 |
ໂດຍສະເພາະດ້ານວຽກງານ ຮສສ ກໍແມ່ນຂົງເຂດໜຶ່ງທີ່ສະໜອງການບໍລິການແກ່ສັງຄົມ ຊຶ່ງໄດ້ຮັບການສ້າງຕັ້ງໃນປີ 1993 ແລະ ໄດ້ຮັບການພັດທະນາຢ່າງຕໍ່ເນື່ອງທັງດ້ານນິຕິກຳ ແລະ ວຽກງານວິຊາສະເພາະ ໂດຍໄດ້ສຸມໃສ່ໃນການສ້າງ ແລະ ປັບປຸງບັນດານິຕິກຳທີ່ກ່ຽວຂ້ອງໄດ້ຫຼາຍສະບັບ. ໃນນີ້, ມີກົດໝາຍ 7 ສະບັບ ແລະ ນິຕິກຳລຸ່ມກົດໝາຍຈຳນວນໜຶ່ງ ເພື່ອນຳໃຊ້ເປັນເຄື່ອງມື ແລະ ບ່ອນອີງໃນການຈັດຕັ້ງປະຕິບັດ; ດ້ານວຽກງານວິຊາສະເພາະກໍໄດ້ເອົາໃຈໃສ່ໃນການພັດທະນາກໍາລັງແຮງງານລາວໃຫ້ມີສີມືແຮງງານ, ມີທັດສະນະຄະຕິ ແລະ ລະບຽບວິໄນໃນການອອກແຮງງານ, ມີວຽກເຮັດງານທຳ, ມີລາຍໄດ້ທີ່ໝັ້ນຄົງ ແລະ ໄດ້ຮັບການປົກປ້ອງສິດ ແລະ ຜົນປະໂຫຍດອັນຊອບທຳຕາມລະບຽບກົດໝາຍ, ຜູ້ມີຜົນງານໃນພາລະກິດປະຕິວັດຕໍ່ສູ້ປົດປ່ອຍຊາດໄດ້ຮັບການຕອບບຸນແທນຄຸນຕາມແຕ່ລະເງື່ອນໄຂຕົວຈິງ, ຜູ້ປະສົບໄພພິບັດ, ຜູ້ດ້ອຍໂອກາດ ແລະ ຜູ້ຍົກຍ້າຍຖິ່ນຖານກໍໄດ້ຮັບການຊ່ວຍເຫຼືອສົງເຄາະຈາກພາກລັດ ແລະ ສັງຄົມຢ່າງເໝາະສົມ ສະແດງອອກໃນປັດຈຸບັນຂະແໜງ ຮສສ ມີສະຖານພັດທະນາສີມືແຮງງານທີ່ຂຶ້ນກັບທັງຢູ່ຂັ້ນສູນກາງ ແລະ ຂັ້ນແຂວງທັງໝົດ 19 ແຫ່ງ. ໃນນີ້, ພາກລັດມີ 7 ແຫ່ງ ແລະ ພາກເອກະຊົນ 12 ແຫ່ງ ແລະ ໄດ້ສຸມໃສ່ໃນການສ້າງມາດຕະຖານ ແລະ ຫຼັກສູດການພັດທະນາຝຶກສີມືແຮງງານໃນຂະແໜງອຸດສາຫະກຳ, ກະສິກຳ ແລະ ບໍລິການໃຫ້ເປັນລະບົບ ແລະ ກາຍເປັນມາດຕະຖານສີມືແຮງງານແຫ່ງຊາດ ສາມາດເຊື່ອມໂຍງກັບບາງປະເທດສະມາຊິກອາຊຽນໄດ້ສຳເລັດຈຳນວນ 44 ສາຂາອາຊີບ ສາມາດພັດທະນາສີມືແຮງງານໃຫ້ຜູ້ບໍ່ມີວິຊາຊີບ, ຜູ້ຕ້ອງການປ່ຽນອາຊີບ, ຜູ້ຫວ່າງງານ ແລະ ຜູ້ທີ່ຈະເຂົ້າສູ່ຕໍາ ແໜ່ງງານໃໝ່ຢູ່ບັນດາສະຖານພັດທະນາສີມືແຮງງານດັ່ງກ່າວໄດ້ສະເລ່ຍປະມານ 3,000 ກວ່າຄົນຕໍ່ປີ. ນອກນີ້, ໄດ້ຊຸກຍູ້ສົ່ງເສີມບັນດາຫົວໜ່ວຍແຮງງານ ແລະ ໂຄງການລົງທຶນຕ່າງໆ ພັດທະນາສີມືແຮງງານຕາມມາດຕະຖານສີມືແຮງງານໄດ້ສະເລ່ຍ 31,967 ຄົນຕໍ່ປີ, ສາມາດສົ່ງເສີມການຈັດຫາວຽກເຮັດງານທໍາເຂົ້າສູ່ຕະຫຼາດແຮງງານພາຍໃນ ແລະ ຕ່າງປະເທດໄດ້ສະເລ່ຍ 100,000 ກວ່າຄົນຕໍ່ປີ. ໃນນີ້, ຈັດຫາວຽກເຮັດງານທໍາພາຍໃນສະເລ່ຍ 26,300 ຄົນຕໍ່ປີ ແລະ ຈັດສົ່ງແຮງງານລາວໄປເຮັດວຽກຢູ່ຕ່າງປະເທດສະເລ່ຍ 73,700 ຄົນຕໍ່ປີ.
 |
ຂົງເຂດວຽກງານສະຫວັດດີການ-ສັງຄົມ ກໍໄດ້ຮັບການປັບປຸງ ແລະ ຈັດຕັ້ງປະຕິບັດຢ່າງເປັນລະບົບ ໂດຍສະເພາະວຽກງານປະກັນສັງຄົມ ກໍໄດ້ສຸມໃສ່ປັບປຸງລະບົບໃຫ້ມີຄວາມທັນສະໄໝ ແລະ ຂະຫຍາຍອັດຕາການປົກຄຸມຂອງລະບົບໃຫ້ນັບມື້ນັບກວ້າງຂວາງ. ມາຮອດປັດຈຸບັນມີຜູ້ໄດ້ຮັບການຄຸ້ມຄອງຈາກລະບົບປະກັນສັງຄົມທັງໝົດ 921,341 ຄົນ. ໃນນີ້, ພາກລັດມີ 478,208 ຄົນ, ພາກວິສາຫະກິດ ແລະ ຜູ້ສະໝັກໃຈ 443,133 ຄົນ; ວຽກນະໂຍບາຍສະແດງຄວາມກະຕັນຍູຮູ້ບຸນຄຸນຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ກໍໄດ້ສຳເລັດການແກ້ໄຂນະໂຍບາຍຕາມແຕ່ລະເປົ້າໝາຍບຸລິມະສິດໄດ້ທັງໝົດ 62,232 ທ່ານ ເປັນເງິນ 998.72 ຕື້ກວ່າກີບ ແລະ ຍັງເຫຼືອປະມານ 31,355 ທ່ານ, ຕ້ອງການງົບປະມານ 479 ຕື້ກວ່າກີບ. ວຽກສັງຄົມສົງເຄາະ-ໄພພິບັດ, ເກັບກູ້ລະເບີດບໍ່ທັນແຕກເປັນສ່ວນໜຶ່ງຂອງນະໂຍບາຍດ້ານມະນຸດສະທຳຂອງພັກ-ລັດຖະບານ ໄດ້ຮັບການຈັດຕັ້ງປະຕິບັດ ແລະ ພັດທະນາໄປຕາມການເຕີບໂຕທາງດ້ານການພັດທະນາເສດຖະກິດ-ສັງຄົມແຕ່ລະໄລຍະ.
