 |
ທ່ານ ສຸລັດ ອິນທະວົງ ຮອງຫົວໜ້າຄະນະຄຸ້ມຄອງດ່ານ ຮອງເລຂາຄະນະພັກຮາກຖານ ທັງເປັນເລຂາໜ່ວຍພັກດ່ານພາສີສາກົນລະໄລຫົວໜ້າດ່ານພາສີສາກົນລະໄລ ໄດ້ໃຫ້ສຳພາດວ່າ: ດ່ານພາສີສາກົນລະໄລ ຕັ້ງຢູ່ເມືອງສະໝ້ວຍ ແຂວງສາລະວັນ ສປປ ລາວ, ໂດຍມີຊາຍແດນຕິດຈອດກັບດ່ານສາກົນລະໄລ ແຂວງກວາງຈິ ສສ ຫວຽດນາມ, ທີ່ຕັ້ງຂອງດ່ານຫ່າງຈາກເທດສະບານແຂວງປະມານ 140 ກິໂລແມັດ, ຊຶ່ງວຽກວິຊາສະເພາະດ່ານພາສີສາກົນລະໄລ ຂຶ້ນກັບພາສີ ປະຈຳແຂວງສາລະວັນ ກົມພາສີ ກະຊວງການເງິນ, ມີພະນັກງານ-ເຈົ້າໜ້າທີ່ພາສີທັງໝົດ 27 ຄົນ ຍິງ 4 ຄົນ ແລະ ພະນັກງານຊ່ວຍວຽກຈໍານວນໜຶ່ງ, ປະກອບມີ 3 ກຸ່ມວຽກຄື: ກຸ່ມວຽກຄຸ້ມຄອງການແຈ້ງພາສີ ແລະ ຂໍ້ມູນຂ່າວສານ; ກຸ່ມວຽກຄຸ້ມຄອງພາຫະນະ ແລະ ຜູ້ໂດຍສານ; ກຸ່ມວຽກກວດກາສິນຄ້າ ແລະ ຄຸ້ມຄອງສາງສິນຄ້າ.
 |
ຈຸດພິເສດຂອງດ່ານພາສີສາກົນລະໄລ, ຊຶ່ງການນໍາເຂົ້າ-ສົ່ງອອກສິນຄ້າຂອງບັນດາຫົວໜ່ວຍທຸລະກິດບໍ່ມີຫຼາຍຄືດ່ານສາກົນແຫ່ງອື່ນໆ,ມີແຕ່ບາງບໍລິສັດ ຫຼື ບາງບຸກຄົນເທົ່ານັ້ນທີ່ມາໃຊ້ບໍລິການຜ່ານດ່ານໃນການນໍາເຂົ້າ-ສົ່ງອອກສິນຄ້າ-ເຄື່ອງຂອງ; ສຳລັບການຈັດຕັ້ງປະຕິບັດວຽກງານວິຊາສະເພາະເກັບລາຍຮັບໃນ 6 ເດືອນຕົ້ນປີ2025, ດ່ານພາສີສາກົນລະໄລໄດ້ເອົາໃຈໃສ່ໃຫ້ການບໍລິການ, ອໍານວຍຄວາມສະດວກທາງດ້ານການຄ້າ ແລະ ພາສີຕ່າງໆແກ່ຜູ້ປະກອບການ, ຈັດເກັບລາຍຮັບພາສີ ແລະ ພັນທະອື່ນໆ.
ໃນປີ 2025 ໄດ້ຮັບຕົວເລກແຜນການທັງໝົດຂອງດ່ານ 90.20 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດວຽກງານຕົວຈິງໃນ 6 ເດືອນຕົ້ນປີ, ສາມາດເກັບລາຍຮັບໄດ້ທັງໝົດ 48.98 ຕື້ກີບເທົ່າກັບ 108.49% ຂອງແຜນການ 6 ເດືອນ (ລື່ນແຜນການ 8.49%) ຫຼື ເທົ່າກັບ 54.31% ຂອງແຜນການປີ, ງລຊຶ່າຍຮັບສ່ວນໃຫຍ່ແມ່ນໄດ້ຈາກໝວດສິນຄ້າຕົົ້ນຕໍເຊັ່ນ: ນໍ້າມັນເຊື້ອໄຟ, ພາຫະນະ, ສິ້ນສ່ວນອາໄຫຼ່, ເຄື່ອງກໍ່ສ້າງ, ໄຟຟ້າ, ເຄື່ອງອຸປະໂພກ-ບໍລິໂພກ, ສິນຄ້າສົ່ງເສີມການລົງທຶນ, ສິນຄ້ານໍາເຂົ້າເພື່ອສົ່ງອອກ, ຄ່າປັບໃໝ່-ຂາຍເຄື່ອງຮິບ, ຄ່າທໍານຽມເຂົ້າ-ອອກ, ຄ່າຊັກພິເສດ, ຄ່າທຳນຽມຄັງແຮ ແລະ ສິນຄ້າອື່ນໆ.
