1 ປີຜ່ານມາວຽກງານ ຖວທ ເມືອງປາກລາຍມີຜົນສໍາເລັດຫຼາຍດ້ານ

ໂດຍ: ທອງສະຫວັດໄຊຍະລາດ
ໃນໄລຍະ 1 ປີຜ່ານມາ, ບັນດາສະມາຊິກພັກ, ພະນັກງານ - ລັດຖະກອນພາຍໃນຫ້ອງການ ຖະແຫຼງຂ່າວ, ວັດທະນະທຳແລະທ່ອງທ່ຽວ(ຖວທ) ແມ່ນໄດ້ເອົາໃຈໃສ່ປະຕິບັດແນວທາງ ແຜນນະໂຍບາຍ, ມະຕິ, ຄຳສັ່ງຂອງພັກ, ລະບຽບກົດໝາຍຂອງລັດໄດ້ເປັນຢ່າງດີ, ເຊິ່ງສະແດງອອກ: ມີທັດສະນະຫຼັກໝັ້ນ, ຄຸນທາດການເມືອງໜັກແໜ້ນ, ມີແນວຄິດອຸ່ນອຽນ ທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ-ລັດແລະ ເອົາໃຈໃສ່ປະຕິບັດໜ້າທີ່ວຽກງານທີ່ຖືກມອບໝາຍຈາກຂັ້ນເທີງ ກໍຄືແຜນວຽກຈຸດສຸມໃນແຕ່ລະໄລຍະຂອງວຽກງານຕົນໂດຍມີຜົນສຳເລັດເປັນຢ່າງດີ. 
ຫ້ອງການຖະແຫຼງຂ່າວ, ວັດທະນະທຳແລະທ່ອງທ່ຽວປະກອບມີ 4 ໜ່ວຍງານທີ່ຂຶ້ນກັບ, ມີພະນັກງານທັງໝົດ 13ທ່ານ, ຍິງ 5 ທ່ານ,ມີຊັ້ນປະລິນຍາໂທ 1 ທ່ານ, ປະລິນຍາຕີ 6ທ່ານແລະ ຊັ້ນສູງ 6 ທ່ານ, ໃນນີ້ໄປຍົກລະດັບວິຊາສະເພາະ 1 ທ່ານ, ຍິງ 1 ທ່ານ.ວຽກງານຖະແຫຼງຂ່າວ - ວິທະຍຸ ໄດ້ຕັ້ງໜ້າເຮັດໜ້າທີ່ໂຄສະນາເຜີຍແຜ່ແນວທາງນະໂຍບາຍ, ມະຕິຄຳສັ່ງຂອງພັກ ແລະ ລະບຽບກົດໝາຍຂອງລັດ, ປະຕິບັດ
ໜ້າທີ່ຕາມພາລະບົດບາດຂອງຕົນໃນການເຄື່ອນໄຫວເກັບກຳຂ່າວຢູ່ຕາມສຳນັກງານ-ຫ້ອງການ, ອົງການ, ກົມກອງ, ລັດວິສາຫະກິດ ຮາກຖານບ້ານ ແລະ ເຂດບ້ານພັດທະນາ ເຊິ່ງສະແດງອອກສາມາດລົງເກັບກຳ ແລະ ຂຽນຂ່າວ-ຜະລິດຂ່າວໄດ້ທັງໝົດ 376 ຂ່າວ ເທົ່າກັບ 156,66% ຂອງແຜນການປີ; ໃນນັ້ນ ມີບົດຂ່າວ 13 ບົດ, ສົ່ງໃຫ້ແຂວງ ແລະ ສູນກາງ 327 ຂ່າວ, ຖ່າຍທອດກອງປະຊຸມສະໄໝສາມັນເທື່ອທີ 4 ແລະ ທີ 5 ຂອງສະພາແຫ່ງຊາດຊຸດທີ IX ມີ 2 ຄັ້ງ ເທົ່າກັບ 33 ຊົ່ວໂມງ, ຖ່າຍທອດສຽງຈາກວິທະຍຸກະຈາຍສຽງແຫ່ງຊາດ 288 ຊົ່ວໂມງ, ຮັບຊຸດລະບົບຮັບສົ່ງໂທລະໂຄ່ງຈາກສູນກາງ 5 ຊຸດ ແລະ ທະນາຄານພັດທະນາລາວ 3 ຊຸດ ພ້ອມລົງຕິດຕັ້ງໃຫ້ບັນດາບ້ານເປົ້າໝາຍໄດ້ສຳເລັດ 100% ສຳເລັດການລົງກວດກາປະເມີນຄືນ ກ່ຽວກັບການສ້າງຄົນ ຄອບຄົວວັດທະນະທຳໄດ້12ບ້ານ, ມີ430ຄອບຄົວ, ກວມເອົາ 95,55 % ຂອງແຜນການປີ. ໄດ້ຮັບໃບຢັ້ງຢືນເປັນກົມກອງວັດທະນະທຳໄດ້ 7 ກົມກອງ, ອອກໃບອະນຸຍາດສືບຕໍ່ປະຈຳປີ ໃຫ້ວົງດົນຕີ ໄດ້ 15 ວົງ. ສົມທົບກັບໜ່ວຍງານທີ່ກ່ຽວຂ້ອງລົງເຮັດບົດບັນທືກກັບບັນດາທຸລະກິດທີ່ຕິດປ້າຍໂຄສະນາບໍ່ຖືກຕ້ອງຕາມລະບຽບການໄດ້ທັງໝົດ 10 ຮ້ານ, ໄດ້ຮ່ວມກັບທິມງານອາຈານສອນມະຫາວິທະຍາໄລແຫ່ງຊາດ ລົງເກັບກຳຂໍ້ມູນ ແລະ ເປີດກອງປະຊຸມການອະນຸລັກຫີນແກະສະລັກຢູ່ ບ້ານແຄໄດ້ 3 ຄັ້ງ. ສຳເລັດການລົງເກັບກຳຂໍ້ມູນເພື່ອຂື້ນທະບຽນພຣະພຸດທະຮູບ ຢູ່ໃນເທດສະບານເມືອງ 2 ວັດ, ໄດ້ອອກໃບອະນຸຍາດດໍາເນີນທຸລະກິດທີ່ສ້າງຕັ້ງໃໝ່ໃຫ້ເຮືອນພັກ6 ແຫ່ງ, ຮ້ານອາຫານ 1 ແຫ່ງ, ໃບອະນຸຍາດສືບຕໍ່ປະຈຳປີໃຫ້ເຮືອນພັກໄດ້16 ແຫ່ງ, ຮ້ານອາຫານ8ແຫ່ງ, ຮ້ານກິນດື່ມ 7 ຮ້ານແລະ ເຮັດບົດບັນທຶກກັບຜູ້ປະກອບການທຸລະກິດທ່ອງທ່ຽວ ທີ່ເປີດບໍລິການກາຍໂມງ, ສຽງດັງເນື່ອງນັນ ພ້ອມທັງເຮັດບົດບັນທຶກໄດ້7ຄັ້ງ, ມີ 23 ຮ້ານ. ໄດ້ຈັດກອງປະຊຸມຮ່ວມກັບຜູ້ປະກອບການ ເພື່ອປຶກສາຫາລື ການກະກຽມຕ້ອນຮັບເປີດປີທ່ອງທ່ຽວລາວໃນປີ 2024 ຕິດພັນກັບການດຳເນີນກອງປະຊຸມ 3 ຂັ້ນຂອງພັກເພື່ອໃຫ້ມີຄວາມສະຫງົບປອດໄພ ແລະ ເປັນລະບຽບຮອບຮ້ອຍ.ໄດ້ສົມທົບກັບຄະນະກຳມະການລົງກວດກາສວນ 36 ເພື່ອພັດທະນາເປັນແຫ່ງທ່ອງທ່ຽວ. ໄດ້ສົ່ງສະຖິຕິບັນດາເຮືອນພັກ, ຮ້ານອາຫານ, ຮ້ານກິນດື່ມ - ບັນເທິງ ແລະ ຂໍ້ມູນແຫຼ່ງທ່ອງທ່ຽວຂອງເມືອງໃຫ້ທາງພິທີກອນ ເພື່ອໂຄສະນາໃນງານບຸນຊ່ວງເຮືອ. ສຳເລັດການເຮັດໜັງສືສະເໜີຫາຂັ້ນເທິງ ເພື່ອຂໍອະນຸມັດຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຄຸ້ມຄອງວັດທະນະທໍາແລະທຸລະກິດການທ່ອງທ່ຽວຂັ້ນບ້ານ., ມີນັກທ່ອງທ່ຽວເຂົ້າມາທ່ຽວຊົມເມືອງປາກລາຍທັງໝົດ25,759ຄົນ, ຍິງ 12,598 ຄົນ, ໃນນີ້ ມີຕ່າງປະເທດ 2,378 ຄົນ, ຍິງ 1,237 ຄົນ, ກວມເອົາ 171,72 % ຂອງແຜນການປີ, ສຳເລັດການລົງຈັດເກັບລາຍຮັບຄ່າທໍານຽມແລະຄ່າບໍລິການພ້ອມທັງມອບເຂົ້າງົບປະມານໄດ້ທັງໝົດ 29,515.000 ກີບເທົ່າກັບ 108,67% ຂອງແຜນປີ, ໃນນີ້ ມີຄ່າທໍານຽມ 22,355.000 ກີບເທົ່າກັບ 111,77 %ເງິນຄ່າບໍລິການ 7,160,000 ກີບ ເທົ່າກັບ 100% ຂອງແຜນການປີ, ສໍາເລັດການປະເມີນຜົນພະນັກງານ-ລັດຖະກອນປະຈໍາປີ 2023ພ້ອມຂຶ້ນແຜນປີ 2024 ສົ່ງໃຫ້ພະແນກ ຖວທ ແຂວງ.
ສະເພາະທິດທາງແຜນການ ປີ 2024ສືບຕໍ່ເອົາໃໃສ່ສຶກສາອົບຮົມການເມືອງ - ແນວຄິດໃຫ້ແກ່ສະມາຊິກພັກ, ພະນັກງານ ໂດຍນຳເອົາມະຕິຄໍາສັ່ງຂອງຂັ້ນເທິງມາຈັດຕັ້ງເຜີຍແຜ່ເຊື່ອມຊືມເພື່ອເຮັດໃຫ້ພະນັກງານ-ລັດຖະກອນ ມີແນວຄິດອຸ່ນອຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ- ລັດໃນການຈັດຕັ້ງປະຕິບັດໜ້າທີ່ວຽກງານດ້ວຍຄວາມຮັບຜິດຊອບສູງ ມີຄວາມຫ້າວຫັນໃນການຈັດຕັ້ງປະຕິບັດຕໍ່ວຽກງານວິຊາສະເພາະທີ່ຖືກມອບໝາຍໃຫ້ມີຜົນສຳເລັດ.ຂ່າວ: ທອງສະຫວັດ ໄຊຍະລາດ