 |
ທ່ານ ພັນໂທ ຄຳເກີດ ພົມມະວົງສີ ກ່າວວ່າ: ກອງປະຊຸມຄັ້ງນີ້ ເປັນການສະຫຼຸບຕີລາຄາຄືນ ບັນດາຜົາສຳເລັດວຽກງານຂອງສະຫະພັນນັກຮົບເກົ່າແຂວງ ໃນໄລຍະຜ່ານມາ ທັງຈະຮ່ວມກັນຄົ້ນຄວ້າ ຕໍ່ບັນດາທິດທາງ-ແຜນການປະຕິບັນວຽກງານໃນທ້າຍປີ ເພື່ອເຮັດໃຫ້ວຽກງານມີຄວາມຖືກຕ້ອງສອດຄ່ອງ ກັບຄາດໝາຍສູ້ຊົນທີ່ກອງປະຊຸມໃຫຍ່ຜູ້ແທນສະຫະພັນນັກຮົບເກົ່າແຂວງໄດ້ວາງໄວ້. ຈາກນັ້ນ ໄດ້ມີການຜ່ານບົດສະຫຼຸບ ຍົກໃຫ້ເຫັນບັນດາຜົາສຳເລັດ ທີ່ຄະນະປະທານ-ຄະນະບໍລິຫານງານສະຫະພັນນັກຮົບເກົ່າແຂວງ ໄດ້ສຸມໃສ່ສຶກສາອົບຮົມການເມືອງ-ນໍາພາແນວຄິດ ໃນແຕ່ລະເປົ້າໝາຍ ຍົກສູງຄວາມຮັບຜິດຊອບຂອງພະນັກງານ-ນັກຮົບເກົ່າ ກໍ່ຄືຮຸ່ນສືບທອດ ດ້ວຍຮູບການປາຖະກະຖາ, ເລົ່າມູນເຊື້ອ, ເວທີສົນທະນາ, ທັດສະນະສຶກສາ, ພົບປະໂອ້ລົມຕົວຈິ່ງກັບພະນັກງານ, ນັກຮົບເກົ່າ, ປະຊາຊົນບັນດາເຜົ່າ ເຮັດໃຫ້ເຂົາເຈົ້າເຂົ້າໃຈ ແລະຮັບຮູ້ແນວທາງນະໂຍບາຍຂອງພັກ-ລັດ ມີທັດສະນະທີ່ຖືກຕ້ອງ, ມີຄວາມສາມັກຄີ, ເຊື້ອໝັ້ນຕໍ່ການນໍາພາຂອງພັກ, ປະກອບສວ່ນເຂົ້າໃນການປົກປັກຮັກສາແລະສ້າງສາປະເທດຊາດ, ທັງໄດ້ຫັນລົງສູ່ຮາກຖານ, ສົມທົບຄະນະບໍລິຫານງານພັກເມືອງ ເພື່ອຊຸກຍູ້ໃຫ້ເພີ່ມທະວີເອົາໃຈໃສ່ ຊ່ວຍນໍາພາ-ຊີ້ນໍາສະຫະພັນນັກຮົບເກົ່າແຕ່ລະຂັ້ນ, ເຮັດໃຫ້ການຈັດຕັ້ງສະຫະພັນນັກຮົບເກົ່າ ມີຄວາມເຂັ້ມແຂງ, ເພີ່ມທະວີສະຕິລະວັງຕົວຕໍ່ເລ່ລຽມກົນອຸບາຍ ແລະຈຳແນກມິດສັດຕູຈະແຈ້ງ, ເປັນແບບຢ່າງໃຫ້ລູກຫລານ ແລະຮຸ່ນສືບທອດ, ເພີ່ມທະວີເອົາໃຈໃສ່ຊີ້ນໍາ-ນໍາພາ ສະຫະພັນນັກຮົບເກົ່າແຕ່ລະຂັ້ນ, ເຮັດໃຫ້ການຈັດຕັ້ງສະຫະພັນນັກຮົບເກົ່າມີຄວາມເຂັ້ມແຂງ, ປັດຈຸບັນສະຫະພັນນັກຮົບເກົ່າແຂວງຫຼວງພະບາງ ມີສະມາຊິກທັງໝົດ 4,231 ຄົນ, ຍິງ 223 ຄົນ, ເປັນພະນັກງານບໍານານ 595 ຄົນ, ເສຍອົງຄະ 2,610 ຄົນ, ຜູ້ທີ່ປະຕິບັດໜ້າທີ່ຢູ່ໃນສະຫະພັນນັກຮົບເກົ່າທົ່ວແຂວງ 224 ຄົນ, ຍິງ 155 ຄົນ, ພະນັກງານບຳນານ 181 ຄົນ, ຜົນສຳເລັດອັນພົ້ນເດັ່ນໄດ້ສຳເລັດການບັນຈຸ-ຊັບຊ້ອນສະມາຊິກ ໃຫ້ໄປປະຈຳການເຮັດວຽກງານຢູ່ຕາແສງ ຈຳນວນ 156 ຄົນ, ໃນ 52 ຕາແສງພາຍໃນແຂວງ, ທັງໄດ້ມີການປັບປຸງພື້ນຖານໂຄງລ່າງພາຍໃນຫ້ອງການ ສະຫະພັນນັກຮົບເກົ່າແຂວງ ແລະຈັດຕັ້ງນະໂຍບາຍ ເລື່ອນຊັ້ນ-ຂັ້ນໃຫ້ພະນັກງານຢ່າງສົມເຫດສົມຜົນ. ວາລະກອງປະຊຸມ ໄດ້ມີການແນະນຳວຽກງານພັກ-ພະນັກງານ ພາຍໃນສະຫະພັນນັກຮົບເກົ່າ, ທັງມີການປະກອບຄຳເຫັນຕໍ່ບົດສະຫຼຸບ ເພື່ອໃຫ້ມີເນື້ອໃນຄົບຖ້ວຍ ແລະສາມາດນຳໄປຈັດຕັ້ງປະຕິບັດຢ່າງມີຜົນສຳເລັດ. ຕອນທ້າຍ ໄດ້ຮັບຟັງການໂອ້ລົມຈາກປະທານກອງປະຊຸມ ຕື່ມອີກ.ຂ່າວ-ພາບ: ອາພຸດເດດ ບຸບຜາ
ຄໍາເຫັນ