃຊ້, ອຸປະກອນຮັບໃຊ້ທີ່ຈໍາເປັນໃນການເດີນສໍາຫຼວດ; ສ່ວນຄະນະຮັບຜິດຊອບຂັ້ນບ້ານ ຕ້ອງມີສ່ວນຮ່ວມໃນການສະໜອງຂໍ້ມູນໃຫ້ລະອຽດຊັດເຈນ ແລະ ອັນສໍາຄັນ ຂະແໜງການກ່ຽວຂ້ອງຂັ້ນແຂວງ, ຂັ້ນເມືອງ ຕ້ອງໄດ້ສຸມໃສ່ວຽກງານໂຄສະນາເຜີຍແຜ່, ປຸກລະດົມທົ່ວປວງຊົນເຂົ້າຮ່ວມການສໍາຫຼວດ ເພື່ອຮັບປະກັນໃຫ້ການຈັດຕັ້ງປະຕິບັດການສໍາຫຼວດພົນລະເມືອງ ແລະ ທີ່ຢູ່ອາໄສ ທົ່ວປະເທດຄັງທີ V ປີ 2025 ໂດຍສະເພາະຢູ່ແຂວງເຊກອງ ໃຫ້ບັນລຸຕາມຄາດໝາຍທີ່ວາງໄວ້.
(ຂ່າວ:ພຸດທະສອນ)
ຄໍາເຫັນ