ແຂວງສາລະວັນລວມຍອດຜະລິດຕະພັນພາຍໃນ (GDP) ປະຕິບັດໄດ້ 4.969 ຕື້ກວ່າກີບ ເທົ່າກັບ 58% ຂອງແຜນການ, ອັດຕາການຂະຫຍາຍຕົວຂອງເສດຖະກິດ ຢູ່ໃນລະດັບ 4,3%, ການລົງທຶນຂອງພາກລັດ ເອກະຊົນ ມີຈຳນວນໜ້ອຍ, ການຜະລິດໃນຂົງເຂດກະສິກຳບາງປະເພດເພີ່ມຂຶ້ນແບບກ້າວກະໂດດ,ໃນຂະນະດຽວກັນໄດ້ສົ່ງເສີມພັດທະນາວຽກງານກະສິກຳ-ປ່າໄມ້ ຕາມທິດຍືນຍົງ ເພື່ອຮັບປະກັນຄວາມໝັ້ນຄົງທາງດ້ານສະບຽງອາຫານ ໂດຍນຳໃຊ້ເຕັກນິກໃໝ່ເຂົ້າໃສ່ການຜະລິດ ແລະ ການລ້ຽງສັດ ແບບຄອບຄົວ,ແບບຟາມ ສາມາດສະໜອງຕະຫຼາດພາຍໃນ ແລະ ສົ່ງອອກໄດ້ຈຳນວນໜຶ່ງ.
ໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງຄັ້ງທີ I ປີ 2024, ທ່ານ ດາວວົງ ພອນແກ້ວ ເຈົ້າແຂວງສາລະວັນ ໄດ້ໃຫ້ສຳພາດຕໍ່ສື່ມວນຊົນເມື່ອວັນທີ 17 ກໍລະກົດ ວ່າ: 6 ເດືອນຕົ້ນປີ ຜ່ານມາ ທົ່ວແຂວງສາລະວັນ ຍັງສືບຕໍ່ມີຄວາມສະຫງົບໜັກແໜ້ນ,ລວມຍອດຜະລິດຕະພັນພາຍໃນ (GDP) ປະຕິບັດໄດ້ 4.969 ຕື້ກວ່າກີບ ເທົ່າກັບ 58% ຂອງແຜນການ, ອັດຕາການຂະຫຍາຍຕົວຂອງເສດຖະກິດ ຢູ່ໃນລະດັບ 4,3%, ການລົງທຶນຂອງພາກລັດ ເອກະຊົນ ມີຈຳນວນໜ້ອຍ, ການຜະລິດໃນຂົງເຂດກະສິກຳບາງປະເພດເພີ່ມຂຶ້ນແບບກ້າວກະໂດດ ໂດຍສະເພາະມັນຕົ້ນ ທີ່ມີປະລິມານຫຼາຍ ສະເລ່ຍ 1,2 ລ້ານໂຕນ/ປີ, ການເກັບລາຍຮັບໃນ6 ເດືອນຕົ້ນປີ ປະຕິບັດໄດ້ 136 ຕື້ກວ່າກີບ ທຽບໃສ່ໄລຍະດຽວກັນຂອງປີຜ່ານມາເຫັນວ່າລື່ນແຜນການແລ້ວປະມານ 20%. ຄາດວ່າໝົດປີ ຈະລື່ນແຜນຄືກັບປີຜ່ານມາ.
