ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 48 ປີ(ວັນທີ 2 ທັນວາ - 1975-2 ທັນວາ 2023)ໄດ້ໝູນວຽນບັນຈົບຄົບຮອບອີກວາລະໜຶ່ງ
ສະຫາຍທະວີສັກ ໄຊຍະວົງ ເລຂາພັກເມືອງ ເຈົ້າເມືອງເງິນ ແຂວງໄຊຍະບູລີ ໄດ້ສະແດງຄວາມຮູ້ສຶກຂອງຕົນວ່າ:ວັນຊາດທີ 2 ທັນວາ ແມ່ນເຫດການການເມືອງທາງປະຫວັດສາດຂອງຊາດລາວເຮົາ. ເປັນວັນແຫ່ງໄຊຊະນະອັນຍິ່ງໃຫຍ່ແຫ່ງການຕໍ່ສູ້ຂອງຊາດລາວບັນດາເຜົ່າພາຍໃຕ້ການນໍາພາຂອງພັກປະຊາຊົນປະຕິວັດລາວທີ່ສະຫຼາດສ່ອງໃສ.ວັນຊາດທີ 2 ທັນວາ ຍັງເປັນວັນປະກາດໃຫ້ຊາວໂລກ
ໄດ້ຮັບຮູ້ວ່າ ເປັນວັນທີ່ປະຊາຊົນລາວມີອິດສະຫຼະພາບ,ເອກະລາດ,ອໍານາດອະທິປະໄຕ ແລະເປັນເຈົ້າຂອງປະເທດຊາດຜືນແຜ່ນດິນອັນຄົບຖ້ວນຢ່າງແທ້ຈິງ,ມີຄວາມເປັນເອກະລາດມີອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນ ແລະ ມີກຽດສັກສີເທົ່າທຽມກັບຊາດອື່ນໃນໂລກ.
ຕະຫຼອດ 48 ປີຜ່ານມາ,ພາຍໃຕ້ການນໍາພາຂອງອົງຄະນະພັກແຂວງໄຊຍະບູລີ,ເມືອງເງິນ ໄດ້ມີການພັດທະນາມາເປັນແຕ່ລະໄລຍະ ເຮັດໃຫ້ເມືອງມີສະຖຽນລະພາບດ້ານການເມືອງຢ່າງໜັກແໜ້ນ,ເສດຖະກິດໄດ້ຮັບການຂະຫຍາຍຕົວເປັນກ້າວໆມາ ໂດຍສະເພາະແມ່ນການຜະລິດກະສິກໍາເປັນສິນຄ້າ,ສາມາດສະໜອງຢູ່ພາຍໃນມີຄວາມພຽງພໍ ແລະ ເປັນສິນຄ້າສົ່ງອອກ,ການແກ້ໄຂຄວາມທຸກຍາກຂອງປະຊາຊົນພາຍໃນເມືອງໃກ້ຈະສໍາເລັດແລ້ວ, ໄປຄ່ຽງຄູ່ກັນນີ້ ດ້ານການສຶກສາ, ສາທາລະນະສຸກ ຕໍ່ມາດຖານຕ່າງໆຂອງກະຊວງສາທາລະຍະສຸກ ແລະ ກະຊວງສຶກສາວາງອອກ ສ່ວນໃຫຍ່ແມ່ນເຮັດສໍາເລັດ.ປັດຈຸບັນທາງເມືອງຍັງສືບຕໍ່ປະຕິບັດແຜນພັດທະນາເສດຖະກິດຂອງຕົນ ເພື່ອສູ້ຊົນເຮັດໃຫ້ສໍາເລັດໃນທ້າຍປີ 2025. ໃນໂອກາດວັນຊາດ, ທາງເມືອງໄດ້ຕັ້ງໜ້າອອກແຮງແຂ່ງຂັນກັນປະຕິບັດວຽກງານຂອງຕົນຢ່າງຕັ້ງໜ້າ,ຈັດໃຫ້ມີຂະວນການອະນາໄມ ທໍາຄວາມສະອາດ ປະດັບປະດາຕົວເມືອງໃຫ້ມີຄວາມສວຍງາມ ແລະ ຂະບວນແຂ່ງຂັນກິລາມວນຊົນຢ່າງຟົດຟື້ນ.
ໃນໂອກາດວັນແຫ່ງຄວາມພາກພູມໃຈ ແລະປິຕິຊົມຊື່ນຕໍ່ວັນຊາດທີ 2 ທັນວາ 2023 ນີ້,ຕາງໜ້າຄະນະພັກ, ອົງການປົກຄອງ ແລະ ປະຊາຊົນເມືອງເງິນ ຂໍສະແດງຄວາມກະຕັນຮູ້ບຸນຄຸນຕໍ່ພັກ-ລັດຕໍ່ການນໍາແຕ່ລະຂັ້ນທີ່ໄດ້ສຸມສະຕິ, ປັນຍາ, ຄວາມຮູ້-ຄວາມສາມາດເຂົ້າໃສການນໍາພາ-ຊີ້ນໍາຢ່າງໃກ້ຊິດແທດເຖິງ ຊຶ່ງໄດ້ເຮັດໃຫ້ຄາດໝາຍຕ່າງໆໄດ້ຮັບການບຸກທະລຸ ແລະມີຜົນສໍາເລັດ.
ຂ້າພະເຈົ້າຂໍໃຫ້ຄໍາໝັ້ນສັນຍາວ່າ:ຈະນໍາພາປະຊາຊົນສືບຕໍ່ສ້າງ ບູລະນະລະບອບປະຊາທິປະໄຕ ກ້າວຂຶ້ນຢ່າງບໍ່ຢຸດຢັ້ງ, ປົກປັກຮັກສາມູນເຊື້ອອັນສະຫງ່າອົງອາດແຫ່ງການຕໍ່ສູ້ຕ້ານການຮຸກຮານ ຂອງສັດຕູຈາກພາຍນອກ; ສືບທອດມູນເຊື້ອອົງອາດຂອງບັນພະບູລຸດ; ປະຕິບັດ 12 ສິດ 3 ພັນທະ ຂອງພົນລະເມືອງລາວໃຫ້ເຂັ້ມງວດ; ສືບຕໍ່ປົກປັກຮັກສາ ແລະສ້າງສາພັດທະນາເມືອງເງິນ ກໍຄືປິຕຸພູມອັນແສນຮັກ ແລະຫວງແຫນນີ້ໄວ້ໃຫ້ໝັ້ນຄົງທະນົງຊົ່ວກາລະນານ.
ຄໍາເຫັນ