 |
ໂດຍເຫັນໄດ້ຄວາມສຳຄັນດັ່ງກ່າວ, ລັດຖະບານຈຶ່ງໄດ້ອອກດຳລັດສະບັບເລກທີ 174/ນຍ, ລົງວັນທີ 5 ສິງຫາ 1998 ເພື່ອປະຕິບັດພາລະບົດບາດ ແລະ ໜ້າທີ່ໃນການກວດສອບການຄຸ້ມຄອງ, ນໍາໃຊ້ງົບປະມານ, ການເງິນ-ເງິນຕາ ແລະ ຊັບສິນແຫ່ງລັດຂອງອົງການຈັດຕັ້ງການເມືອງ-ສັງຄົມ, ອົງການຈັດຕັ້ງມະຫາຊົນ, ອົງການຈັດຕັ້ງອື່ນໆທີ່ຄຸ້ມຄອງ ແລະ ນໍາໃຊ້ງົບປະມານ, ການເງິນ ແລະ ຊັບສິນຂອງລັດ; ທະນາຄານແຫ່ງ ສປປ ລາວ, ບໍລິສັດມະຫາຊົນ, ວິສາຫະກິດທີ່ຮັບເໝົາກໍ່ສ້າງໂຄງການລົງທຶນຂອງລັດ ແລະ ວິສາຫະກິດກວດສອບ; ທະນາຄານທຸລະກິດ, ສະຖາບັນການເງິນ ແລະ ບໍລິສັດລັດລົງທຶນ; ໂຄງການລົງທຶນຂອງລັດ, ທຶນກູ້ຢືມ, ທຶນສົມທົບແລະທຶນຊ່ວຍເຫຼືອຈາກພາຍໃນ ແລະ ຕ່າງປະເທດ; ເປົ້າໝາຍ ຫຼື ໂຄງການທີ່ລັດເປັນຜູ້ຄໍ້າປະກັນໃຫ້ມີຄວາມໂປ່ງໃສ, ປະຢັດ, ມີປະສິດທິພາບ ແລະ ປະສິດທິຜົນສູງ.
ຜ່ານຂະບວນວິວັດແຫ່ງການສ້າງ ແລະ ປັບປຸງບູລະນະກົງຈັກເວົ້າລວມ, ເວົ້າສະເພາະການປັບປຸງອຳນາດລັດໄດ້ຢັ້ງຢືນເຖິງຄວາມຈຳເປັນພາວະວິໄສ, ເປັນເຄື່ອງມືອັນແຫຼມຄົມຂອງພັກເພື່ອໝູນໃຊ້ເຂົ້າໃນການປະຕິບັດສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ພັດທະນາສ້າງສາປະເທດຊາດ. ຕະຫຼອດໄລຍະ 27 ປີແຫ່ງການປະຕິບັດພາລະກິດປະຕິວັດໂດຍຢຶດໝັ້ນອຸດົມການຂອງພັກ ແລະ ລັດຖະບານໃນການປະຕິບັດໜ້າທີ່ອັນຫຍຸ້ງຍາກ ແລະ ມີກຽດສະຫງ່າ. ອົງການກວດສອບແຫ່ງລັດໄດ້ເປັນເຈົ້າການເຄື່ອນໄຫວ ແລະ ຈັດຕັ້ງປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ເດັດດ່ຽວປົກປ້ອງອົງການຈັດຕັ້ງຂອງລັດ ແລະ ສິດຜົນປະ ໂຫຍດທາງດ້ານເສດຖະກິດ, ການເງິນ-ເງິນຕາ ແລະ ຊັບສິນແຫ່ງລັດຂອງປະເທດ; ເອົາໃຈໃສ່ພັດທະນາ ແລະ ສ້າງຄວາມເຂັ້ມແຂງທາງດ້ານກົງຈັກການຈັດຕັ້ງ, ພັດທະນາບຸກຄະລາກອນ ແລະ ວິຊາສະເພະຢ່າງບໍ່ຢຸດຢັ້ງ. ຜົນສຳເລັດທັງໝົດນັ້ນ, ກໍບົນພື້ນຖານການນຳພາ-ຊີ້ນຳຂອງຄະນະພັກ, ຄະນະນຳອົງການກວດສອບແຫ່ງລັດຢ່າງໃກ້ຊິດໂດຍສະເພາະການຄົ້ນຄວ້າ ແລະ ວິເຄາະວິໄຈສະຖານະການ, ສະພາບການທາງດ້ານເສດຖະກິດ - ການເງິນທັງໃນສະເພາະໜ້າ ແລະ ຍາວນານຂອງພັກ-ລັດຖະບານ; ອົງການກວດສອບແຫ່ງລັດຈຶ່ງເຮັດໜ້າທີ່ເຄື່ອນໄຫວຕາມພາລະບົດບາດ, ໜ້າທີ່, ຂອບເຂດສິດຂອງຕົນແນໃສ່ຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດໂດຍຖືເອົາຫຼັກການດຳເນີນການກວດສອບ, ການຄຸ້ມຄອງ, ການນຳໃຊ້ງົບປະມານການເງິນແລະຊັບສິນຂອງລັດໃຫ້ມີຄວາມໂປ່ງໃສ, ປະຢັດ, ມີປະສິດທິພາບ, ປະສິດທິຜົນສູງແນໃສ່ເພື່ອປະກອບສ່ວນໃນການຊຸກຍູ້ການພັດທະນາເສດຖະກິດ-ສັງຄົມໃຫ້ຂະຫຍາຍຕົວແລະໝັ້ນຄົງ.
27 ປີໃນການປະຕິບັດພາລະບົດບາດແລະໜ້າທີ່ການກວດສອບໄດ້ຜ່ານຂະບວນວິວັດຫຼາຍໄລຍະໃນການປະຕິບັດໜ້າທີ່ການເມືອງຕາມພາລະບົດບາດຂອງອົງການກວດສອບແຫ່ງລັດໂດຍເລີ່ມຈາກການຮຽນຮູ້ໃນວຽກງານຕົວຈິງ, ຈາກຄວາມຮັບຮູ້ພື້ນຖານດ້ານວິຊາສະເພາະຢູ່ພາຍໃນກໍຄືການແລກປ່ຽນບົດຮຽນກັບບັນດາປະເທດເພື່ອນມິດຮ່ວມຍຸດທະສາດໃນພາກພື້ນແລະສາກົນລວມທັງຄູ່ຮ່ວມພາຄີດ້ານການກວດສອບຂອງສາກົນເຮັດໃຫ້ອົງການກວດສອບແຫ່ງລັດມີຄວາມເຕີບໃຫຍ່ເຂັ້ມແຂງທາງດ້ານການຈັດຕັ້ງແລະຄວາມອາດສາມາດທາງດ້ານວຽກງານວິຊາສະເພາະໃນການປະຕິບັດພາລະບົດບາດຂອງວຽກງານກວດສອບໄດ້ເປັນຢ່າງດີ; ພະນັກງານ-ບຸກຄະລາກອນຈຳນວນບໍ່ໜ້ອຍໄດ້ກາຍເປັນນັກກວດສອບທີ່ມີຄວາມຮູ້-ຄວາມສາມາດ, ມີຄວາມຊຳນິຊຳນານ, ກາຍເປັນນັກກວດສອບມືອາຊີບເທື່ອລະກ້າວ.
