ອະດີດຮອງນາຍົກລັດຖະມົນຕີ ຢ້ຽມຢາມ ບໍລິສັດ ລາວຄາຍຢວນ ບໍ່ແຮ່ ຈໍາກັດ

ໃນວັນທີ 13 ພະຈິກ ນີ້, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະຕິດຕາມໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ບໍລິສັດ ລາວຄາຍຢວນ ບໍ່ແຮ່ ຈໍາກັດ ທີ່ບ້ານ ລໍາມະລາດ ເມືອງ ທ່າແຂກແຂວງຄໍາມ່ວນ ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ  ແລະ ບັນດາພະແນກການທີ່ກ່ຽວຂ້ອງຢູ່ຂັ້ນແຂວງ, ຂັ້ນເມືອງເຂົ້າຮ່ວມຕິດຕາມ.
    ໂອກາດດັ່ງກ່າວ, ທ່ານ ຫວາງ ເຕີສວນ ຜູ້ອໍານວຍການບໍລິສັດ ລາວຄາຍຢວນ ບໍ່ແຮ່ ຈໍາກັດໄດ້ລາຍງານສະພາບໂດຍລວມການເຄື່ອນໄຫວໃນຜ່ານມາຕະຫຼອດຮອດຄວາມຄືບໜ້າໃນການດໍາເນີນທຸລະກິດ ແລະ ບັນຫາຂໍ້ສະດວກ-ຂໍ້ຫຍຸງຍາກຂອງບໍລິສັດ, ໂດຍສະເພາະຄວາມຄືບໜ້າຂອງໂຄງການຜະລິດເກືອກາລີໄລຍະທີ 2 ໃນເນື້ອທີ່ສໍາປະທານທັງໝົດ 92,24 ກິໂລຕາແມັດ, ມີກໍາລັງການຜະລິດ 1 ລ້ານໂຕນ/ປີ ໂດຍເລີ່ມເປີດການຜະລິດແຕ່ທ້າຍ ເດືອນເມສາ 2023 ເປັນຕົ້ນມາ ຊຶ່ງປັດຈຸບັນຜະລິດຕະພັນຂອງບໍລິສັດປະກອບມີ 3 ປະເພດ ຄື: ປະເພດເກືອກາລີແບບຝຸ່ນ, ເກືອກາລີແບບເມັດ ແລະ ເກືອບອນລູມ. ໃນໄລຍະຜ່ານມາບໍລິສັດແມ່ນມີຄວາມເປັນເຈົ້າການເອົາໃຈໃສ່ຈັດຕັ້ງປະຕິບັດພັນທະຕ່າງໆ ຕາມສັນຍາສໍາປະທານໃຫ້ລັດຖະບານ ແລະ ໄດ້ປະກອບສ່ວນຊ່ວຍເຫຼືອສັງຄົມໃນການພັດທະນາບ້ານ, ເມືອງ ແລະ ແຂວງຄໍາມ່ວນ, ໄດ້ສ້າງວຽກເຮັດງານທໍາ ແລະ ຊ່ວຍຍົກລະດັບຊີວິດການເປັນຢູ່ຂອງປະຊາຊົນໂດຍສະເພາະໃນເຂດທີ່ຕັ້ງໂຄງການໃຫ້ດີຂຶ້ນເປັນກ້າວໆ, ນອກນັ້ນຍັງມີບັນຫາອື່ນໆ ທີ່ຕິດພັນອີກຈໍານວນໜຶ່ງ. 
