ຂ້າພະເຈົ້າ, ໃນນາມເປັນລູກຫຼານຂອງປະຊາຊົນລາວບັນດາເຜົ່າ ແລະ ໃນນາມນັກຄົ້ນຄວ້າວິທະຍາສາດແລະກຳນົດນະໂຍບາຍພັດທະນາເສດຖະກິດ-ສັງຄົມ,ມີຄວາມພາກພູມໃຈຢ່າງຫາອັນປຽບບໍ່ໄດ້ຕໍ່ຜົນສຳເລັດ ອັນຍິ່ງໃຫຍ່ທີ່ ສປປລາວ ພວກເຮົາ ຍາດມາໄດ້. ກ່ອນອື່ນໝົດຂໍສະແດງຄວາມຮູ້ບຸນຄຸນຢ່າງລົ້ນເຫຼືອຕໍ່ບັນດາທ່ານວິລະບູລຸດຂອງຊາດ, ຜູ້ນຳພັກ-ລັດ ຮຸ່ນກໍ່ຕັ້ງ, ພະນັກງານ, ທະຫານ, ຕຳຫຼວດແລະປະຊາຊົນລາວບັນດາເຜົ່າທີ່ຮັກຊາດທຸກທົ່ວໜ້າທີ່ໄດ້ເສຍສະຫຼະເລືອດເນື້ອ, ເຫື່ອແຮງແລະສະຕິປັນຍາຢ່າງລະອິດລະອ້ຽວ ເຂົ້າໃນການຕໍ່ສູ້ກູ້ຊາດຢ່າງພິລະອາດຫານ ຈົນສາມາດປົດປ່ອຍປະເທດຊາດອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າແລະໃໝ່, ຍາດເອົາເອກະລາດ, ອະທິປະໄຕແລະຜືນແຜ່ນດິນອັນຄົບຖ້ວນກັບຄືນມາສູ່ອ້ອມກອດຂອງປວງຊົນລາວທັງຊາດ, ເຊິ່ງໄດ້ນຳເອົາສິດເສລີພາບ, ເອກະລາດ, ປະຊາທິປະໄຕແລະຄວາມເປັນເຈົ້າຕົນເອງມາສູ່ປະຊາຊົນລາວທຸກຖ້ວນໜ້າຈົນມາເຖິງທຸກວັນນີ້.
ຕະຫຼອດໄລຍະເຄິ່ງສະຕະວັດທີ່ຜ່ານມາ, ພາຍໃຕ້ການນໍາພາ ອັນສະຫຼາດສ່ອງໃສຂອງພັກປະຊາຊົນປະຕິວັດລາວປະເທດຊາດຂອງພວກເຮົາໄດ້ປະຕິບັດສອງໜ້າທີ່ຍຸດທະສາດຄື: ການປົກປັກຮັກສາແລະສ້າງສາພັດທະນາໄດ້ຢ່າງມີໄຊ ແລະ ພັດທະນາຄວາມສີວິໄລເພີ່ມຂື້ນເປັນກ້າວໆ.ປະເທດຊາດມີສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີຄວາມສະຫງົບແລະເປັນລະບຽບຮຽບຮ້ອຍໂດຍພື້ນຖານ, ປະຊາຊົນໄດ້ດຳລົງຊີວິດແລະປະກອບອາຊີບຢ່າງສຸຈະລິດໃນຜືນແຜ່ນດິນທີ່ມີສັນຕິພາບ, ເອກະລາດ ປະຊາທິປະໄຕ ເອກະພາບ ແລະ ວັດທະນະຖາວອນ.
ຈາກທີ່ເຄີຍເປັນປະເທດທີ່ທຸກຍາກ ດ້ອຍພັດທະນາ, ບໍ່ມີຊາຍແດນຕິດກັບທະເລ (Land-locked) ໄດ້ຫັນປ່ຽນມາເປັນປະເທດເຊື່ອມໂຍງ-ເຊື່ອມຈອດ (Land-linked) ຢ່າງສົມບູນ. ເສັ້ນທາງລົດໄຟ, ທາງດ່ວນ, ເສັ້ນທາງຫຼວງແຫ່ງຊາດ, ລະບົບຄົມມະນາຄົມຂົນສົ່ງໄດ້ເຊື່ອມຕໍ່ຕົວເມືອງແລະຊົນນະບົດ, ເຊື່ອມໂຍງເຂົ້າກັບພາກພື້ນແລະສາກົນ. ລະບົບໄຟຟ້າ, ນໍ້າປະປາ, ໂທລະຄົມມະນາຄົມແລະດາວທຽມລາວໄດ້ຮັບການພັດທະນາຢ່າງກ້າວກະໂດດ.
