 |
ທ່ານ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວວ່າ: ພະຍາດຕິດຕໍ່ ເປັນໄພຂົ່ມຂູ່ຕໍ່ປະຊາຊົນບັນດາເຜົ່າ, ໃນແຕ່ລະປີມີຜູ້ເສຍຊີວິດຈໍານວນຫຼາຍ, ກະຊວງສາທາລະນະສຸກ ໄດ້ມີນະໂຍບາຍສະໜອງການບໍລິການໃຫ້ເຂົ້າເຖິງທຸກກຸ່ມສ່ຽງ ໂດຍເນັ້ນໃສ່ການລົງຊອກຄົ້ນຜູ້ທີ່ສົງໄສເປັນພະຍາດບົ່ງມະຕິໄວ ແລະ ເຂົ້າເຖິງການປິ່ນປົວໂດຍໄວ ເພື່ອຕັດຕ່ອງໂສ້ການຕິດແປດ. ນອກນັ້ນ, ການເຮັດວຽກຮ່ວມກັບຫຼາຍຂະແໜງການ ມີຄວາມສໍາຄັນຕໍ່ການຄວບຄຸມພະຍາດຕິດຕໍ່ຫຼາຍ ຊຶ່ງໃນປີ 2015 ຜ່ານມາ, ສູນກໍໄດ້ມີການປະສານງານ ປຶກສາຫາລື ແລະ ໄດ້ຮັບການຮ່ວມມືເປັນຢ່າງດີກັບກົມເສນາຮັກ ກະຊວງ ປກສ ແລະ ໄດ້ໃຫ້ໂອກາດສູນພວກເຮົາໄດ້ລົງໄປຊອກຄົ້ນຜູ້ທີ່ສົງໄສເປັນພະຍາດວັນນະໂລກກັບທີ່ໃນ 12 ແຂວງ ແລະ 1 ນະ ຄອນຫຼວງ ກວມເອົາ 15 ຈຸດຄ້າຍຄຸມຂັງ-ດັດສ້າງ ແລະ ຜົນໄດ້ຮັບແມ່ນໄດ້ຂຶ້ນທະບຽນປິ່ນປົວທັງໜົດ 174 ກໍລະນີ ແລະ ມີວັນນະໂລກຕ້ານຕໍ່ຢາ 1 ກໍລະນີ ຖືວ່າເປັນຕົວເລກທີ່ສູງສົມຄວນ.
ຄຽງຄູ່ກັນນັ້ນ, ໄລຍະຜ່ານມາ, ຍັງມີການປະສານງານກັນລະຫວ່າງ 2 ກະຊວງມີຜົນສໍາເລັດລະດັບໜຶ່ງ; ສະນັ້ນ, ເພື່ອເຮັດໃຫ້ການຮ່ວມມືໃນການຄວບຄຸມພະຍາດຕິດຕໍ່ມີຜົນສໍາເລັດ ແລະ ມີປະສິດທິພາບສູງຂຶ້ນ ຈຶ່ງໄດ້ຈັດຕັ້ງພິທີລົງນາມເຊັນບົດບັນທຶກຄວາມເຂົ້າໃຈຮ່ວມກັນ, ໃຫ້ກຽດລົງນາມໂດຍທ່ານ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ທ່ານ ພັອ ພອນສະຫວັນ ວົງຄຳຈັນ ຫົວໜ້າກົມເສນາຮັກ ກົມໃຫຍ່ພະລາທິການ ແລະ ທ່ານ ພັອ ສົມໄຊ ແສງຄຳຢອງ ຮອງຫົວໜ້າກົມຕຳຫຼວດຄຸມຂັງ-ດັດສ້າງ ກະຊວງ ປກສ.
ຂ່າວ: ລັດດາວັນ
ຄໍາເຫັນ