ຫົວໜ້າດ່ານພາສີສາກົນລະໄລ ກ່າວຕື່ມອີກວ່າ: ສາເຫດພາໃຫ້ການເກັບລາຍຮັບໄດ້ເກີນແຜນການ, ຍ້ອນຄວາມເອົາໃຈໃສ່ຄະນະດ່ານຊີ້ນໍາ-ນໍາພາ, ມີລະບຽບກົດໝາຍ ແລະ ນິຕິກຳຕ່າງໆກ່ຽວກັບວຽກງານພາສີ, ເປັນບ່ອນອີງໃນການຈັດຕັ້ງປະຕິບັດໃນວຽກງານວິຊາສະເພາະ. ພ້ອມດຽວກັນນີ້, ຜູ້ປະກອບການສ່ວນໃຫຍ່ເຂົ້າໃຈກ່ຽວກັບລະບຽບກົດໝາຍ, ເຮັດໃຫ້ການປະກອບສ່ວນເສຍພັນທະເຂົ້າງົບປະມານຂອງລັດຢ່າງຖືກຕ້ອງ, ຄົບຖ້ວນ, ໂປ່ງໃສ ແລະ ທັນກັບເວລາ.
ຄຽງຄູ່ກັນນີ້,ການນໍາເຂົ້າສິນຄ້າຂອງເຄື່ອງຂອງບາງໝວດສິນຄ້າເພີ່ມຂຶ້ນ ແລະ ລະບົບພາສີທັນສະໄໝ (ລະບົບ NSWA+) ຮັບປະກັນຄວາມຖືກຕ້ອງໃນການຈັດເກັບລາຍຮັບເຂົ້າງົບປະມານທັນຕາມກຳນົດເວລາ, ເນັ້ນການໃຫ້ບໍລິການວຽກງານ, ສະດວກວ່ອງໄວ ແລະ ເຈົ້າໜ້າທີ່ພາສີເອົາໃຈໃສ່ໃນການຈັດຕັ້ງປະຕິບັດວຽກງານທີ່ໄດ້ຮັບມອບໝາຍ, ເຮັດໃຫ້ການຈັດເກັບລາຍຮັບໄດ້ຕາມແຜນການ ແລະ ລື່ນແຜນທີ່ທາງຂັ້ນເທິງມອບໝາຍໃຫ້.
 |
ທ່ານ ສຸລັດ ອິນທະວົງ ກ່າວຕື່ມອີກວ່າ: ທິດທາງແຜນການ 6 ເດືອນທ້າຍປີ 2025 ໄດ້ວາງຫຼາຍມາດຕະການ, ຄາດໝາຍສູ້ຊົນ,ແຜນການຄາດຄະເນເກັບລາຍຮັບເປັນຕົ້ນ: ຊອກທ່າແຮງບົ່ມຊ້ອນ, ເຂັ້ມງວດກວດກາ-ສິນຄ້າເຄື່ອງຂອງຜ່ານດ່ານເປັນຕົ້ນ:ສິນຄ້າປະເພດນໍ້າມັນເຊື້ອໄຟ, ປະສານສົມທົບກັບຂະແໜງການກ່ຽວຂ້ອງພາຍໃນດ່ານ, ເພື່ອເຮັດໃຫ້ການຈັດເກັບລາຍຮັບບັນລຸຕາມລະດັບຄາດໝາຍ ແລະ ຄາດຄະເນລາຍຮັບ 6 ເດືອນທ້າຍປີໃຫ້ໄດ້ຕາມຄາດໝາຍ ແລະ ລາຍຮັບໝົດປີຄາດວ່າຈະໄດ້ລື່ນແຜນການປີ.
(ແຫຼ່ງຂ່າວ: ແຂວງສາລະວັນ)
ຄໍາເຫັນ