ແຕ່ປີ 2021-2025, ອົງການກວດສອບແຫ່ງລັດໄດ້ຢຶດໝັ້ນໃນຫຼັກການປະຕິບັດຕາມແນວທາງຂອງພັກ, ນະໂຍບາຍການຄຸ້ມຄອງຂອງລັດຢັ້ງຢືນໄດ້ວ່າອົງການກວດສອບແຫ່ງລັດໄດ້ສຸມໃສ່ປັບປຸງຂະແໜງການຂອງຕົນຢ່າງຮອບດ້ານໂດຍສະເພາະການຄົ້ນຄວ້າ, ສ້າງນິຕິກຳແມ່, ບັນດານິຕິກຳປິ່ນອ້ອມຮອງຮັບ, ທັງມີການປັບປຸງອັນໄດ້ເຮັດໃຫ້ວຽກງານກວດສອບແຫ່ງລັດໄດ້ຮັບການພັດທະນາຢ່າງຕໍ່ເນື່ອງ, ເຕີບໃຫຍ່ທາງດ້ານປະລິມານແລະເຂັ້ມແຂງທາງດ້ານຄຸນນະພາບ; ສາມາດສ້າງ, ປັບປຸງແລະພັດທະນານິຕິກຳປິ່ນອ້ອມຮອງຮັບ, ໄດ້ສ້າງແລະປັບປຸງນິຕິກໍາລຸ່ມກົດໝາຍໃໝ່ລວມທັງບົດບັນທຶກຊ່ວຍຈໍາວ່າດ້ວຍການຮ່ວມມືກ່ຽວກັບວຽກງານກວດສອບຈໍານວນ 27 ສະບັບບັນລຸໄດ້ 117% ຂອງແຜນການ; ໃນນັ້ນ, ອັນພົ້ນເດັ່ນແມ່ນໄດ້ຄົ້ນຄວ້າແລະນໍາສະເໜີປັບປຸງເນື້ອໃນລັດຖະທຳມະນູນທີ່ກ່ຽວຂ້ອງກັບວຽກງານກວດສອບແຫ່ງລັດສະບັບປີ 2015 ໂດຍສະເພາະແມ່ນໄດ້ເພີ່ມສິດໃຫ້ອົງການກວດສອບແຫ່ງລັດສາມາດດໍາເນີນການກວດສອບເປັນເອກະລາດຕາມກົດໝາຍເພື່ອຢັ້ງຢືນຄວາມຖືກຕ້ອງຂອງການສ້າງ, ການດັດແກ້ແຜນງົບປະມານແຫ່ງລັດ, ແຜນລາຍຮັບ, ແຜນລາຍຈ່າຍ, ແຜນການລົງທຶນແລະການຄາດເຄເນຜົນໄດ້ຮັບເລີ່ມແຕ່ຫົວທີ; ໄດ້ປັບປຸງກົດໝາຍວ່າດ້ວຍການກວດສອບແຫ່ງລັດສະບັບປີ 2022; ໃນນັ້ນ, ໄດ້ປັບປຸງ 65 ມາດຕາ, ສ້າງໃໝ່ 27 ມາດຕາຊຶ່ງໄດ້ສ້າງການຫັນປ່ຽນຢ່າງເລິກເຊິ່ງໃນການພັດທະນາວຽກງານກວດສອບແຫ່ງລັດແລະຊຸກຍູ້ການແກ້ໄຂຜົນການກວດສອບ.
ດ້ານກົງຈັກ ໄດ້ປັບປຸງຕາມທິດກະຮັດ, ສົມເຫດສົມຜົນ, ມີຄວາມໂລ່ງລ່ຽນແລະສອດຄ່ອງກັບໜ້າທີ່ການເມືອງໃນແຕ່ລະໄລຍະ, ເຄື່ອນໄຫວຢ່າງຄ່ອງຕົວ, ມີປະສິດທິພາບແລະປະສິດທິຜົນໂດຍໄດ້ໂຮມວຽກແລະສັບຊ້ອນບຸກຄະລາກອນໃຫ້ເໝາະສົມ; ໄດ້ສ້າງຕັ້ງອົງການກວດສອບປະຈຳພາກຕື່ມ 2 ແຫ່ງ (ອົງການກວດສອບປະຈໍາພາກເໜືອ 2 ແລະອົງການກວດສອບປະຈຳພາກກາງ 2); ໂຮມກົງຈັກທຽບເທົ່າກົມແລະພະແນກຈຳນວນໜຶ່ງເຂົ້າກັນ (ຈາກ 11 ກົມມາເປັນ 10 ກົມແລະຈາກ 60 ພະແນກມາເປັນ 54 ພະແນກ). ພ້ອມນັ້ນ, ກໍໄດ້ສຸມໃສ່ສ້າງນັກກວດສອບໃຫ້ມີຄວາມຊຳນິຊໍານານແລະເປັນມືອາຊີບກວມອັດຕາສ່ວນຫຼາຍຂຶ້ນ.
ດ້ານການຈັດຕັ້ງປະຕິບັດວຽກງານວິຊາສະເພາະໄດ້ດຳເນີນການກວດສອບສຳເລັດຕາມແຜນການ, ຄາດວ່າໃນທ້າຍປີ 2025 ຈະສຳເລັດການກວດສອບ 600 ເປົ້າໝາຍບັນລຸໄດ້ 100% ຂອງແຜນຄາດໝາຍສູ້ຊົ້ນ 5 ປີ (2021-2025); ໃນນັ້ນ, ອົງການຈັດຕັ້ງລັດ 260 ເປົ້າໝາຍ, ໂຄງການລົງທຶນຂອງລັດ 95 ເປົ້າໝາຍ, ໂຄງການເງິນກູ້ຢຶມແລະຊ່ວຍເຫຼືອລ້າ 92 ເປົ້າໝາຍ, ທະນາຄານ 48 ເປົ້າໝາຍ, ວິສາຫະກິດ 105 ເປົ້າໝາຍ; ພ້ອມນັ້ນ, ໄດ້ປັບປຸງກົນໄກໃນການຕິດຕາມ, ຊຸກຍູ້ການແກ້ໄຂຜົນການກວດສອບເຮັດໃຫ້ການແກ້ໄຂຜົນການກວດສອບເປັນຮູບປະທຳຫຼາຍຂຶ້ນ. ຕະຫຼອດໄລຍະ 5 ປີທີ່ຜ່ານມາ, ສາມາດຍາດໄດ້ຜົນງານທີ່ພົ້ນເດັ່ນເປັນຕົ້ນສາມາດກວດສອບເຫັນລາຍຮັບເພີ່ມລວມເປັນເງິນ 849.94 ຕື້ກີບ ແລະ ກວດສອບເຫັນລາຍຈ່າຍເພີ່ມ 229.55 ຕື້ກີບ; ກວດສອບເຫັນການຈ່າຍເງິນເກີນໜ້າວຽກຂອງໂຄງການລົງທຶນຂອງລັດ, ເງິນຮິບຄໍ້າປະກັນ, ເງິນປະກອບສ່ວນຊ່ວຍເຫຼືອຈາກສັງຄົມແລະລາຍຮັບອື່ນໆ 945.42 ຕື້ກີບ, ຊຸກຍູ້ການແກ້ໄຂໄດ້ 639.02 ຕື້ກີບ; ໃນນັ້ນ: ຈົດຮັບ-ຈົດຈ່າຍເຂົ້າງົບປະມານຜ່ານລະບົບຄັງເງິນແຫ່ງຊາດ 87.67 ຕື້ກີບ ແລະ ເກັບກູ້ເປັນເງິນຄືນເຂົ້າງົບປະມານແຫ່ງລັດໄດ້ 551.35 ຕື້ກີບ.
ຕໍ່ກັບວຽກງານຮ່ວມມື ແລະ ການເຊື່ອມໂຍງສາກົນໂດຍສະເພາະການຮ່ວມມືສອງຝ່າຍໃນການປຶກສາຫາລືແລະ ແລກປ່ຽນບົດຮຽນກ່ຽວກັບການພັດທະນາວຽກງານກວດສອບແຫ່ງລັດ ແລະ ການຮ່ວມມືຫຼາຍຝ່າຍເຊັ່ນ: ເຂົ້າຮ່ວມບັນດາກິດຈະກຳໃນຂອບຂອງສະຫະພັນສະຖາບັນກວດສອບສູງສຸດອາຊຽນ (ASEANSAI) ແລະສະຫະພັນສະຖາບັນກວດສອບສູງສຸດພາກພື້ນອາຊີ (ASOSAI) ຊຶ່ງທັງໝົດນັ້ນກໍເພື່ອຍົກລະດັບການຈັດຕັ້ງປະຕິບັດວຽກງານກວດສອບໃຫ້ສູງຂຶ້ນທຽບເທົ່າກັບສາກົນ. ໄປຄຽງຄູ່ກັບການປະຕິບັດວຽກງານວິຊາສະເພາະ, ການພັດທະນາພື້ນຖານໂຄງລ່າງໃຫ້ເປັນທັນສະໄໝຂອງອົງການກວດສອບແຫ່ງລັດກໍໄດ້ຮັບການພັດທະນາ-ຍົກສູງເພື່ອນໍາໃຊ້ລະບົບຂໍ້ມູນ - ຂ່າວສານເຊື່ອມຕໍ່ກັບລະບົບເຄືອຂ່າຍການຄຸ້ມຄອງງົບປະມານແຫ່ງລັດຂອງກະຊວງການເງິນເຂົ້າໃນການສ້າງແຜນການກວດສອບໃຫ້ມີຄວາມຊັດເຈນແຕ່ຫົວທີ; ພ້ອມດຽວກັນນັ້ນ, ກໍຊອກຫາແຫຼ່ງທຶນທັງພາຍໃນ ແລະ ຕ່າງປະເທດເພື່ອພັດທະນາການຫັນວຽກງາານກວດສອບເປັນທັນສະໄໝ (E-Audit); ໃນນີ້, ແມ່ນເລັ່ງໃສ່ສ້າງຄວາມເຂັ້ມແຂງຫັນເປັນທັນສະໄໝໃນ 5 ວຽກທີ່ເປັນພື້ນຖານສໍາຄັນໃຫ້ແກ່ການພົວພັນ, ປະສານງານໃນການເຄື່ອນໄຫວວຽກງານກວດສອບໃຫ້ມີຄວາມຮັບປະກັນ, ວ່ອງໄວເປັນຕົ້ນການສະໜອງວັດຖຸອຸປະກອນໃຫ້ຄົບຖ້ວນ, ຕິດຕັ້ງລະບົບບໍລິຫານຫ້ອງການທັນສະໄໝ (E-Office), ຕິດຕັ້ງລະບົບຄຸ້ມຄອງເອກະສານ (Document Management System), ລະບົບຈົດໝາຍເອເລັກໂຕຣນິກ (E-mail Server) ແລະ ລະບົບຖານເກັບກໍາຂໍ້ມູນCloud Server.
ຄຽງຄູ່ກັບຜົນງານ, ຜົນສຳເລັດທີ່ອົງການກວດສອບແຫ່ງລັດສູ້ຊົນມາໄດ້ນັ້ນ, ຍັງມີຫຼາຍບັນຫາທີ່ຄະນະພັກ, ຄະນະນຳຂອງອົງການກວດສອບແຫ່ງລັດ, ອົງການກວດສອບພາກຕ້ອງໄດ້ເປັນເຈົ້າການນຳພາ-ຊີ້ນຳຢ່າງໃກ້ຊິດ ແລະ ຕໍ່ເນື່ອງ ໂດຍສະເພາະການຄົ້ນຄວ້າເພື່ອຜັນຂະຫຍາຍ, ການປັບປຸງ ແລະ ສ້າງນິຕິກໍາຈໍານວນໜຶ່ງຍັງບໍ່ທັນສໍາເລັດຕາມແຜນການທີ່ໄດ້ກໍານົດ; ການຝຶກອົບຮົມວຽກງານພັດທະນາບຸກຄະລາກອນຍັງບໍ່ທັນດຳເນີນໄດ້ດີເທົ່າທີ່ຄວນ; ການຊຸກຍູ້ການແກ້ໄຂຜົນການກວດສອບຍັງເຮັດບໍ່ໄດ້ກວ້າງຂວາງ ແລະ ເລິກເຊິ່ງເທົ່າທີ່ຄວນ; ການບຸກທະລຸການກວດສອບຕາມວາລະແຫ່ງຊາດເປັນຕົ້ນແມ່ນການກວດສອບດ້ານລາຍຮັບ-ລາຍຈ່າຍກໍຍັງຢູ່ໃນທ່ວງທ່າທີ່ຈໍາກັດທາງດ້ານຈໍານວນເປົ້າໝາຍກວດສອບວິຊາສະເພາະ ແລະ ການລົງເລິກຊຶ່ງສາເຫດຕົ້ນຕໍແມ່ນເກີດຈາກການຮ່ວມມື ແລະ ການສະໜອງຂໍ້ມູນໃຫ້ແກ່ອົງການກວດສອບແຫ່ງລັດຍັງມີການແກ່ຍາວ ແລະ ຊັກຊ້າ; ການສະໜອງງົບປະມານຮັບໃຊ້ການເຄື່ອນໄຫວວິຊາສະເພາະເຖິງວ່າຈະມີຄວາມຄ່ອງຕົວດີຂຶ້ນ, ແຕ່ການປະກອບທາງດ້ານວັດຖຸ-ອຸປະກອນ ແລະ ພາຫະນະຮັບຍັງເຮັດໄດ້ໜ້ອຍ.
