 |
ໃນກອງປະຊຸມ, ໄດ້ຮັບຟັງການສະຫຼຸບລາຍງານການຈັດຕັ້ງປະຕິບັດວຽກງານຂອງສູນຊ່ວຍເຫຼືອໝີຕາດກວາງຊີ ບ້ານທ່າແປ້ນ ແລະ ສູນຮັກສາພັນສັດປ່າຫຼວງພະບາງ ບ້ານໜອງໂຕກ ນະຄອນ ຫຼວງພະບາງ ໂດຍແມ່ນອົງການປົກປ້ອງໜີ (free the bears) ປະເທດອົດສະຕາລີ ເປັນຜູ້ໃຫ້ທືນຜ່ານພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໄລຍະ 3 ປີ ນັບແຕ່ປີ 2024-2026, ສະເພາະປີ 2025 ໄດ້ຮັບການອານຸມັດງົບປະມານ 607,658 ໂດລາສະຫະລັດ ດຳເນີນ 7 ກິດຈະກຳຫຼັກຄື: ສະໜັບສະໜູນຊຸມຊົນທ້ອງຖີ່ນເຂົ້າໃນການເບີ່ງແຍງໝີ ແລະ ສັດປ່າ ທີ່ໄດ້ຮັບການຊ່ວຍເຫຼືອໃຫ້ມີຄຸນນະພາບທີ່ດີແບບຍືນຍົງ, ເສີມຂະຫຍາຍຄວາມສາມາດໃນການດູແລ ແລະ ຟື້ນຟູສັດໃນໄລຍະສັ້ນ ລວມເຖີງທີ່ຢູ່ຂອງສັດປ່າທີ່ໄດ້ຊ່ວຍເຫຼືອໃນໄລຍະຍາວ, ສ້າງແນວຄວາມຄິດລິເລີ້ມທາງດ້ານການສຶກສາ ແນໃສ່ແຜນເພີ້ມທະວີຄວາມຮັບຮູ້ ໃນດ້ານສິ່ງແວດລ້ອມ ແລະ ສົ່ງເສີມການປ່ຽນແປງພຶດຕິກຳ ໄປໃນທາງທີ່ດີ ໃນ ສປປ ລາວ, ເສີມຂະຫຍາຍຄວາມອາດສາມາດຂອງພະນັກງານລັດ ແລະ ປະຊາຊົນທ້ອງຖີ່ນ ກ່ຽວກັບການແກ້ໄຂ ບັນຫາການຄ້າຂາຍສັດປ່າ ທີ່ຜິດກົດໝາຍໃນທຸກຮູບແບບ, ເພີ້ມຄວາມເຂົ້າໃຈໃນປະຊາກອນໝີ ແລະສັດປ່າທ້ອງຖີ່ນ ທີ່ອາໄສຢູ່ໃນປ່າທຳມະຊາດ ເພື່ອໃຫ້ມີແນວທາງການປັບປຸງແຜນອານຸລັກໃຫ້ມີຄວາມຍືນຍົງ, ພັດທະນາແຜນການດູແລໜີ ແລະ ສັດປ່າ ດ້ວຍຫຼາຍຮູບແບບກ່ອນການປ່ອຍໝີ ຫຼື ສັດປ່າອື່ນໆ ໃຫ້ກາຍເປັນອົງປະກອບໃນລະບົບນິເວດທີ່ສົມບູນ ແລະ ຊຸກຍູ້ກິດຈະກໍາໃຫ້ການນໍາຂັ້ນທ້ອງຖີ່ນ ແລະ ປະເມີນຜົນ.
 |
ໃນ 6 ເດືອນຜ່ານມາ ສັດຢູ່ໃນການຄຸ້ມຄອງມີ 9 ສາຍພັນ ລວມທັງໝົດ 197 ໂຕ, ໃນນັ້ນ, ໝີດຳ 133 ໂຕ, ເໝືອຍ 9 ໂຕ, ແພນດ້າແດງ 2 ໂຕ, ລີງ 42 ໂຕ, ທະນີ 2 ໂຕ, ໝາຈອກ 2 ໂຕ, ຟານ 1 ໂຕ, ເສືອໄຟ 1 ໂຕ, ເສືອແມວ 2 ໂຕ, ນົກແກ້ວ 1 ໂຕ ແລະ ເຕົ່າ 2 ໂຕ. ໄດ້ສະໜັບສະໜູນງົບປະມານ ເຂົ້າໃນວຽກງານສະກັດກັ້ນການລ່າ ແລະ ຄ້າຂາຍສັດປ່າທີ່ຜິດກົດໝາຍ ສາມາດຊ່ວຍເຫຼືອສັດປ່າ ຢູ່ແຂວງຫຼວງພະບາງ, ແຂວງອຸດົມໄຊ, ນະຄອນຫຼວງວຽງຈັນ, ແຂວງເຊກອງ ແລະແຂວງບໍ່ແກ້ວ ປະກອບມີ: ໝີ 4 ໂຕ, ລີງ 5 ໂຕ, ເສືອແມວ 4 ໂຕ, ເຕົ່າ 2 ໂຕ ແລະ ຟານ 1 ໂຕ. ສັດແຕ່ລະຊະນິດທີ່ຢູ່ໃນການຄຸ້ມຄອງ ໄດ້ຮັບການກວດສຸຂະພາບ, ປີ່ນປົວພະຍາດ ແລະ ບາດແຜ ທັງປ່ອຍຄືນສູ່ທຳມະຊາດ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