 |
ທ່ານ ນາງ ວິລະຄອນ ບັນທະເວີ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງເຊກອງ ກ່າວວ່າ: ການລົງກວດກາໃນຄັ້ງນີ້, ແມ່ນອີງໃສຫາງສຽງຂອງສັງຄົມ ທີ່ສ່ອງແສງເຂົ້າມາຫາພະແນກອຸດສາຫະກໍາ ແລະ ການຄ້າແຂວງ. ຜ່ານການຕິດຕາມກວດກາຕົວຈິງ ພົບເຫັນປະຊາຊົນນໍາເອົານໍ້າມັນເຊືິອໄຟຮ່າຍໃສ່ແກ້ວ-ຕຸກນໍ້າດື່ມ ມາຈໍາໜ່າຍທັງໝົດ 24 ຫົວໜ່ວຍ. ໃນນີ້, ຢູ່ເມືອງລະມາມ 9 ຫົວໜ່ວຍ ແລະ ຢູ່ເມືອງທ່າແຕງ 15 ຫົວໜ່ວຍ ຊຶ່ງການກະທຳດັ່ງກ່າວ ເປັນການລະເມີດດຳລັດວ່າດ້ວຍທຸລະກິດນໍ້າມັນເຊື້ອໄຟ ສະບັບເລກທີ 559/ລບ, ລົງວັນທີ 9 ກັນຍາ 2025. ຍ້ອນແນວນັ້ນ, ຄະນະກໍາມະການທີ່ເຄື່ອນໄຫວກວດກາຄັ້ງນີ້, ຈິ່ງໄດ້ສ້າງບົດບັນທຶກກ່າວເຕືອນ, ສຶກສາອົບຮົມ ແລະ ໃນຕໍ່ໜ້າ ຖ້າຫາກພວກກ່ຽວຍັງສືບຕໍ່ເຮັດແບບເກົ່າອີກ ກໍຈະໄດ້ປັບໃໝ່ ເປັນຈໍານວນເງິນ 45 ລ້ານກີບ ຕາມກົດໝາຍກໍານົດ.
 |
ທ່ານ ນາງ ວິລະຄອນ ບັນທະເວີ ໃຫ້ຮູ້ຕື່ມວ່າ: ຕະຫຼອດໄລຍະ 20 ກວ່າວັນຜ່ານມາ, ທີ່ແຂວງເຊກອງ ໄດ້ຮັບຜົນກະທົບຈາກສະພາບບໍ່ຄ່ອງຕົວຂອງນໍ້າເຊື່ອໄຟ ທີ່ເກີດຈາກສະພາບຄວາມບໍ່ສະຫງົບຢູ່ພາກພື້ນຕະເວັນອອກກາງ. ແຕ່ອົງການປົກຄອງແຂວງ ກໍຄື ຂະແໜງອຸດສາຫະກໍາ ແລະ ການຄ້າແຂວງ ໄດ້ປະສານສົມທົບກັບຂະແໜງກ່ຽວຂ້ອງຂັ້ນສູນກາງ ແລະ ປໍ້າຕົວແທນຈໍາໜ່າຍນໍ້າມັນເຊື້ອໄຟທົ່ວແຂວງ ເພື່ອສະຫຼັບສັບປ່ຽນກັນຈໍາໜ່າຍນໍ້າມັນເຊືິ້ອໄຟໃຫ້ປະຊາຊົນໄດ້ຊົມໃຊ້ໃນແຕ່ລະວັນ. ແຕ່ໃນປັດຈຸບັນ, ມີປະຊາຊົນຈໍານວນໜຶ່ງສວຍໂອກາດກັກຕຸນນໍ້າມັນ ເພຶ່ອນໍາໄປຂາຍຕໍ່ເກນກຳໄລ ເຮັດໃຫ້ປະຊາຊົນຫຼາຍຄົນພົບຄວາມຫຍຸ້ງຍາກຂຶ້ນຕື່ມອີກ. ສະນັ້ນ, ເພື່ອແກ້ໄຂບັນຫາດັ່ງກ່າວ ບໍ່ໃຫ້ເກີດຂຶ້ນອີກ ຈຶ່ງຫ້າມບໍ່ໃຫ້ປໍ້າຕົວແທນຈຳໜ່າຍນໍ້າມັນເຊື້ອໄຟບີບຂາຍໃສ່ຕຸກອີກ ໃຫ້ຂາຍແຕ່ໃສ່ລົດເທົ່ານັ້ນ. ພ້ອມນີ້, ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນ ຈົ່ງຊ່ວຍເຫຼືອເຊິ່ງກັນ ແລະ ກັນໃນຍາມລຳບາກ, ຮູ້ເສຍສະຫລະ ເພຶ່ອພ້ອມກັນຜ່ານຜ່າຄວາມຫຍຸ້ງຍາກ ແລະ ການຈໍາໜ່າຍນໍ້າມັນເຊື້ອໄຟບໍ່ຜ່ານປໍ້າ-ບໍ່ຜ່ານຫົວຈ່າຍ, ນອກຈາກຈະຜິດລະບຽບກົດໝາຍແລ້ວ ຍັງມີຄວາມສ່ຽງຕໍ່ການເກີດອັກຄີໄຟນຳອີກ.
(ຂໍ້ມູນ: ພະແນກອຸດສາຫະກຳ ແລະ ການຄ້າແຂວງເຊກອງ)
ຄໍາເຫັນ