ໂຄງປະກອບເສດຖະກິດໄດ້ຫັນປ່ຽນໄປສູ່ຄວາມທັນສະໄໝພາຍໃຕ້ກົນໄກຕະຫຼາດຕາມທິດສັງຄົມນິຍົມ. ພາກສ່ວນເສດຖະກິດທັງພາກລັດ, ພາກເອກະຊົນແລະລວມໝູ່ປະຊາຊົນໄດ້ຮັບການພັດທະນາ ແລະ ຂະຫຍາຍຕົວຢ່າງແຂງແຮງ. ໂຮງຈັກໂຮງງານ, ຖານການຜະລິດກະສິກຳແລະການບໍລິການໄດ້ເກີດຂຶ້ນຢ່າງຫຼວງຫຼາຍ. ຕະຫຼາດເງິນແລະຕະຫຼາດທຶນໄດ້ຮັບການສ້າງຕັ້ງແລະເຕີບໃຫຍ່ຢ່າງບໍ່ຢຸດຢັ້ງ, ອັນໄດ້ອຳນວຍ ແລະ ສ້າງຄວາມຮັ່ງມີໃຫ້ແກ່ຫົວໜ່ວຍຄອບຄົວ, ສັງຄົມແລະປະເທດຊາດ, ເຮັດໃຫ້ຄວາມທຸກຍາກຂອງປະຊາຊົນຫຼຸດລົງເທື່ອລະກ້າວ;ໂຮງຮຽນ, ໂຮງໝໍແລະສູນບໍລິການສາທາລະນະໄດ້ຮັບການກໍ່ສ້າງແລະຂະຫຍາຍຕົວໄປທົ່ວທຸກທ້ອງຖິ່ນ ໃນຂອບເຂດທົ່ວປະເທດ, ເປີດໂອກາດໃຫ້ປະຊາຊົນເຂົ້າເຖິງການສຶກສາແລະການບໍລິການສຸຂະພາບໄດ້ຢ່າງທົ່ວເຖິງ ແລະ ນັບມື້ຄຸນນະພາບສູງຂື້ນ.
ໃນຕໍ່ໜ້າ, ໃນນາມນັກຄົ້ນຄວ້າວິທະຍາສາດ, ຂ້າພະເຈົ້າຮັບຮູ້ດີວ່າເຖິງແມ່ນພວກເຮົາຈະຍາດໄດ້ຜົນສຳເລັດຫຼາຍດ້ານແລ້ວກໍຕາມ, ແຕ່ເສດຖະກິດຂອງລາວເຮົາ ກໍຍັງມີຄວາມອ່ອນນ້ອຍ ແລະ ບອບບາງເຊິ່ງໄດ້ຮັບຜົນກະທົບຈາກພາຍນອກ ຍ້ອນຄວາມບໍ່ແນ່ນອນຂອງສະພາບເສດຖະກິດ ແລະ ການເມືອງໂລກ. ພ້ອມກັນນັ້ນ, ກໍເຫັນວ່າ ການຄຸ້ມຄອງບໍລິຫານພາຍໃນກໍຍັງຕ້ອງໄດ້ຮັບການປັບປຸງທາງດ້ານປະສິດທິພາບໃຫ້ດີຂື້ນເທື່ອລະກ້າວເພື່ອສືບຕໍ່ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຍີ່ງຂື້ນ. ສິ່ງຄຳຄັນທີ່ເປັນບູລິມະສິດອັນໜື່ງ ພວກເຮົາຕ້ອງໄດ້ເອົາໃຈໃສ່ການພັດທະນາຊັບພະຍາກອນມະນຸດ,ສ້າງແຮງງານລາວໃຫ້ມີຄຸນນະພາບສູງ, ມີທັກສະທີ່ທັນສະໄໝ, ຮູ້ເທົ່າທັນເຕັກໂນໂລຊີແລະນະວັດຕະກຳໃໝ່ເພື່ອຮອງຮັບຍຸກອຸດສາຫະກຳ 4.0. ພ້ອມກັນ ປະຕິຮູບກົນໄກເສດຖະກິດໂດຍສະເພາະ ປັບປຸງລັດວິສາຫະກິດໃຫ້ເຂັ້ມແຂງ, ໂປ່ງໃສ, ຕີຖອຍ ແລະ ກ້າວໄປສູ່ ການລົບລ້າງການສໍ້ລາດບັງຫຼວງ ທີ່ເປັນຕົວກົດໜ່ວງ ຖ່ວງດຶງການພັດທະນາ ແລະ ຖືສຳຄັນການຫັນເປັນທັນສະໄໝເພື່ອໃຫ້ສາມາດແຂ່ງຂັນໄດ້ໃນຍຸກຂອງໂລກາພິວັດໄດ້ຢ່າງມີປະສິດທິພາບ.