ນອກຈາກນີ້, ແຂວງ ສາລະວັນ ຍັງໄດ້ເອົາໃຈໃສ່ ໃນການຄຸ້ມຄອງ ດັດສົມບັນດາໂຮງງານປຸງແຕ່ງໄມ້, ຕິດຕາມ, ກວດກາ, ອະນຸຍາດ ການນຳເຂົ້າ-ສົ່ງອອກ ຊຶ່ງມູນຄ່າສິນຄ້າສົ່ງອອກ 1.021 ຕື້ກວ່າກີບ ເທົ່າກັບ 53% ຂອງແຜນ, ມູນຄ່າການນຳເຂົ້າ 430 ຕື້ກວ່າກີບ ທຽບໃສ່ແຜນເຫັນວ່າລື່ນແຜນເທົ່າຕົວ. ອັນພົ້ນເດັ່ນ ແມ່ນໄດ້ຮັບຮອງເອົາຜະລິດຕະພັນເຄື່ອງຫັດຖະກຳຈັກສານ ຂອງປະຊາຊົນບ້ານແບ່ງດ່ານເມືອງລະຄອນເພັງຂຶ້ນເປັນມໍລະດົກແຫ່ງຊາດລະດັບທ້ອງຖິ່ນ. ນອກນີ້ ຍັງໄດ້ຊຸກຍູ້ສົ່ງເສີມການສຶກສາ-ສຳຫຼວດ ເພື່ອກໍ່ສ້າງເຂື່ອນໄຟຟ້າຂະໜາດນ້ອຍ, ໄຟຟ້າພະລັງງານລົມ-ແສງຕາເວັນ, ຂຸດຄົ້ນຖ່ານຫີນ ແລະ ແຮ່ທາດ ອື່ນໆ. ໄດ້ຂະຫຍາຍໄຟຟ້າ ເຂົ້າບ້ານ ກວມເອົາ 100% ຂອງບ້ານທັງໝົດ, ໄດ້ຊຸກຍູ້ ພໍ່ແມ່ປະຊາຊົນສົມທົບທຶນ ຕິດຕັ້ງໄຟຟ້າເຍືອງທາງ ດ້ວຍລະບົບແສງຕາເວັນ ຢູ່ຕາມບ້ານເທສະບານເມືອງ, ບ້ານຈຸດສຸມ, ບ້ານຕາມສາຍທາງ ແລະ ບ້ານອື່ນໆ ເຊັ່ນ ເມືອງສາລະວັນ, ວາປີ, ຄົງເຊໂດນ, ລະຄອນເພັງ ແລະ ສະໝ້ວຍ.
ທ່ານ ກ່າວຕື່ມວ່າສຳລັບ ການເປີດປີທ່ອງທ່ຽວລາວ 2024ໄລຍະ 6 ເດືອນຜ່ານມາ ໄດ້ສຸມໃສ່ຈັດຕັ້ງປະຕິບັດຕາມປະຕິທິນທ່ອງທ່ຽວຂັ້ນແຂວງ ສຳເລັດ7 ເມືອງ 7 ກິດຈະກໍາ ເປັນຕົ້ນ: ງານບຸນປະເພນີ ພະແກ້ວນໍ້າຢາດບ້ານນາໂພ ເມືອງວາປີ,ງານບຸນນະມັດສະການພະຍາດນາດູ່ ເມືອງລະຄອນເພັງ, ງານເທສະການກາເຟຄຳ ບ້ານໂນນດູ່ ເມືອງເລົ່າງາມ, ງານເທດສະການຜ້າຝ້າຍແພລາຍ ເຜົ່າກະຕາງ ບ້ານສາມັກຄີໄຊ ເມືອງຕຸ້ມລານ, ງານເທດສະການໝາກພ້າວນາໄຊ ເມືອງສາລະວັນ, ງານບຸນປະເພນີອາຢາ ເຜົ່າປະໂກະ ເມືອງສະໝ້ວຍ ແລະງານເທດສະການປີ້ງໄກ່ນາປົ່ງ ເມືອງຄົງເຊໂດນ ຊຶ່ງແຕ່ລະເມືອງ ກໍໄດ້ມີການວາງສະແດງສິນຄ້າຜະລິດຕະພັນ ທີ່ເປັນໂອດັອບຂອງຕົນ ຕິດພັນກັບກິດຈະການປະກວດສິລະປະວັນນະຄະດີ ທີ່ເປັນເອກະກະລັກສະເພາະໃຜລາວ ເຮັດໃຫ້ບັນຍາກາດການທ່ອງທ່ຽວມີຄວາມຄຶກຄື້ນ ຊຶ່ງສາມາດດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວຫລາຍກວ່າ 122.622 ເທື່ອຄົນ ເທົ່າກັບ90% ຂອງແຜນການ, ໃນນີ້ ນັກທ່ອງທ່ຽວພາຍໃນ 68.198ເທື່ອຄົນ, ນັກທ່ອງທ່ຽວສາກົນ 8.841 ເທື່ອຄົນ ແລະ ນັກທ່ອງທ່ຽວຊາຍແດນ 45.583 ເທື່ອຄົນ, ສາມາດສ້າງລາຍຮັບທາງກົງ ແລະ ທາງອ້ອມໄດ້ປະມານ 16 ລ້ານໂດລາ ເທົ່າກັບ 91% ຂອງແຜນການ.(ຂ່າວ-ພາບ:ສຳນານ)
ຄໍາເຫັນ