42 ປີ ແຫ່ງການກຳເນີດເຕີບໃຫຍ່ຂະຫຍາຍຕົວຂອງ ກອງພັນໃຫຍ່ 641

ສະຫາຍ ພັນໂທ ອົດສາ ໄຊຍະເສນ ຫົວໜ້າພະແນກເສນາທິການ ກອງພັນໃຫຍ່ປ້ອງກັນອາກາດ 641 ໃຫ້ຮູ້ວ່າ: ການກຳເນີດເຕີບໃຫຍ່ຂະຫຍາຍຕົວຂອງກອງພັນໃຫຍ່ 641 ໄດ້ສືບທອດມູນເຊື້ອແຕ່ໄລຍະການຕໍ່ສູ້ປົດປ່ອຍຊາດນັບແຕ່ປີ 1962 ທີ່ມີຊື່ວ່າ ກອງພັນນ້ອຍ 601 ໄດ້ເຮັດໜ້າທີ່ສູ້ຮົບປະຈຳການຢູ່ເຂດທົ່ງໄຫຫີນ, ພູກູດຈອມເຫຼັກ ແລະ ເຂດຄັງໄຂ ເມືອງແປກ ແຂວງຊຽງຂວາງ, ໄດ້ຍິງຍົນ RF 101 ຕົກຄາທີ່ 1 ລໍາ ດ້ວຍລູກປືນ 37-1ມມ, 4 ລູກ ເປັນລໍາທໍາອິດຢູ່ໃນປະເທດລາວ ແລະ ທົ່ວອິນດູຈີນ ຈາກຜົນງານດັ່ງກ່າວ ພັກ - ລັດຖະບານ ໄດ້ມອບນາມມະຍົດໃຫ້ແກ່ກອງພັນນ້ອຍ 601 (ເປັນກອງພັນນ້ອຍ 601 ວິລະຊົນ), ກອງພັນນ້ອຍ 456 ເຮັດໜ້າທີ່ສູ້ຮົບປ້ອງກັນຜູ້ນຳຢູ່ທົ່ງນາໄກ ເມືອງວຽງໄຊ ແຂວງຫົວພັນ ບັ້ນຮົບທີ່ດຸເດືອດ, ໄດ້ສູ້ຮົບ 3 ມື້ 3 ຄືນ (ວັນທີ 4 ຫາ ວັນ 6 ເດືອນມິຖຸນາ ປີ 1965) ຈາກຜົນງານດັ່ງກ່າວ ພັກ-ລັດຖະບານ ໄດ້ມອບນາມມະຍົດໃຫ້ແກ່ ກອງຮ້ອຍ 27, ກອງພັນນ້ອຍ 456 (ເປັນກອງຮ້ອຍ 27 ວິລະຊົນ), ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ (ວັນທີ 3 ມັງກອນ 1977),ກອງຮ້ອຍ 4, ກອງພັນນ້ອຍ 601 ໄດ້ເຄື່ອນທັບເຂົ້າບຸກຕີພວກປະຕິການຂວາຈັດ ທີ່ໃຊ້ກຳລັງເກາະຜິດຕາມຊາຍແດນ ແລະ ບຽດຢຶດເກາະ, ດອນຕາມແມ່ນໍ້າຂອງທີ່ຂຶ້ນກັບດິນຂອງລາວເຮົາຢ່າງບັງອາດເປີດແປນ ຊຶ່ງກົມກອງສາມາດຍາດໄດ້ໄຊຊະນະຢ່າງຈົບງາມ.

ການສ້າງຕັ້ງ ກອງພັນໃຫຍ່ 641 ເປັນເຫດການ, ການເມືອງທີ່ມີຄວາມໝາຍສໍາຄັນໃນປະຫວັດສາດຂອງຊາດ ແລະ ຂອງກອງທັບເຮົາ ທີ່ສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງເຫຼົ່າຮົບ ປ້ອງກັນອາກາດ ແມ່ນການຕອບສະໜອງກັບຄວາມຮຽກຮ້ອງຕ້ອງການ ຂອງປະເທດຊາດ ເພື່ອສ້າງກອງທັບ ໃຫ້ກາຍເປັນກຳລັງຫຼັກແຫຼ່ງໃນພາລະກິດປົກປັກຮັກສາ ແລະ ພັດທະນາປະເທດຊາດ, ປົກປັກຮັກສາ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໃຫ້ໝັ້ນຄົງ, ນັບແຕ່ມື້ສ້າງຕັ້ງເປັນຕົ້ນມາ ໂດຍໄດ້ຮັບການຊີ້ນໍາຈາກ ພັກ - ລັດ ໂດຍສະເພາະແມ່ນ ຄະນະພັກກະຊວງປ້ອງກັນປະເທດ, ຄະນະພັກ ຄະນະບັນຊາ, ພະນັກງານ-ສະມາຊິກພັກ,ນາຍ ແລະ ພົນທະຫານ ກອງພັນໃຫຍ່ 641 ແຕ່ລະຮຸ່ນ ໄດ້ເສີມຂະຫຍາຍທາດແທ້ ແລະ ຮັກສາມູນເຊື້ອປະຕິວັດ, ພ້ອມກັນສ້າງ ກອງພັນໃຫຍ່ 641 ມີການເຕີບໃຫຍ່ຂະຫຍາຍຕົວ ແລະ ເຮັດສໍາເລັດໜ້າທີ່ການເມືອງຂອງຕົນດ້ວຍຜົນສໍາເລັດສູງສົ່ງເປັນກ້າວໆມາ.

