ສະຫາຍ ພັອ ພຽນສີ ແສງຄໍາຢອງ ຄະນະພັກກົມໃຫຍ່ການເມືອງ ຫົວໜ້າກົມພັກ ໄດ້ລາຍງານວ່າ: ຄະນະພັກ-ຄະນະນໍາກະຊວງ, ຄະນະພັກ-ຄະນະບັນຊາແຕ່ລະຂັ້ນໄດ້ຖືສໍາຄັນ ແລະ ເປັນຄວາມຮັບຜິດຊອບໂດຍກົງຕໍ່ການດໍາເນີນການຄັດເລືອກໜ່ວຍພັກປອດໃສ ເຂັ້ມແຂງ ໜັກແໜ້ນ ໂດຍໄດ້ນໍາພາສ້າງແຜນການ, ຄາດ ໝາຍສູ້ຊົນ ແລະ ກຳນົດຂໍ້ແຂ່ງຂັນໃນແຕ່ລະປີ; ໄດ້ນໍາພາສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ນາຍ ແລະ ພົນຕຳຫຼວດປົກກະຕິຕໍ່ເນື່ອງ; ການດໍາເນີນຊີວິດການເມືອງ ຄັດເລືອກໜ່ວຍພັກປອດໃສ ເຂັ້ມ ແຂງໜັກແໜ້ນ ປະຈຳປີໄດ້ດໍາເນີນຕາມບາດກ້າວ, ຂັ້ນຕອນ ນິຕິກຳທີ່ຂັ້ນເທິງວາງອອກ ໂດຍມີການຕິດຕາມຊຸກຍູ້, ກວດກາປະເມີນຜົນ; ໃນປີນີ້ໄດ້ດໍາເນີນຄຽງຄູ່ກັບການຈັດຕັ້ງດໍາເນີນກອງປະຊຸມໃຫຍ່ຂັ້ນຮາກຖານພັກ, ຄະນະພັກແຕ່ລະຂັ້ນໄດ້ສະຫຼຸບຕີລາຄາການນໍາພາລວມ, ດ້ານດີ, ດ້ານອ່ອນຂໍ້ຄົງຄ້າງ ແລະ ສໍາຫຼວດກວດກາບຸກຄົນໃນຄະນະພັກ, ສະມາຊິກພັກ ຕະຫຼອດໄລຍະໜຶ່ງສະໄໝຜ່ານມາ, ຜ່ານການຈັດຕັ້ງດໍາເນີນຕົວຈິງເຫັນວ່າມີການຫັນປ່ຽນຢ່າງຕັ້ງໜ້າ ແລະ ແຂງແຮງ.
ຜ່ານການຕີລາຄາແບ່ງປະເພດຮາກຖານພັກ: ປີ 2024 ທົ່ວອົງຄະນະພັກກະຊວງ ປກສ ມີ 14 ອົງຄະນະພັກ, 3 ຄະນະພັກຮາກຖານຂຶ້ນກັບ, ມີຮາກຖານພັກລວມທັງໝົດ 373 ຮາກຖານ, ໃນນັ້ນ, ມີຄະນະພັກຮາກຖານ 27 ຮາກຖານ, ໜ່ວຍພັກຮາກຖານ 187 ຮາກຖານ, ໜ່ວຍພັກຂຶ້ນກັບຄະນະພັກຮາກຖານ 159 ໜ່ວຍ, ໄດ້ແບ່ງປະເພດ 287 ໜ່ວຍ, ບໍ່ໄດ້ແບ່ງປະເພດ 59 ໜ່ວຍ (ສ້າງໃໝ່). ໃນນີ້, ໄດ້ໜ່ວຍພັກປອດໃສ ເຂັ້ມແຂງ ໜັກແໜ້ນປະຈຳປີ 2024 ຈຳນວນ 217 ໜ່ວຍ ທຽບໃສ່ປີ 2023 ເພີ່ມຂຶ້ນ 5 ໜ່ວຍ; ໜ່ວຍພັກກາງ 70 ໜ່ວຍ ກວມ 24.39%. ມີໜ່ວຍພັກທີ່ໄດ້ຮັບນາມມະຍົດ ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ 6 ປີຕິດຕໍ່ກັນມີ 69 ໜ່ວຍ, 5 ປີຕິດຕໍ່ກັນ 14 ໜ່ວຍ, 4 ປີຕິດຕໍ່ກັນມີ 18 ໜ່ວຍ, 3 ປີຕິດຕໍ່ກັນມີ 34 ໜ່ວຍ, 2 ປີຕິດຕໍ່ກັນ 27 ໜ່ວຍ ແລະ ສະເໜີຮັບຮອງໃໝ່ມີ 55 ໜ່ວຍພັກ.
ໃນພິທີໄດ້ມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນປະຈຳປີ 2024 ໃຫ້ຕາງໜ້າ 217 ໜ່ວຍພັກອ້ອມຂ້າງກະຊວງ ໃຫ້ກຽດມອບໂດຍສະຫາຍ ພົທ ກົງທອງ ພົງວິຈິດ ພ້ອມດຽວກັນ, ຄະນະພັກ 17 ກົມກອງທີ່ຂຶ້ນກັບກະຊວງໄດ້ຂຶ້ນຈັບມືແຂ່ງຂັນ ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປີຕໍ່ໄປ.
ຂ່າວ-ພາບ: ບຸນພະຈັນ
ຄໍາເຫັນ