 |
ທັງໝົດນັ້ນ, ກໍເພື່ອແນ່ໃສ່ເຮັດໃຫ້ການຍົກສູງຄຸນນະພາບວຽກງານການກວດສອບ ແລະ ມາດຕະການໃນການກວດສອບໄດ້ຮັບການປັບປຸງໂດຍສະເພາະບັນຫາການຕິດຕາມ, ຊຸກຍູ້ແລະກວດສອບຄືນການແກ້ໄຂຜົນການກວດສອບເພື່ອເຮັດໃຫ້ອົງການຄຸ້ມຄອງເປົ້າໝາຍຖືກກວດສອບແລະເປົ້າໝາຍຖືກກວດສອບເປັນເຈົ້າການຈັດຕັ້ງປະຕິບັດມາດຕະການແກ້ໄຂຜົນການກວດສອບຕາມມະຕິກອງປະຊຸມສະພາແຫ່ງຊາດ, ຄະນະປະຈໍາສະພາແຫ່ງຊາດ, ກອງປະຊຸມສະພາປະຊາຊົນຂັ້ນແຂວງ ແລະ ຄະນະປະຈໍາສະພາປະຊາຊົນຂັ້ນແຂວງ. ຜ່ານມາເຖິງວ່າອົງການກວດສອບແຫ່ງລັດໄດ້ມີຄວາມພະຍາຍາມສູງໃນການການຄົ້ນຄວ້າ, ການປັບປຸງ, ການສ້າງນິຕິກຳຕ່າງໆເພື່ອຮອງຮັບໃຫ້ແກ່ການກວດສອບ, ແຕ່ສັງເກດເຫັນວ່ານິຕິກຳຫຼາຍອັນຍັງບໍ່ຮັດກຸມຊຶ່ງສະແດງອອກໃນການປະເມີນຄຸນນະພາບການກວດສອບ ແລະ ການສ້າງບົດລາຍງານຜົນການກວດສອບ, ການກວດສອບເຫັນຫຼາຍບັນຫາແຕ່ຂອດການແກ້ໄຂຜົນການກວດສອບຍັງເຮັດໄດ້ໜ້ອຍ, ຊັກຊ້າ ແລະ ບາງບັນຫາບໍ່ສາມາດແກ້ໄຂໄດ້ພຶດຕິກຳ ແລະ ໄດ້ຍົກໃຫ້ເຫັນແຈ້ງວ່າຜ່ານການສັງລວມ ແລະ ຮ່າງບົດລາຍງານຜົນການກວດສອບປະຈຳປີເຫັນວ່າຜົນການກວດສອບແມ່ນເຫັນຫຼາຍບັນຫາທີ່ມີການລະເມີດແຜນການ-ການເງິນ, ລະເມີດລະບຽບກົດໝາຍ; ການແກ້ໄຂຍັງເຮັດໄດ້ໜ້ອຍ, ຊັກຊ້າ, ແກ່ຍາວ ແລະ ບາງບັນຫາແກ້ໄຂບໍ່ໄດ້, ສາເຫດດັ່ງກ່າວນີ້ແມ່ນບັນຫາຕັ້ງຂຶ້ນທີ່ຄະນະພັກ, ຄະນະນຳຕະຫຼອດຮອດນັກກວດສອບຈະຕ້ອງໄດ້ພ້ອມກັນແກ້ໄຂຢ່າງມີປະສິດທິພາບ ແລະ ມີປະສິດທິຜົນ.