ທ່ານ ນາງ ແກ້ວ ຈັນທະວີໄຊ ກ່າວຕື່ມວ່າ: ໃນຕໍ່ໜ້າຂະແໜງ ຮສສ ຍັງຕ້ອງໄດ້ເພີ່ມທະວີການສ້າງ ແລະ ປັບປຸງກົດໝາຍ ແລະ ລະບຽບການເພື່ອເປັນເຄື່ອງມືໃນການຄຸ້ມຄອງບໍລິຫານວຽກງານໃຫ້ມີຄວາມຮັດກຸມ ແລະ ສອດຄ່ອງກັບສະພາບຄວາມເປັນຈິງໃນແຕ່ລະໄລຍະ, ສຸມໃສ່ໃນການພັດທະນາກໍາລັງແຮງງານໃຫ້ມີຄວາມຮູ້ຄວາມສາມາດ ແລະ ສີມືແຮງງານ ສາມາດຕອບສະໜອງຕາມຄວາມຕ້ອງການຂອງຕະຫຼາດແຮງງານ ພ້ອມທັງສົ່ງເສີມການປະກອບອາຊີບອິດສະຫຼະຢ່າງກວ້າງຂວາງ. ເພີ່ມທະວີການປົກປ້ອງ ແລະ ຄຸ້ມຄອງແຮງງານເພື່ອຮັບປະກັນສິດຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານຕາມລະບຽບກົດໝາຍ, ສືບຕໍ່ພັດທະນາ ແລະ ຄຸ້ມຄອງລະບົບປະກັນສັງຄົມໃຫ້ມີຄວາມເຂັ້ມແຂງ, ມີປະສິດທິພາບ ແລະ ຍືນຍົງ, ປະຕິບັດນະໂຍບາຍຕໍ່ຜູ້ທີ່ມີຜົນງານ, ຄຸນງາມຄວາມດີໃນພາລະກິດປະຕິວັດໃຫ້ສຳເລັດ. ປັບປຸງ ແລະ ພັດທະນາລະບົບສັງຄົມສົງເຄາະ ແລະ ກົນໄກການຄຸ້ມຄອງໄພພິບັດໃຫ້ມີຄວາມເຂັ້ມແຂງ, ປັບປຸງກົງຈັກການຈັດຕັ້ງຂອງຂະແໜງແຮງງານ ແລະ ສະຫວັດດີການສັງຄົມໃຫ້ກະທັດຮັດສົມເຫດສົມຜົນ ແລະ ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ນຳໃຊ້ຂໍ້ມູນ-ຂ່າວສານທີ່ທັນສະໄໝເຂົ້າໃນການພັດທະນາວຽກ ຮສສ ຢ່າງກວ້າງຂວາງ.
 |
ເນື່ອງໃນໂອກາດວັນສຳຄັນຂອງຊາດ, ທ່ານ ນາງ ແກ້ວ ຈັນທະວີໄຊ ໄດ້ຕາງໜ້າໃຫ້ຄະນະພັກ-ຄະນະນຳ ແລະ ພະນັກງານ-ລັດຖະກອນທົ່ວຂະແໜງ ຮສສ ຂໍສະແດງຄວາມຮູ້ບຸນຄຸນມາຍັງການນໍາພັກ-ລັດທີ່ໄດ້ຊີ້ນໍາ-ນໍາພາຂະແໜງ ຮສສ ເຕີບໃຫຍ່ຂະຫຍາຍຕົວເປັນກ້າວໆມາ ພ້ອມທັງອວຍພອນໄຊອັນປະເສີດມາຍັງການນໍາພັກ-ລັດທຸກຂັ້ນ, ພະນັກງານປະຕິວັດອາວຸໂສບຳນານ, ນາຍ ແລະ ພົນທະຫານ ຕະຫຼອດເຖິງປະຊາຊົນບັນດາເຜົ່າໃນທົ່ວປະເທດຈົ່ງມີສຸຂະພາບແຂງແຮງ ພ້ອມກັນສະເຫຼີມສະຫຼອງວັນສຳຄັນດັ່ງກ່າວດ້ວຍຄວາມເບີກ ບານມ່ວນຊື່ນ ແລະ ເປັນຂະບວນການຟົດຟື້ນຢ່າງກວ້າງຂວາງ.
ຄໍາເຫັນ