 |
ທ່ານ ຕຸລາວັນ ວົງໄຊເລຂາຄະນະບໍລິຫານງານພັກເມືອງລະມາມ ໄດ້ກ່າວວ່າ: ປາ ແລະ ສັດນໍ້າ ແມ່ນຊັບພະຍາກອນທໍາມະຊາດ ທີ່ມີຄວາມສໍາຄັນຕໍ່ມະນຸດ ເພາະມັນໄດ້ຕິດພັນກັບການດໍາລົງຊີວິດຂອງພວກເຮົາມາແຕ່ດົນນານ, ຊຶ່ງໃນສະໄໝກ່ອນສະພາບທໍາມະຊາດຍັງຄົງມີຄວາມອຸດົມສົມບູນ, ປາ ແລະ ສັດນໍ້າ ໄດ້ມີຢ່າງຫຼວງຫຼາຍ. ປັດຈຸບັນ ປາ ແລະ ສັດນໍ້າ ແມ່ນມີຈໍານວນໜ້ອຍລົງ ກໍຍ້ອນວ່າຄວາມຕ້ອງການໃນການບໍລິໂພກຂອງສັງຄົມເພີ່ມສູງຂຶ້ນ, ພ້ອມນີ້ ກໍຍັງມີການຈັບປາ ເພື່ອຂາຍເປັນສິນຄ້າ ໂດຍໃຊ້ອຸປະກອນທີ່ທັນສະໄໝ ແລະ ຜິດຕໍ່ລະບຽບກົດໝາຍ ອັນໄດ້ເຮັດໃຫ້ປາ ແລະ ສັດນໍ້າ ບໍມີໂອກາດທີ່ຈະແຜ່ພັນ ແລະ ຂະຫຍາຍຕົວ. ສະນັ້ນ, ການຈັດພິທີໃນຄັ້ງນີ້ ແມ່ນເປັນການໂຄສະນາ, ປຸກລະດົມ, ປູກຈິດສໍານຶກ ໃຫ້ທົ່ວສັງຄົມມີຄວາມຮັບຮູ້, ເຂົ້າໃຈ ແລະ ປະກອບສ່ວນປ່ອຍປາຄືນສູ່ທໍາມະຊາດໃຫ້ເປັນຂະບວນການກວ້າງຂວາງ. ສິ່ງສໍາຄັນ ພາຍຫຼັງທີ່ປ່ອຍແລ້ວ ແມ່ນໃຫ້ມີການປົກປັກຮັກສາ ແລະ ຄຸ້ມຄອງ ເພື່ອໃຫ້ປາມີການຈະເລີນເຕີບໂຕ ເຮັດໃຫ້ຊັບພະຍາກອນ ປາ ແລະ ສັດນໍ້າ ໄດ້ມີຄວາມຍືນຍົງ, ກັບມາອຸດົມສົມບູນ, ສະໜອງການບໍລິໂພກໄດ້ຢ່າງພຽງພໍ.
 |
ທ່ານ ສຸພົນ ໄຊສະຫງ່າ ຫົວໜ້າພະແນກກະສິກໍາ ແລະ ປ່າໄມ້ແຂວງໄດ້ໃຫ້ຮູ້ວ່າ: ໃນໄລຍະຜ່ານມາ, ແຂວງເຊກອງ ກໍຄື ພະແນກກະສິກໍາ ແລະ ປ່າໄມ້ແຂວງ ໄດ້ຖືເອົາວຽກງານຄຸ້ມຄອງປາ ແລະ ສັດນໍ້າ ເປັນວຽກໜຶ່ງທີ່ສໍາຄັນ ໂດຍໄດ້ແບ່ງຄວາມຮັບຜິດຊອບໃຫ້ອໍານາດການປົກຄອງແຕ່ລະຂັ້ນ, ກໍານົດເຂດການຄຸ້ມຄອງວັງສະຫງວນຕາມນໍ້າເຊກອງ ແລະ ສາຂາຕ່າງໆທັງໝົດ 49 ວັງ, ມີເນື້ອທີ່ 207 ເຮັກຕາ. ພ້ອມນີ້, ກໍໄດ້ເຄື່ອນໄຫວໂຄສະນາເຜີຍແຜ່ກົດໝາຍ ວ່າດ້ວຍການປະມົງ ແລະ ຈັດພິທີສະຫຼອງວັນປ່ອຍປາ ແລະ ສັດນໍ້າແຫ່ງຊາດ ເພື່ອເປັນການໂຄສະນາປູກຈິດສໍານຶກໃຫ້ສັງຄົມມີສ່ວນຮ່ວມໃນປົກປັກຮັກສາຄຸ້ມຄອງປາ ແລະ ສັດນໍ້າໃນແຕ່ລະປີ. ເຊິ່ງເລີ່ມແຕ່ປີ 1997 ເປັນຕົ້ນມາ ທົ່ວແຂວງສາມາດປ່ອຍປາຄືນສູ່ທໍາມະຊາດໄດ້ 9,221,840 ໂຕ ແລະ ສະເພາະປີ 2025 ຈະປ່ອຍໃຫ້ໄດ້ 2,039,230 ໂຕ.
(ຂ່າວ: ສັນຍາ)
ຄໍາເຫັນ