ທ່ານ ໄພວີ ສີບົວລິພາ ໄດ້ຊີ້ແຈງກ່ຽວກັບການປັບປຸງແຜນການໃຫ້ລະອຽດຊັດເຈນ, ສປສສ ພ້ອມແລ້ວທີ່ຈະຮັບເອົາໄປຄົ້ນຄວ້າປັບປຸງ ເປັນຕົ້ນ ຕົວເລກຄາດໝາຍຊິກຳນົດແນວໃດ ເພື່ອໃຫ້ເຫັນຢ່າງຊັດເຈນ ໃນການສູ້ຊົນເອົາຄະດີອອກໃນແຕ່ລະປີ, ການເພີ່ມກົນໄກປະສານສົມທົບກັບຄ້າຍຄຸມຂັງດັດສ້າງ ຊຶ່ງນອນໃນການດຳເນີນຄະດີຕາມຂະບວນການຍຸຕິທຳ ນີ້ແມ່ນຄວາມຈຳເປັນ ຊຶ່ງໄດ້ມີການກໍານົດຢ່າງລະອຽດ ແຕ່ໃນຂອດຕົວຈິງພວກເຮົາຕ້ອງໄດ້ມີການປະສານສົມທົບຕື່ມ ລວມທັງການປັບປຸງພື້ນຖານໂຄງລ່າງ, ການສ້າງບຸກຄະລາກອນໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຄວາມຮູ້-ຄວາມສາມາດ, ມີຄວາມສຳນານງານທາງດ້ານວິຊາການແມ່ນເຫັນດີທີ່ສຸດ ແລະ ບັນຫາອື່ນໆ ທີ່ຕິດພັນກັບແຜນການ ເຫັນວ່າມັນຍັງບໍທັນຈະແຈ້ງ. ພວກຂ້າພະເຈົ້າ ພ້ອມແລ້ວທີ່ຈະນໍາເອົາໄປຄົ້ນຄວ້າປັບປຸງ ແກ້ໄຂບັນຫາໃຫ້ມີຄວາມຊັດເຈນຈະແຈ້ງຕື່ມ, ຊຶ່ງໃນແຜນພັດທະນາທີ່ໄດ້ສະເໜີໄປນັ້ນໃນຕົວຈິງມີ 24 ໂຄງການ 81 ແຜນງານນີ້ແມ່ນບັນຫາທີສອງ; ບັນຫາທີ 3 ກ່ຽວກັບການສະເໜີໃຫ້ປັບປຸງແກ້ໄຂບັນຫາທີ່ຍັງຄົງຄ້າງ ຊຶ່ງຕິດພັນກັບແບບແຜນວິທີເຮັດວຽກ ອັນທີ 1 ເລື່ອງການສ້າງບຸກຄະລາກອນເປັນມືອາຊີບ ໂດຍສະເພາະແມ່ນຄູຝຶກ ໂດຍເຫັນດີໃນ 5 ປີຕໍ່ໜ້າ ຈະສຸມໃສ່ໃນການສ້າງບຸກຄະລາກອນໃຫ້ເປັນມືອາຊີບ, ກ່ອນອື່ນໝົດແມ່ນສ້າງຄູຝຶກ ເພື່ອຖ່າຍທອດໃຫ້ຜູ້ພິພາກສາ ຜູ້ຊ່ວຍຜູ້ພິພາກສາ, ພະນັກງານວິຊາການຕ່າງໆ ຊຶ່ງພວກເຮົາຈະປັບປຸງຫຼັກສູດ ພ້ອມທັງສະເໜີເອົາຜູ້ທີ່ມີຄວາມຮູ້-ຄວາມສາມາດຈາກພາຍໃນ ແລະ ຕ່າງປະເທດ ມາຖ່າຍທອດຄວາມຮູ້ ສ້າງຄູຝຶກໃຫ້ມີຄຸນນະພາບ ກ້າວໄປສູ່ການສ້າງຜູ້ສືບທອດໃນການປະຕິບັດຕົວຈິງ; ສຳລັບການສ້າງຄວາມເຂັ້ມແຂງໃຫ້ຄະດີປົກຄອງ, ຄະດີເດັກ ແລະ ອື່ນໆ ເປັນສິ່ງທ້າທາຍໃນຫຼາຍດ້ານ ຊຶ່ງໃນ 5 ປີຕໍ່ໜ້າ ພວກເຮົາຈະພະຍາຍາມສົມທົບກັບທຸກຂະແໜງການກ່ຽວຂ້ອງ ພະຍາຍາມສູ້ຊົນໃຫ້ບັນລຸຕາມຄາດໝາຍທີ່ກຳນົດໄວ້. ກ່ຽວກັບການເກັບມ້ຽນສຳນວນຄະດີ ຄຳຕັດສິນເປັນບັນຫາທີ່ເກີດມາແຕ່ດົນ ແລະ ກໍເປັນບັນຫາໃໝ່ແດ່ ສານແຕ່ລະຂັ້ນຕ້ອງມີບ່ອນເກັບມ້ຽນເອກະສານຢູ່ແລ້ວ ເພື່ອບໍ່ໃຫ້ເອະສານຕົກເຮ່າຍເສຍຫາຍ ໂດຍສະເພາະຂໍ້ມູນຫຼັກຖານ ແລະ ອັນໃໝ່ນີ້, ຄະດີທີ່ສານຕັດສິນໃຊ້ໄດ້ເດັດຂາດພວກເຮົາຈະບໍ່ໄດ້ສົ່ງສຳນວນຄະດີ ຫຼືຄຳຕັດສິນໄປໃຫ້ອົງການປະຕິບັດຄຳຕັດສິນ ຈະຮັກສາສຳນວນທັງໝົດຢູ່ໃນສານປະຊາຊົນ ແລະ ສົ່ງແຕ່ສະບັບກັອບປີ້ໄປໃຫ້ອົງການປະຕິບັດຄຳຕັດສິນ. ສະນັ້ນ, ພວກເຮົາຈະສຸມໃສ່ສ້າງລະບົບເກັບກຳຂໍ້ມູນສຳນວນຄະດີເພື່ອບໍ່ໃຫ້ຕົກເຮ່ຍເສຍຫາຍ. ອີກບັນຫາໜຶ່ງ ຄວນຫຼຸດບໍມາດຖານເງື່ອນໄຂຂອງຜູ້ພິພາກສາ ໂດຍສະເພາະຢູ່ສານເຂດ ຜູ້ພິພາກສາຊັ້ນ 1, ຊັ້ນ 2 ເພື່ອຮັບປະກັນຈຳນວນບຸກຄະລາກອນທີ່ຈະເປັນຜູ້ພິພາກສາເພີ່ມຂຶ້ນ ສະ ເໜີໃຫ້ຜູ້ແທນມີຄຳເຫັນຕື່ມ ຊຶ່ງມາດເງື່ອນໄຂຂອງຜູ້ພິພາກສາໄດ້ກຳນົດລະອຽດຈະແຈ້ງໃນກົດໝາຍແລ້ວ ສະນັ້ນມາດຖານເງື່ອນໄຂນີ້ແມ່ນມີຄວາມເປັນເອກະພາບ ຖ້າຫາກຫຼຸດມາດຖານເງື່ອນໄຂດັ່ງກ່າວມັນຈະກະທົບຕໍ່ການດຳເນີນຄະດີ, ເພື່ອຮັບປະກັນຄວາມຖຶກຕ້ອງພວກເຮົາຕ້ອງໄດ້ມີການປະສານສົມທົບກັບອົງການປົກຄອງທ້ອງຖິ່ນຕື່ມ ເພື່ອຄວາມເປັນເອກະພາບ; ຕໍ່ກັບບັນຫາການແກ້ໄຂເງິນອຸດໝູນຜູ້ພິພາກສາຊັ້ນ 1,2,3,4 ໄດ້ກຳນົດແຈ້ງແລ້ວຢູ່ໃນກົດໝາຍວ່າດ້ວຍຜູ້ພິພາກສາສະບັບປັບປຸງ ແຕ່ການປະຕິບັດຕົວຈິງອາດຈະມີການຄາດເຄື່ອນ. ສະນັ້ນໃນ 5 ປີຕໍ່ໜ້າ, ພວກເຮົາຈະໄດ້ກວດກາຄືນ ແລະ ສະເໜີຫາພາກສ່ວນກ່ຽວຂ້ອງ ໂດຍສະເພາະລັດຖະບານ ເພື່ອຄົ້ນຄວ້າສະໜອງງົບປະມານ ໃຫ້ບັນດາຜູ້ພິພາກສາທີ່ໄດ້ຮັບອຸດໜູນ ເພື່ອຄວາມເປັນເອກະພາບໃນທົ່ວປະເທດ; ສຳລັບການແກ້ໄຂຂອງກາງຄະດີຕາມດຳລັດ 280 ແມ່ນເຫັນດີຕາມຄຳສະເໜີຂອງທ່ານນາຍົກລັດຖະ ມົນຕີ ແລະ ຫຼາຍທ່ານສະເໜີໃຫ້ເບິ່ງຄືນການສ້າງຕັ້ງສານປະຊາຊົນເຂດ ຢູ່ໃນແຜນງານ ໂຄງການນີ້ ພວກເຮົາໄດ້ກຳນົດແຈ້ງແລ້ວ ໃນການສ້າງຕັ້ງສານເຂດຢ່າງໜ້ອຍແມ່ນ 5 ເຂດຂຶ້ນໄປ ແລະ ແຕ່ລະຈຸດໄດ້ກຳນົດແຈ້ງແລ້ວ ສຳລັບໜ່ວຍງານສານເຂດປະຈຳເມືອງ, ຜ່ານມາ ມີແຜນຈະສ້າງແລ້ວ ແຕ່ການຈັດຕັ້ງປະຕິບັດຕົວຈິງບໍ່ສຳເລັດ ເນື່ອງຈາກມີຫຼາຍປັດໃຈບໍ່ສາມາດບັນລຸໄດ້, ໃນຕໍ່ໜ້າ ພວກເຮົາຈະພະຍາຍາມສູ້ຊົນໃນສິ່ງທີ່ມີຄວາມຈຳເປັນຈະຕ້ອງໄດ້ເຮັດ ໂດຍສະເພາະການສ້າງໜ່ວຍງານສານເຂດປະຈຳເມືອງ ເພື່ອອຳນວຍຄວາມສະດວກໃຫ້ປະຊາຊົນໄດ້ເຂົ້າເຖິງສານໄດ້ງ່າຍຂຶ້ນ. ຂ່າວ: ພູວັນ; ພາບ: ສຳນານ
ຜົນກອງປະຊຸມລັດຖະບານສະໄໝສາມັນ ປະຈຳເດືອນກັນຍາ
ໃນຕອນແລງວັນທີ 23 ກັນຍາ ນີ້ ທີ່ສໍານັກງານນາຍົກລັດຖະມົນຕີ, ທ່ານ ເຂິງຄໍາ ແກ້ວໜູຈັນ ຮອງລັດຖະມົນຕີ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຖະແຫຼງຂ່າວ ຕໍ່ສື່ມວນຊົນ ກ່ຽວກັບຜົນກອງປະຊຸມລັດຖະບານສະໄໝສາມັນ ປະຈຳເດືອນກັນຍາ 2026 ໃຫ້ຮູ້ວ່າ: ກອງປະຊຸມດັ່ງກ່າວ ໄດ້ເປີດຂຶ້ນໃນຕອນເຊົ້າວັນທີ 22 ແລະ ອັດລົງໃນຕອນແລງວັນທີ 23 ກັນຍາ 2026 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ; ມີບັນດາທ່ານ ຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າ ຈາກບັນດາກະຊວງ-ອົງການ ເຂົ້າຮ່ວມແບບເຊິ່ງໜ້າ; ນອກນັ້ນ ຍັງມີບັນດາຄະນະນຳອົງການປົກຄອງທ້ອງຖິ່ນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງ ແລະ ປະກອບຄຳເຫັນ ຕໍ່ການລາຍງານສະພາບພົ້ນເດັ່ນ ປະຈຳເດືອນກັນຍາ ແລະ ທິດທາງແຜນວຽກຈຸດສຸມ ປະຈຳເດືອນຕຸລາ 2026.
ຄໍາເຫັນ