ສັງລວມແລ້ວໃນຕະຫຼອດໄລຍະ 42 ປີ ທີ່ຜ່ານມາ ຄະນະພັກ-ຄະນະບັນຊາ ແຕ່ລະຂັ້ນໄດ້ເອົາໃຈໃສ່ສຶກສາອົບຮົມ ການເມືອງນໍາພາແນວຄິດເປັນບັນຫາສໍາຄັນໃຫ້ແກ່ ພະນັກງານ, ສະມາຊິກພັກ, ນັກຮົບຂອງຕົນ, ເຮັດໃຫ້ ພະນັກງານ- ນັກຮົບ ມີຄວາມຈົງຮັກພັກດີ, ບໍລິສຸດສັດຊື່ຕໍ່ພັກ, ຕໍ່ປະເທດຊາດ, ຕໍ່ປະຊາຊົນ ກຳແໜ້ນແນວທາງນະໂຍບາຍຂອງພັກ ໃນແຕ່ລະໄລຍະ ຮັບຮູ້ເຊື່ອມຊຶມຕໍ່ໜ້າທີ່ການເມືອງຂອງກອງທັບ, ຂອງກົມກອງ, ຕັ້ງໜ້າຝຶກແອບຮໍ່າຮຽນສິນລະປະຍຸດ, ຍຸດທະວິທີ ຍົກລະດັບດ້ານການທະຫານ ໃຫ້ແກ່ນາຍ ແລະ ພົນທະຫານ ສູງຂຶ້ນເລື້ອຍໆ ພະນັກງານບັນຊາ - ນໍາພາ ແຕ່ລະຂັ້ນ ໃນທົ່ວ ກອງພັນໃຫຍ່ 641 ສ່ວນຫຼາຍແມ່ນໄດ້ຮັບການບຳລຸງກໍ່ສ້າງ ຢູ່ກົມກອງ ແລະ ໄດ້ຮັບການຍົກລະດັບຈາກໂຮງຮຽນ, ວິທະຍາຄານ ທັງພາຍໃນ ແລະ ຕ່າງປະເທດ ມີຫຼາຍ ສະຫາຍ ໄດ້ຮຽນຈົບຂັ້ນຊັ້ນສູງ, ຂັ້ນປະລິນຍາຕີ, ປະລິນຍາໂທ, ສາມາດສ້າງໄດ້ ນາຍທະຫານໜຸ່ມແໜ້ນ, ມີຄວາມຮູ້ຄວາມສາມາດ, ມີປະສົບການໃນຂະບວນວຽກງານຕົວຈິງ ໄດ້ກາຍເປັນພະນັກງານສືບທອດປ່ຽນແທນ ແຕ່ລະຮຸ່ນຢ່າງຕໍ່ເນື່ອງ, ຜົນງານການເຄື່ອນໄຫວອັນພົ້ນເດັ່ນຂອງກອງພັນໃຫຍ່ 641 ຍາດມາໄດ້ ຕະຫຼອດໄລຍະ 42 ປີຜ່ານມາ ຈຶ່ງໄດ້ຮັບການຍ້ອງຍໍປະເພດຕ່າງໆ ຈາກລັດຖະບານ ແລະ ກະຊວງປ້ອງກັນປະເທດຄື: ຫຼຽນໄຊນາມມະຍົດກົມກອງວິລະຊົນແຫ່ງຊາດລວມໝູ່ 3 ໜ່ວຍ, ຫຼຽນໄຊອິດສະຫຼະຊັ້ນ II ລວມໝູ່ ແລະ ບຸກຄົນ 18 ໜ່ວຍ, ຫຼຽນໄຊອິດສະຫຼະຊັ້ນ III ລວມໝູ່ ແລະ ບຸກຄົນ 29 ໜ່ວຍ, ຫຼຽນໄຊພິລະອາດຫານຊັ້ນ I ລວມໝູ່ ແລະ ບຸກຄົນ 7 ໜ່ວຍ, ຫຼຽນໄຊພິລະອາດຫານຊັ້ນ II ລວມໝູ່ ແລະ ບຸກຄົນ 154 ໜ່ວຍ, ຫຼຽນໄຊພິລະອາດຫານຊັ້ນ III ລວມໝູ່ ແລະ ບຸກຄົນ 590 ໜ່ວຍ, ຫຼຽນໄຊແຮງງານຊັ້ນ II ລວມໝູ່ ແລະ ບຸກຄົນ 120 ໜ່ວຍ, ຫຼຽນໄຊແຮງງານຊັ້ນ III ລວມໝູ່ ແລະ ບຸກຄົນ 303 ໜ່ວຍ, ຫຼຽນກາແຮງງານ ລວມໝູ່ ແລະ ບຸກຄົນ 402 ໜ່ວຍ, ຫຼຽນກາລະນຶກ 50 ປີ ບຸກຄົນ 112 ໜ່ວຍ, ຫຼຽນກາລະນຶກ 60 ປີ ບຸກຄົນ 167 ໜ່ວຍ, ຫຼຽນກາລະນຶກ 65 ປີ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ລວມໝູ່ 2 ໜ່ວຍ, ຫຼຽນກາລະນຶກ 70 ປີ ບຸກຄົນ 439 ໜ່ວຍ, ຫຼຽນກາລະນຶກ 75 ປີ ບຸກຄົນ 360 ໜ່ວຍ, ຫຼຽນກາລະນຶກ60ປີຂອງກົມໃຫຍ່ພະລາທິການ ບຸກຄົນ 9 ໜ່ວຍ, ຫຼຽນກຽດຕິຄຸນ ບຸກຄົນ 40 ໜ່ວຍ, ໃບຍ້ອງຍໍລັດຖະບານ ລວມໝູ່ ແລະ ບຸກຄົນ 656 ໃບ, ໃບຍ້ອງຍໍກະຊວງປ້ອງກັນປະເທດ ລວມໝູ່ ແລະ ບຸກຄົນ 1,171 ໃບ, ໃບຍ້ອງຍໍກົມໃຫຍ່ການເມືອງ ລວມໝູ່ ແລະ ບຸກຄົນ 1,347 ໃບ.

ສະນັ້ນ, ໃນຕໍ່ໜ້າພະນັກງານ - ນັກຮົບໃນທົ່ວກອງພັນໃຫຍ່ 641 ຈະໄດ້ສືບຕໍ່ຍົກສູງສະຕິລະວັງຕົວ ກຽມພ້ອມທັບມ້າງທຸກກົນອຸບາຍເລລ່ຽມຂອງສັດຕູທາງໜ້າດິນ ແລະ ນ່ານຟ້າ ນະຄອນຫຼວງວຽງຈັນ ພົວພັນສະໜິດຕິດແໜ້ນກັບຮາກຖານປະຊາຊົນ ໃນຂອບເຂດກົມກອງຕັ້ງທັບໃຫ້ມີຄວາມສະຫງົບປະກອບສ່ວນເຂົ້າໃນການປົກປັກຮັກສາເອກະລາດ ອຳນາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໃຫ້ໝັ້ນຄົງ, ສຸມໃສ່ປັບປຸງກໍ່ສ້າງກໍາລັງໃຫ້ມີສຸຂະພາບເຂັ້ມແຂງ ແລະ ມີອັນຫັນປ່ຽນຢ່າງຈະແຈ້ງ ແຂ່ງຂັນກັນສ້າງກົມກອງ ໃຫ້ເປັນກອງມີລະບຽບວິໄນເຂັ້ມງວດ ຈັດຕັ້ງອົບຮົມຮໍ່າຮຽນການເມືອງ - ການທະຫານ, ວິຊາສະເພາະເຕັກນິກ ຕາມທິດຊີ້ນໍາຂອງຂັ້ນເທິງກໍຄືຂອງກອງພັນໃຫຍ່ 641 ຍົກລະດັບດ້ານການນໍາພາ - ບັນຊາ ໃຫ້ແກ່ພະນັກງານນໍາພາ - ບັນຊາ ຮັບປະກັນ ໃຫ້ມີພະນັກງານສືບທອດ - ປ່ຽນແທນ ຢູ່ແຕ່ລະກົມກອງ ເພີ່ມທະວີຄວາມສາມັກຄີ ລະຫວ່າງ ພະນັກງານ - ນັກຮົບ ໃນທົ່ວກອງພັນໃຫຍ່ 641 ກັບກົມກອງເພື່ອນ ໃຫ້ແໜ້ນແຟ້ນກວ່າເກົ່າ ເສີມຂະຫຍາຍການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ລະຫວ່າງກອງພັນໃຫຍ່ ກັບອໍານາດການປົກຄອງທ້ອງຖິ່ນ ໃຫ້ໜັກແໜ້ນເຂັ້ມແຂງ ບັນດາກົມກອງ ຕັ້ງທັບຢູ່ບ່ອນໃດ ກໍຕ້ອງເອົາໃຈໃສ່ເຮັດວຽກງານກໍ່ສ້າງຮາກຖານການເມືອງຢູ່ບ່ອນນັ້ນໃຫ້ດີ ເພື່ອເຮັດໃຫ້ສະພາບຢູ່ຂອບເຂດຂອງຕົນຮັບຜິດຊອບ ມີຄວາມສະຫງົບໂດຍພື້ນຖານ ແຕ່ລະກົມກອງຕ້ອງຍົກສູງນໍ້າໃຈ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ບົນພື້ນຖານເສີມຂະຫຍາຍມູນເຊື້ອສ້າງພະລາທິການກັບທີ່, ຄະນະພັກ - ຄະນະບັນຊາ ພະນັກງານ - ນັກຮົບ ທຸກຄົນຕ້ອງເປັນເຈົ້າການ ແລະ ແຂ່ງຂັນກັນສ້າງເສດຖະກິດ ແກ້ໄຂຊີວິດການເປັນຢູ່ ຂອງກົມກອງລວມໝູ່ໃຫ້ດີຂຶ້ນ, ຕ້ານປະກົດການຫຍໍ້ທໍ້ຕ່າງໆໃຫ້ທັນເວລາ, ພະນັກງານ -ນັກຮົບ ຕ້ອງເປັນແບບຢ່າງໃນການດຳລົງຊີວິດປອດໃສ, ເຂັ້ມແຂງ ແລະ ຂາວສະອາດ ເພື່ອກຽມພ້ອມເຮັດສໍາເລັດໜ້າທີ່ວຽກງານທີ່ພັກ - ລັດ ກໍຄືປະຊາຊົນມອບໝາຍໃຫ້.

ເນື່ອງໃນໂອກາດວັນສ້າງຕັ້ງກອງພັນໃຫຍ່ 641 ຄົບຮອບ 42 ປີ, ສະຫາຍ ພັນໂທ ອົດສາ ໄຊຍະເສນໄດ້ຕາງໜ້າໃຫ້ຄະນະພັກ-ຄະນະບັນຊາ, ພະນັກງານ-ນັກຮົບ ໃນທົ່ວກອງພັນໃຫຍ່ 641 ສະແດງຄວາມຮູ້ບຸນຄຸນຕໍ່ການນຳພັກ-ລັດ, ການນຳກະຊວງປ້ອງກັນປະເທດ, ກໍຄືຄະນະນຳກົມໃຫຍ່ເສນາທິການກອງທັບ ທີ່ໄດ້ໃຫ້ການໃກ້ຊິດຕິດແທດ, ຊີ້ນຳ-ນຳພາ ເຫຼົ່າຮົບປ້ອງກັນອາກາດກໍຄື ກອງພັນໃຫຍ່ 641 ໃຫ້ເຕີບໃຫຍ່ຂະຫຍາຍຕົວຕະຫຼອດມາ, ອວຍພອນໄຊອັນປະເສີດ ແກ່ການຈັດຕັ້ງການນຳພັກ-ລັດ ແຕ່ລະຂັ້ນຈົ່ງມີສຸຂະພາບເຂັ້ມແຂງ, ສືບຕໍ່ຊີ້ນຳ-ນຳພາ ກອງທັບປະຊາຊົນລາວ ກໍຄືກອງພັນໃຫຍ່ 641 ໃຫ້ເຕີບໃຫຍ່ເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ, ອວຍພອນແດ່ຄະນະພັກ - ຄະນະບັນຊາ, ພະນັກງານ - ນັກຮົບໃນທົ່ວກອງພັນໃຫຍ່ 641, ຈົ່ງມີສຸຂະພາບເຂັ້ມແຂງ ພ້ອມກັນປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງກົມກອງ ໂດຍສະເພາະນາມມະຍົດ ກົມກອງວິລະຊົນທີ່ກົມກອງສ້າງມາໄດ້ໃຫ້ຄົງຢູ່ຕະຫຼອດໄປ.