 |
ທ່ານ ພັນໂທ ມະໂນລັກ ວົງສີສຸກ ຫົວໜ້າ ດ່ານຕໍາຫຼວດກວດຄົນເຂົ້າ-ອອກເມືອງ (ຕມ) ປະຈໍາດ່ານສາກົນພູເກືອ ແຂວງອັດຕະປື ໄດ້ໃຫ້ສໍາພາດເມື່ອບໍດົນນີ້ວ່າ: ໄລຍະ 6 ເດືອນຕົ້ນປີ 2025 ຂະ ແໜງຕຳຫຼວດກວດຄົນເຂົ້າ-ອອກເມືອງ ປະຈໍາດ່ານສາກົນພູເກືອ ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວິຊາສະເພາະ ກວດຄົນເຂົ້າ-ອອກເມືອງ ແລະ ກວດກາພາຫະນະ, ສິນຄ້າຕ່າງໆ ທີ່ຜ່ານປະຕູດ່ານ. ພ້ອມທັງໄດ້ປະສານສົມທົບກັບບັນດາຂະແໜງການກ່ຽວຂ້ອງທີ່ຂຶ້ນກັບດ່ານ, ເພີ່ມທະວີໃນການກວດກາລາດຕະ ເວນຕາມຂອບເຂດຊາຍແດນ ທີ່ຕົນຮັບຜິດຊອບ ຢ່າງເປັນປົກກະຕິຕໍ່ເນື່ອງ, ເພື່ອເຮັດໜ້າທີ່ ຄຸ້ມຄອງ, ກວດກາ, ຕິດຕາມການເຂົ້າ-ອອກເມືອງຂອງຄົນ ແລະ ພາຫະນະທີ່ຜ່ານປະຕູດ່ານ ໃຫ້ມີຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍ, ຊຶ່ງໂດຍລວມແລ້ວ ຕະຫຼອດ 6 ເດືອນຜ່ານມາ ເຫັນວ່າໜ່ວຍງານ ຕມ ປະຈໍາດ່ານສາກົນພູເກືອ ແມ່ນຍັງຮັກສາໄດ້ຄວາມສະຫງົບ-ຄວາມເປັນ ລະບຽບຮຽບຮ້ອຍຕາມຂອບເຂດຄວາມຮັບຜິດຊອບຂອງດ່ານໄດ້ເປັນຢ່າງດີ, ການເຂົ້າ-ອອກຜ່ານດ່ານຂອງຊາວຕ່າງປະເທດ ແລະ ປະຊາຊົນລາວ ເຫັນວ່າມີຄວາມເປັນລະບຽບຮຽບຮ້ອຍ ມີການເຄົາລົບກົດລະບຽບຂອງການເຂົ້າ-ອອກ ເປັນຢ່າງດີ.
 |
ທ່ານ ພັນໂທ ມະໂນລັກ ວົງສີສຸກ ໄດ້ໃຫ້ຮູ້ອີກວ່າ: ດ່ານສາກົນພູເກືອປະກອບມີ 4 ປ້ອມກວດກາ ຄື: ປ້ອມກວດກາຕິດຕາມເປົ້າໝາຍ ແລະ ສັງເກດການ ຂາເຂົ້າເມືອງ, ປ້ອມກວດກາຕິດຕາມເປົ້າໝາຍ ແລະ ສັງເກດການ ຂາອອກເມືອງ, ປ້ອມຈໍ້າແຈ້ງໜັງສືຜ່ານແດນ ຂາເຂົ້າເມືອງ ແລະ ປ້ອມຈໍ້າແຈ້ງໜັງສືຜ່ານແດນ ຂາອອກເມືອງ. ນອກນັ້ນ 6 ເດືອນຜ່ານມາ ຍັງໄດ້ມອບຮັບຜູ້ຕ້ອງຫາຄົນເຊື້ອຊາດ, ສັນຊາດ ຫວຽດນາມ ລວມມີ 4 ຄັ້ງ, ຈໍານວນ 7 ຄົນ ຍິງ 2 ຄົນ, ນໍາສົ່ງຊາກສົບຄົນເຊື້ອຊາດ, ສັນຊາດ ຫວຽດນາມ ມີ 3 ຄັ້ງ, ຈຳນວນ 3 ສົບ ແລະ ນໍາສົ່ງຄົນເຈັບ ຄົນເຊື້ອຊາດ, ສັນຊາດ ຫວຽດນາມ ລວມມີ 6 ຄັ້ງ, ຈຳນວນ 6 ຄົນ.
(ຂ່າວ-ພາບ: ມະນີວອນ)
ຄໍາເຫັນ