 |
ທ່ານ ຄຳຫຼ້າ ຫຼວງແສງເພັດ ຫົວໜ້າຄະນະຄຸ້ມຄອງດ່ານສາກົນ ຂົວມິດຕະພາບແຫ່ງທີ 5 ແຂວງບໍລິຄຳໄຊ-ບຶງການ ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ຂົວມິດຕະພາບລາວ-ໄທແຫ່ງທີ 5 ແຂວງບໍລິຄຳໄຊ-ບຶງການ ໄດ້ເປີດຢ່າງເປັນທາງການໃນວັນທີ 25 ທັນວາ 2025 ແລະ ໄດ້ເປີດບໍລິການໃຫ້ປະຊາຊົນໄປມາຫາສູ່, ຂົນສົ່ງເປັນທາງການໃນວັນທີິ 27 ທັນວາ 2025. ຜ່ານການເປີດບໍລິການໃນໄລຍະ 2 ເດືອນຜ່ານມາຮອດປັດຈຸ ບັນເຫັນວ່າຫຼາຍຢ່າງມີຄວາມສະດວກສະບາຍຂຶ້ນ ໂດຍສະເພາະແມ່ນການຂົນສົ່ງ, ການໄປມາຫາສູ່ລະຫວ່າງ ປະຊາຊົນສອງຊາດ ມີຫຼາຍດ້ານໄດ້ເພີ່ມຂຶ້ນ ໂດຍສະເພາະວຽກງານຈັດເກັບລາຍຮັບເຂົ້າງົບປະມານທີ່ເກີດຂຶ້ນພາຍໃນດ່ານ ເປັນຕົ້ນວຽກງານພາສີ ຊຶ່ງໃນປີ 2026 ຂັ້ນເທິງໄດ້ກຳນົດແຜນຈັດເກັບລາຍຮັບແມ່ນ 350 ຕື້ກີບ. ຜ່ານການຈັດເກັບລາຍຮັບໃນໄລຍະ 1 ເດືອນປີ 2026 ນີ້, ສາມາດຈັດເກັບລາຍຮັບໄດ້ 47.5 ຕື້ກວ່າກີບ. ສຳລັບສິນຄ້າຫຼັກທີ່ມາຜ່ານດ່ານແຫ່ງນີ້: ມີນ້ຳມັນເຊື້ອໄຟ, ເຄື່ອງອຸປະໂພກ-ບໍລິໂພກ ແລະ ເຄື່ອງໄຟຟ້າ, ວັດສະດຸອຸປະກອນການກໍ່ສ້າງທົ່ວໄປ.
 |
ໃນໄລຍະ 1 ເດືອນຜ່ານມາ, ການເຂົ້າ-ອອກເມືອງຢູ່ດ່ານສາກົນແຫ່ງນີ້ມີພົນລະເມືອງລາວ ແລະ ຊາວຕ່າງປະເທດ ທີ່ເດີນທາງເຂົ້າມາ ສປປ ລາວ ມີປະມານ 6,800 ກວ່າເທື່ອຄົນ ແລະ ເດີນທາງອອກປະມານ 7,500 ກວ່າເທື່ອຄົນ. ນອກຈາກນີ້, ຍັງມີວຽກງານອື່ນໆ ທີ່ຕິດພັນກັບການໃຫ້ບໍລິການທີ່ເກີດຂຶ້ນຢູ່ດ່ານສາກົນແຫ່ງທີ 5 ກໍມີທ່າອ່ຽງເພີ່ມຂຶ້ນຫຼາຍດ້ານ ຍ້ອນມີຄວາມສະດວກສະບາຍໃນການໄປມາຫາສູ່ຂອງປະຊາຊົນທັງສອງຊາດ ຕະຫຼອດຮອດການຂົນສົ່ງໂດຍສານ, ສິນຄ້າ ແລະ ການໃຫ້ບໍລິການທີ່ວ່ອງໄວ, ສະຖານທີ່ໃຫ້ການບໍລິການກວ້າງຂວາງ ອຳນວຍຄວາມສະດວກໃຫ້ການບໍລິການ ຊຶ່ງເປັນທ່າແຮງໜຶ່ງປະກອບສ່ວນ ໂດຍສະເພາະແມ່ນການ ຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນການທີ່ກຳນົດໄວ້.
 |
ທ່ານ ຄຳຫຼ້າ ຫຼວງແສງເພັດ ກ່າວຕື່ມວ່າ: ຄຽງຄູ່ກັບຂໍ້ສະດວກ, ພວກເຮົາຍັງພົບຄວາມທ້າທາຍບາງດ້ານ ໂດຍສະເພາະແມ່ນດ່ານສາກົນແຫ່ງທີ 5 ແມ່ນຫາກໍເປີດຂຶ້ນໃໝ່ ເຮັດໃຫ້ການບໍລິການບາງອັນຍັງຫຍຸ້ງຍາກ.ສິນຄ້າທີ່ນຳໃຊ້ພາຍໃນມີທ່າອ່ຽງເພີ່ມຂຶ້ນ ແລະ ສິນຄ້າທີ່ນຳເຂົ້າແລ້ວໄປປະເທດທີ 3 ຍັງມີລັກຊະນະຄ້າຍຄືເກົ່າ. ສາເຫດຍ້ອນຖະໜົນຫົນທາງຍັງບໍ່ສາມາດຮອງຮັບ ໂດຍສະເພາະແມ່ນເສັ້ນທາງເລກ 8 ທີ່ມີການຂົນສົ່ງອອກໄປ ປະເທດຫວຽດນາມແມ່ນເປ່ເພຫຼາຍ ຍັງບໍ່ທັນສາມາດຮອງຮັບໃຫ້ການຂົນສົ່ງໄດ້ຕາມມາດຖານນ້ຳໜັກຂອງສາກົນຮອງຮັບ (11 ໂຕນ/ເພົາ). ນີ້ຄືເຫດຜົນ ເຮັດໃຫ້ຜູ້ປະກອບການບໍ່ຄ່ອຍຢາກມາ, ຖ້າມາກໍຕ້ອງມີການຄ່ຽນຖ່າຍສິນຄ້າ ເຮັດໃຫ້ພົບຄວາມຫຍຸ້ງຍາກຫຼາຍຂຶ້ນ ແລະ ບັນຫາອື່ນໆ.
ຂ່າວ: ຢ່າຕົ່ງ
ຄໍາເຫັນ