ສັງລວມແລ້ວ, ຕະຫຼອດໄລຍະ 27 ປີພາຍໃຕ້ການນຳພາ - ຊີ້ນຳຂອງພັກບົນພື້ນຖານການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ກໍຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ II ຂອງອົງຄະນະພັກອົງການກວດສອບແຫ່ງລັດເວົ້າລວມແມ່ນການເຄື່ອນໄຫວ ແລະ ຈັດຕັ້ງປະຕິບັດບັນດາວຽກງານຈຸດສຸມຂອງບັນດາການຈັດຕັ້ງຂອງລັດ, ສະພາແຫ່ງຊາດແລະລັດຖະບານ, ເວົ້າສະເພາະແນໃສ່ເຮັດໃຫ້ວຽກງານກວດສອບ ແລະ ມາດຕະການໃນການຍົກສູງຄຸນນະພາບການກວດສອບມີປະສິດທິພາບ ແລະ ມີປະສິດທິຜົນກ້າວໄປສູ່ການຄຸ້ມຄອງ, ການນຳໃຊ້ງົບປະມານ, ການເງິນແລະຊັບສິນຂອງລັດ, ອົງການຈັດຕັ້ງການເມືອງ-ສັງຄົມ, ກົມກອງທີ່ຂຶ້ນກັບກຳລັງປະກອບອາວຸດ, ທະນາຄານແຫ່ງສປປລາວ, ທະນາຄານ ແລະ ວິສາຫະກິດທີ່ລັດລົງທຶນ; ໂຄງການລົງທຶນ ແລະ ກິດຈະການເຄື່ອນໄຫວຕ່າງໆທີ່ນຳໃຊ້ງົບປະມານ ແລະ ຊັບສິນຂອງລັດໃຫ້ມີຄວາມໂປ່ງໃສ, ມີປະສິດທິພາບ ແລະ ປະສິດທິຜົນສູງ.
ຜົນງານທັງໝົດທີ່ກ່າວມານັ້ນ, ໄດ້ເຮັດໃຫ້ວຽກງານການກວດສອບແຫ່ງລັດກາຍເປັນພາກສ່ວນໜຶ່ງທີ່ສຳຄັນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ, ຍ້ອນເຫັນໄດ້ຄວາມສຳຄັນ ແລະ ຜົນງານການກວດສອບແຫ່ງລັດທີ່ປະກອບສ່ວນຢ່າງຕັ້ງໜ້າໃນການປະຕິບັດພາລະບົດບາດ,ສິດແລະໜ້າທີ່ທີ່ພັກ-ລັດມອບໃຫ້ດ້ວຍຜົນສຳເລັດຢ່າງເປັນຮູບປະທຳ, ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງທາງດ້ານເສດຖະກິດ, ແຜນການ, ການເງິນ ແລະ ເງິນຕາໃນລະບົບການເງິນພາກລັດ. ດັ່ງນັ້ນ, ຜົນການກວດສອບດັ່ງກ່າວໄດ້ກາຍເປັນບ່ອນອີງໃຫ້ແກ່ສະພາແຫ່ງຊາດກໍຄືລັດຖະບານໃນການອອກມະຕິ, ອອກຄຳສັ່ງ ແລະ ແຈ້ງການຕ່າງໆເພື່ອກໍານົດມາດຕະການແກ້ໄຂປະກົດການຫຍໍ້ທໍ້ທາງດ້ານກົນໄກເສດຖະກິດຕະຫຼາດເປັນຕົ້ນວິໄນແຜນການ-ການເງິນ, ການສວຍໃຊ້ອຳນາດໜ້າທີ່ ແລະ ອື່ນໆໃຫ້ຖືກຈຳກັດ ແລະ ຫຼຸດລົງເທື່ອລະກ້າວ. ເຊື່ອແນ່ວ່າພາຍໃຕ້ການນຳພາຂອງພັກ, ການຄຸ້ມຄອງຂອງລັດກໍຄືອົງຄະນະພັກອົງການກວດສອບແຫ່ງລັດຕະຫຼອດເຖິງພະນັກງານ-ລັດຖະກອນ, ນັກກວດສອບຈະຮັກສາມູນເຊື້ອທາດແທ້ ແລະ ຜົນງານອັນດີເດັ່ນເຂົ້າໃນການປະຕິບັດສອງໜ້າທີ່ຍຸທະສາດທີ່ສຳຄັນຂອງພັກໃຫ້ປະເທດຊາດມັ່ງຄັ່ງເຂັ້ມແຂງຢ່າງໜັກແໜ້ນ.
ຄໍາເຫັນ