ພ້ອມນີ້, ທ່ານເຈົ້າແຂວງຄໍໍາມ່ວນ ຍັງໄດ້ມີຄໍາເຫັນແລກປ່ຽນມາຍັງບໍລິສັດ ໂດຍສະເພາະດ້ານເຕັກນິກ ພາຍຫຼັງຂຸດຄົ້ນສໍາເລັດ ທາງບໍລິສັດໄດ້ມີລະບົບເຕັກນິກມາດຕະຖານຄືແນວໃດໃນການອັດຖົມຂຸມ ເພື່ອຮັບປະກັັນເຮັດໃຫ້ເຂດດັ່ງກ່າວກັບຄືນສູ່ສະພາບເດີມ, ຮັບປະກັນບໍ່ໃຫ້ມີການເຊາະເຈື່ອນໃນຕໍ່ໜ້າ,  ດ້ານການຄຸ້ມຄອງລະບົບການຊໍາລະສະສາງການສົ່ງອອກສິນຄ້າໄດ້ຜ່ານລະບົບທະນາຄານ ຫຼື ບໍ່, ພ້ອມນີ້ຍັງໄດ້ແນະນໍາໃຫ້ບໍລິສັດສົມທົບກັບອໍານາດການປົກຄອງຂັ້ນບ້ານ ແລະ ພາກສ່ວນກ່ຽວຂ້ອງ ເພື່ອປຶກສາຫາລືໃນການປ້ອງກັນເວນຍາມ ເພື່ອເຮັດແນວໃດຮັບປະກັນໄດ້ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ, ແກ້ໄຂບັນຫາຂີ້ລັກງັດແງະ ພາຍໃນບໍລິສັດ.
ໂອກາດດັ່ງກ່າວນີ້, ທ່ານອະດີດຮອງນາຍົກລັດຖະມົນຕີ ຍັງໄດ້ມີຄໍາເຫັນ ແລະ ຕີລາຄາຕໍ່ຜົນງານການເຄື່ອນໄຫວດໍາເນີນທຸລະກິດໃນຜ່ານມາ ແລະ ສະເໜີ ໃຫ້ບໍລິສັດ ເອົາໃຈໃສ່ແກ້ໄຂບັນຫາສິ່ງແວດລ້ອມໂດຍສົມທົບກັບກະຊວງເຕັກໂນໂລຊີ ສປ ຈີນ ເພື່ອຊ່ວຍແກ້ໄຂບັນຫາ ເພື່ອເຮັດແນວໃຫ້ ບໍລິສັດ ລາວຄາຍຢວນ  ເປັນບໍລິສັດໜຶ່ງທີ່ນໍາໜ້າໃນການຂຸດຄົ້ນເກືອກາລີ ທັງໃນ ສປປ ລາວ ແລະ ໃນໂລກ, ກ່ຽວກັບນະໂຍບາຍຕ່າງໆ ຂອງລັດຖະບານທີ່ເພິ່ນໄດ້ກໍານົດອອກໃໝ່ໃຫ້ບໍລິສັດຄົ້ນຄວ້າເບິ່ງມີສິ່ງໃດແດ່ທີ່ສົ່ງຜົນຕໍ່ບໍລິສັດ ແລະ ບັນຫາຫຍຸ້ງຍາກຕ່າງໆ ໃຫ້ສະເໜີຕໍ່ຂະແໜງການກ່ຽວຂ້ອງ ເພື່ອລາຍງານໄປຍັງລັດຖະບານຊອກຫາວິທີແກ້ໄຂ, ພ້ອມນີ້ ຍັງໄດ້ສະແດງຄວາມຊົມເຊີຍມາຍັງບໍລິສັດທີ່ຊ່ວຍພັດທະນາແກ້ໄຂຫຼາຍບັນຫາໃນຊຸມຊົນ, ລວມເຖິງກິດຈະກໍາຕ່າງໆ ເພື່ອສ້າງລາຍຮັບທີ່ໝັ້ນຄົງໃຫ້ແກ່ປະຊາຊົນໃນເຂດໂຄງການ ແລະ ເຂດອື່ນໆ. ຄຽງຄູ່ກັນນັ້ນຂໍໃຫ້ມີແຜນການຈັດຕັ້ງຄັກແນ່ໃນການຊຸກຍູ້ຊ່ວຍເຫຼືອແກ້ໄຂຊີວິດການເປັນຢູ່ຂອງປະຊາຊົນຈະກໍານົດແຜນການຈັດຕັ້ງຄືແນວໃດ, ສົ່ງເສີມດ້ານການປູກ-ການລ້ຽງ ຫຼື ອື່ນໆ, ທັງນີ້ເພື່ອສ້າງໃຫ້ບໍລິສັດດັ່ງກ່າວນີ້ກາຍເປັນຕົວແບບ ແລະ ມີຄວາມຍາວນານໜັ້ນຄົງຕະຫຼອດໄປ.
ຂ່າວ-ພາບ: ມະນີວັນ