ອາທິດຜ່ານມານີ້, ຫ້ອງການຍຸຕິທຳເມືອງງອຍ ແຂວງຫຼວງພະບາງໄດ້ຈັດພິທີມອບ-ຮັບໃບຢັ້ງຢືນຄອບຄົວ ແລະບ້ານແບບຢ່າງປະຕິບັດກົດໝາຍຂຶ້ນທີ່ຫ້ອງປະຊຸມບ້ານສົບວັນ ໂດຍການເປັນປະທານຂອງທ່ານ ບຸນເຕັມ ອາໄພສະຫວັດ ປະທານກວດກາພັກ-ລັດເມືອງ, ມີຫົວໜ້າ-ຮອງຫົວໜ້າຫ້ອງການກ່ຽວຂ້ອງເຂົ້າຮ່ວມ.
ທ່ານ ອ່ອນຈັນ ພອນສະຫວັດ ຕາງໜ້າຫ້ອງການຍຸຕິທໍາເມືອງ ໄດ້ຜ່ານບົດສະຫຼຸບປະເມີນການສ້າງຄອບຄົວ ແລະບ້ານແບບຢ່າງປະຕິບັດກົດໝາຍ ກ່າວວ່າ: ພາຍໃນກຸ່ມສົບວັນຄື: ບ້ານສົບວັນມີ 53 ຄອບຄົວ, ພົນລະເມືອງທັງໝົດ 237 ຄົນຍິງ 139 ຄົນສາມາດປະຕິບັດໄດ້ຕາມ 5 ມາດຖານຂອງການສ້າງຄອບຄົວແບບຢ່າງປະຕິບັດກົດໝາຍໄດ້ 53 ຄອບຄົວກວມ 100% ຂອງຈໍານວນຄອບຄົວທັງໝົດ, ບ້ານຫາດຊາວມີ 69 ຄອບຄົວ, ພົນລະເມືອງທັງໝົດ 380 ຄົນຍິງ 185 ຄົນ, ສາມາດປະຕິບັດໄດ້ຕາມ 5 ມາດຖານຂອງການສ້າງຄອບຄົວແບບຢ່າງປະຕິບັດກົດໝາຍ 68 ຄອບຄົວກວມ 98,55% ຂອງຈຳນວນຄອບຄົວທັງໝົດ, ບ້ານມົກດູ່ມີ 98 ຄອບຄົວ, ພົນລະເມືອງທັງໝົດ 605 ຄົນຍິງ 294 ຄົນ, ມີຄອບຄົວທີ່ສາມາດປະຕິບັດໄດ້ຕາມ5 ມາດຖານຂອງການສ້າງຄອບຄົວແບບຢ່າງປະຕິບັດກົດໝາຍ 97 ຄອບຄົວເທົ່າກັບ 98,97%ຂອງຈໍານວນຄອບຄົວທັງໝົດ, ບ້ານຫ້ວຍລານມີ 39 ຄອບຄົວ, ພົນລະເມືອງທັງໝົດ 224 ຄົນ ຍິງ 118 ຄົນ, ມີຄອບຄົວທີ່ສາມາດປະຕິບັດໄດ້ຕາມ 5 ມາດຖານຂອງການສ້າງຄອບຄົວແບບຢ່າງປະຕິບັດກົດໝາຍໄດ້ 38 ຄອບຄົວເທົ່າກັບ 97,43% ຂອງຈໍານວນຄອບຄົວທັງໝົດ. ໃນພິທີໄດ້ມີການມອບໃບຢັ້ງຢືນຄອບຄົວ ແລະບ້ານແບບຢ່າງປະຕິບັດກົດໝາຍຢ່າງສົມກຽດ.
ໂອກາດນີ້, ທ່ານ ບຸນເຕັມ ອາໄພສະຫວັດ ໄດ້ເນັ້ນໜັກໃຫ້ອົງການປົກຄອງບ້ານ ສືບຕໍ່ປຸກລະດົມປະຊາຊົນໃຫ້ເຄົາລົບລັດຖະທໍາມະນູນ ແລະກົດໝາຍຢ່າງເຂັ້ມງວດປະກອບສ່ວນພັດທະນາບ້ານຂອງຕົນ ກໍຄືຄອບຄົວໃຫ້ກຸ້ມຢູ່ກຸ້ມກິນ, ຄອບຄົວມີຄວາມຮັ່ງມີຜາສຸກ, ສືບຕໍ່ສຶກສາອົບຮົມບັນດາຄອບຄົວທີ່ຍັງບໍ່ທັນໄດ້ຮັບໃບຢັ້ງຢືນໃຫ້ກາຍເປັນຄອບຄົວແບບຢ່າງປະຕິບັດກົດໝາຍ ແລະພ້ອມກັນປົກປັກຮັກສາມູນເຊື້ອຄອບຄົວແບບຢ່າງ ແລະບ້ານແບບຢ່າງປະຕິບັດກົດໝາຍໃຫ້ຍືນຍົງຕະຫຼອດໄປ.
ຂ່າວ-ພາບ: ອ່ອນຈັນ ພອນສະຫວັດ
ຄໍາເຫັນ