5 ປີຜ່ານມາ ການດໍາເນີນຄະດີຂອງ ສປສສ ໄດ້ຮັບການປັບປຸງຢ່າງຕໍ່ເນື່ອງ

ທ່ານ ໄພວີ ສີບົວລິພາ ກ່າວວ່າ: ຕະຫຼອດໄລຍະຜ່ານມາ, ສປສສ ໄດ້ເອົາໃຈໃສ່ນໍາພາຈັດຕັ້ງປະຕິບັດ ແຜນການເຄື່ອນໄຫວວຽກງານ 5 ປີ (2021-2025), ສານປະຊາຊົນໃນນາມອົງການຕຸລາການ ໄດ້ຕັ້ງໜ້າເຄື່ອນໄຫວປະຕິບັດໜ້າທີ່ ພາລະບົດບາດຂອງຕົນ ຕາມທີ່ລັດຖະທຳມະນູນ ແລະ ກົດໝາຍກຳນົດ ໂດຍມີຜົນສໍາເລັດໃນຫຼາຍໆດ້ານ ເປັນຕົ້ນ ກົນໄກແບບແຜນການດໍາເນີນຄະດີໄດ້ຮັບການປັບປຸງ ເຮັດໃຫ້ການພິຈາລະນາຕັດສິນ, ພິພາກສາຄະດີມີຄວາມວ່ອງໄວ, ຄົບຖ້ວນ, ຮອບດ້ານ ແລະ ພາວະວິໄສ, ຜູ້ພິພາກສາ ແລະ ພະນັກງານຂອງສານປະຊາຊົນໄດ້ຮັບການຍົກລະດັບທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ-ຈັນຍາທໍາ ແລະ ວິຊາສະເພາະ-ວິຊາການຢ່າງເປັນມືອາຊີບ; ດ້ານການຈັດຕັ້ງ, ບຸກຄະລາກອນຂອງສານໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງ ແລະ ມີການຂະຫຍາຍສານປະຊາຊົນເຂດຍັບເຂົ້າໃກ້ປະຊາຊົນ.
ສຳລັບແຜນການເຄື່ອນໄຫວວຽກງານ 5 ປີ (2026-2030) ຂອງສານປະຊາຊົນໃນຕໍ່ໜ້າມີຄື: ທິດທາງລວມ: 1). ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ໃຫ້ເປັນແຜນພັດທະນາລະບົບສານປະຊາຊົນໃນແຕ່ລະດ້ານ ຕາມທິດສ້າງບາດກ້າວບຸກທະລຸພັດທະນາລະບົບສານປະຊາຊົນໃຫ້ໜັກແໜ້ນ, ເຂັ້ມແຂງ ແລະ ຫັນໄປສູ່ທັນສະໄໝ ເຮັດໃຫ້ສານປະຊາຊົນ ສາມາດເຮັດໜ້າທີ່ປົກປ້ອງກົດໝາຍໃຫ້ມີຄວາມສັກສິດ, ເຂັ້ມງວດ ແລະ ຍຸຕິທຳ, 2). ຍົກສູງຄຸນນະພາບການດໍາເນີນຄະດີໃຫ້ມີຄຸນນະພາບ ແລະ ປະສິດທິພາບສູງ, ປັບປຸງ ແລະ ພັດທະນາກົນໄກການບໍລິຫານຄະດີໃຫ້ມີຄວາມໂປ່ງໃສ ຢູ່ໃນທຸກຂັ້ນຕອນການດໍາເນີນຄະດີ, ລົງເລິກການໂຕ້ແຍ່ງ-ໂຕ້ຖຽງໃນທີ່ປະຊຸມສານ, ຮັບປະກັນໃຫ້ການຕັດສິນ, ພິພາກສາຄະດີຖືກຕ້ອງຕາມກົດໝາຍ ແລະ ມີ ຄວາມເປັນຈິງ, ປັບປຸງ ແລະ ພັດທະນາລະບົບການດໍາເນີນຄະດີຂອງສານໃຫ້ມີຄວາມວ່ອງໄວ, ໂປ່ງໃສ, ມີຄຸນນະພາບ ແລະ ຫັນເປັນທັນສະໄໝ; 3). ປັບປຸງກົດໝາຍ ແລະ ນິຕິກຳໃຕ້ກົດໝາຍ ທີ່ກ່ຽວຂ້ອງກັບການດໍາເນີນຄະດີໃຫ້ມີຄວາມຄົບຖ້ວນ, ຮັດກຸມ, ເປັນແນວທາງໃນການປະຕິບັດໃນທຸກຂັ້ນຕອນຂອງການດໍາເນີນຄະດີໃຫ້ມີຄວາມຖືກຕ້ອງ ແລະ ເປັນເອກະພາບ ເຮັດໃຫ້ກົນໄກການດໍາເນີນຄະດີມີຂັ້ນຕອນທີ່ໂປ່ງໃສ, ວ່ອງໄວ ແລະ ຮັບປະກັນໃຫ້ການເກັບກຳຂໍ້ມູນຫຼັກຖານມີຄວາມຄົບຖ້ວນ, ຮອບດ້ານ ແລະ ການຕັດສິນຢ່າງພາວະວິໄສ; 4). ຍົກສູງຄວາມສາມາດຂອງຜູ້ພິພາກສາ, ພະນັກງານຂອງສານໃຫ້ມີຄຸນທາດການເມືອງໜັກແໜ້ນ, ມີຄວາມຮູ້, ຄວາມສາມາດທາງດ້ານວິຊາສະເພາະ, ວິຊາການ, ພາສາຕ່າງປະເທດ ສ້າງໃຫ້ການເຮັດວຽກແບບມືອາຊີບ ແລະ ເປັນຊ່ຽວຊານສະເພາະດ້ານ ເພື່ອບໍລິຫານຄະດີໃຫ້ມີຄຸນນະພາບ ແລະ ປະສິດທິພາບ, ຫັນເອົາຜູ້ພິພາກສາທີ່ມີ ປະສົບການຍັງອ່ອນນ້ອຍ ລົງກໍ່ສ້າງຮາກຖານຢູ່ທ້ອງຖິ່ນ ເພື່ອເກັບກ່ຽວປະສົບການ ແລະ ເປັນພະນັກງານສືບທອດປ່ຽນແທນໃນຕໍ່ໜ້າ; 5). ເພື່ອເຮັດໃຫ້ສານປະຊາຊົນມີພື້ນຖານໂຄງລ່າງທາງດ້ານວັດຖຸ, ເຕັກນິກທີ່ຈຳເປັນ ແລະ ເໝາະສົມກັບການປະຕິບັດໜ້າທີ່ວຽກງານ ເພື່ອຮັບປະກັນການປົກປ້ອງກົດໝາຍໃຫ້ມີຄວາມສັກສິດ, ເຂັ້ມງວດ ແລະ ຍຸຕິທຳ; 6). ໃຫ້ປະຊາຊົນໄດ້ຮັບການບໍລິການທີ່ດີ, ມີຄວາມເພິ່ງພໍໃຈ ແລະ ມີຄວາມເຄົາລົບ, ເຊື່ອຖືຕໍ່ລະບົບສານປະຊາຊົນ ໂດຍສະເພາະການຈັດຕັ້ງຂອງສານຍັບໃກ້ເຂົ້າຫາປະຊາຊົນ; 7). ເສີມຂະຫຍາຍການຮ່ວມມືກັບບັນດາສານປະເທດເພື່ອນມິດຍຸດທະສາດເຂົ້າສູ່ລວງເລິກ, ພົວພັນຮ່ວມມືກັບບັນດາສານປະເທດອາຊຽນ, ພາກພື້ນ ແລະ ສາກົນໃຫ້ກວ້າງຂວາງຂຶ້ນ.