ສ້າງແລະຂະຫຍາຍເສດຖະກິດລວມໝູ່ປະຊາຊົນ ໂດຍສະເພາະ"ສະຫະກອນ" ໃຫ້ເຂັ້ມແຂງ ແລະ ທັນສະໄໝທັງໃນລວງກວ້າງແລະລວງເລິກ, ເຮັດໃຫ້ເສດຖະກິດລວມໝູ່ເປັນຂອງປະຊາຊົນ, ໂດຍປະຊາຊົນແລະເພື່ອຜົນປະໂຫຍດຂອງປະຊາຊົນຢ່າງແທ້ຈິງ.ສົ່ງເສີມ SME ແລະການລົງທຶນທັງພາຍໃນ ແລະ ຕ່າງປະເທດ,ດຶງດູດການລົງທຶນທີ່ມີຄຸນນະພາບ, ເປັນມິດກັບສິ່ງແວດລ້ອມ, ຫຼີກລ່ຽງການຕັດໄມ້ທຳລາຍປ່າຫຼືການຂຸດຄົ້ນຊັບພະຍາກອນທຳມະຊາດທີ່ເກີນຂອບເຂດ, ພ້ອມທັງປ້ອງກັນໄພພິບັດທຳມະຊາດແລະໄພທີ່ເກີດຈາກມະນຸດ.ການແກ້ໄຂບັນຫາສັງຄົມເປັນຕົ້ນຈັດການກັບບັນຫາປະກົດການຫຍໍ້ທໍ້ ແລະ ໄພສັງຄົມຢ່າງເດັດຂາດເຊັ່ນ: ການຄ້າມະນຸດ, ຢາເສບຕິດ, ອາຊະຍາກຳທາງໄຊເບີ (Call Center), ການເຂົ້າ-ອອກເມືອງຜິດກົດໝາຍແລະການຄ້າຂາຍເຖື່ອນເພື່ອສ້າງສັງຄົມທີ່ປອດໄພແລະເປັນລະບຽບຮຽບຮ້ອຍ. ພ້ອມນັ້ນ, ຍັງສືບຕໍ່ພັດທະນາ ການເຊື່ອມໂຍງສາກົນ,ສ້າງສປປລາວໃຫ້ກາຍເປັນສູນກາງການຄ້າ, ການບໍລິການແລະການຂົນສົ່ງ (Logistics Hub) ຂອງພາກພື້ນ. ເປີດກວ້າງການຮ່ວມມືກັບນານາຊາດແລະເຊື້ອເຊີນພີ່ນ້ອງຄົນລາວຢູ່ຕ່າງປະເທດຜູ້ທີ່ມີໃຈຮັກຊາດໃຫ້ກັບຄືນມາຢ້ຽມຢາມ, ດຳລົງຊີວິດແລະລົງທຶນສ້າງສາພັດທະນາບ້ານເກີດເມືອງນອນຂອງຕົນ.
ຂ້າພະເຈົ້າເອງມີຄວາມພາກພູມໃຈເປັນຢ່າງຍິ່ງທີ່ໄດ້ເກີດມາເປັນຄົນລາວຢູ່ພາຍໃຕ້ການນໍາພາ ຂອງພັກ-ລັດຖະບານແຫ່ງສາທາລະນະລັດປະຊາທິປະໄຕປະຊາຊົນລາວ. ໄດ້ດຳລົງຊີວິດຢູ່ໃນປະເທດທີ່ມີສັນຕິພາບ, ມີເອກະລາດມີປະຊາທິປະໄຕ, ມີຄວາມເປັນເອກະພາບ ແລະມີກຽດສັກສີຄືຄວາມໂຊກດີອັນປະເສີດ ຫາອັນປຽບບໍ່ໄດ້.
ໃນວາລະຄົບຮອບ 50 ປີນີ້, ຂ້າພະເຈົ້າຂໍອຸທິດແລະໃຫ້ຄຳໝັ້ນສັນຍາວ່າຈະນຳໃຊ້ຄວາມຮູ້, ຄວາມສາມາດ, ບົດຮຽນແລະເຫື່ອແຮງທັງໝົດທີ່ມີໃນຖານະເປັນນັກຄົ້ນຄວ້າແລະພົນລະເມືອງດີປະກອບສ່ວນເຂົ້າໃນການປົກປັກຮັກສາແລະສ້າງສາພັດທະນາປະເທດຊາດໃຫ້ເຂັ້ມແຂງມັ່ງຄັ່ງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທຳແລະສີວິໄລຕາມທິດສີຂຽວ ແລະ ຍືນຍົງ ຕະຫຼອດໄປ.
ຊົມເຊີຍນໍ້າໃຈວັນຊາດທີ 2 ທັນວາໝັ້ນຍືນ!
ສາທາລະນະລັດປະຊາທິປະໄຕປະຊາຊົນລາວໝັ້ນຍືນ!
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ!
ຄໍາເຫັນ