ຄາດໝາຍສູ້ຊົນ: 1). ສ້າງຜູ້ພິພາກສາ, ພະນັກງານຂອງສານໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດ, ມີຈັນຍາບັນ-ຈັນຍາທໍາ, ສ້າງເປັນມືອາຊີບສະເພາະດ້ານ ເພື່ອຮັບປະກັນຄວາມສະຫງົບປອດໄພຢູ່ໃນການຈັດຕັ້ງຂອງສານ, ສ້າງຜູ້ພິພາກສາດີ-ເກັ່ງໃຫ້ໄດ້ຫຼາຍກວ່າ 85% ຂອງຈໍານວນຜູ້ພິພາກສາທີ່ໄດ້ຮັບການປະເມີນ; 2). ຂະຫຍາຍການຈັດຕັ້ງສານປະຊາຊົນເຂດໃຫ້ໄດ້ຢ່າງໜ້ອຍ 5 ແຫ່ງ, (ເຂດ 4 ແຂວງຈຳປາສັກ, ເຂດ 5 ແຂວງສະຫວັນນະເຂດ, ເຂດ 3 ແຂວງຄໍາມ່ວນ, ເຂດ 4 ແຂວງຫົວພັນ ແລະ ເຂດ 3 ແຂວງຫຼວງນໍ້າທາ) ປັບປຸງກົງຈັກການຈັດຕັ້ງພາຍໃນສານແຕ່ລະແຫ່ງໃຫ້ກະທັດຮັດ, ເປັນລະບົບຄົບຊຸດ, ໜັກແໜ້ນ ເຂັ້ມແຂງ, ສອດ ຄ່ອງກັບສະພາບຄວາມເປັນຈິງຂອງສານແຕ່ລະແຫ່ງ; 3). ສ້າງກົນໄກການບໍລິຫານຄະດີແບບໃໝ່ ເຮັດໃຫ້ມີຄວາມໂປ່ງໃສທຸກຂັ້ນຕອນໃນການດໍາເນີນຄະດີຢູ່ສານ ເພື່ອຮັບປະກັນໃຫ້ການພິຈາລະນາແກ້ໄຂຄະດີໃຫ້ມີຄວາມວ່ອງໄວບັນລຸຕາມມະຕິສະພາແຫ່ງຊາດກຳນົດ ຄື: ຄະດີແພ່ງ-ການຄ້າ 75% ຂຶ້ນໄປ, ຄະດີຄອບຄົວ-ເດັກ-ແຮງງານ ແລະ ປົກຄອງ 85% ຂຶ້ນໄປ ແລະ ຄະດີອາຍາ 90% ຂຶ້ນໄປ ທັງຮັບປະກັນຄຸນນະພາບ, ອັດຕາການຂໍອຸທອນແຕ່ລະປະເພດຄະດີບໍ່ໃຫ້ເກີນ 15% ແລະ ຄວາມພໍໃຈຂອງຄູ່ຄວາມຕໍ່ກັບການຕັດສິນ, ພິພາກສາ ແລະ ນໍາໄປຈັດຕັ້ງປະຕິບັດໃຫ້ຫຼາຍຂຶ້ນ ເພື່ອເຮັດໃຫ້ການຂໍລົບລ້າງຫຼຸດລົງໃນແຕ່ລະປີ; 4). ສ້າງ ແລະ ປັບປຸງກົດ ໝາຍທີ່ຢູ່ໃນຄວາມຮັບຜິດຊອບຂອງ ສປສສ ໃຫ້ສຳເລັດ 4 ສະບັບ (ການດໍາເນີນຄະດີເດັກ, ຄ່າທໍານຽມສານ, ດໍາເນີນຄະດີປົກຄອງ ແລະ ກົດໝາຍວ່າດ້ວຍສານປະຊາຊົນ) ຕາມແຜນການສ້າງ ແລະ ປັບປຸງກົດໝາຍທີ່ສະພາແຫ່ງຊາດຮັບຮອງ ແລະ ອອກນິຕິກຳໃຕ້ກົດໝາຍໃຫ້ໄດ້ຢ່າງໜ້ອຍປີລະ 10 ສະບັບ; 5), ສືບຕໍ່ຄົ້ນຄວ້າກົນໄກການບໍລິຫານສານໃຫ້ມີຄຸນນະພາບ ແລະ ເຂົ້າສູ່ທັນສະໄໝ, ສ້າງພື້ນຖານໂຄງລ່າງຂອງສານປະຊາຊົນແຕ່ລະຂັ້ນ ໃຫ້ຮອງຮັບການປະຕິບັດພາລະບົດບາດຂອງອົງການຕຸລາການຕາມທີ່ກົດໝາຍກໍານົດໄວ້.
ຂ່າວ: ແສງຈັນ; ພາບ: ສຳນານ