ຜົນການສຳຫຼວດຂອງ Accenture ພົບວ່າ: ປະມານເຄິ່ງໜຶ່ງຂອງຜູ້ບໍລິຫານມີຄວາມກັງວົນກ່ຽວກັບການສູນເສຍຕຳແໜ່ງງານສຸດທິທົ່ວເສດຖະກິດທັງໝົດ, ເພີ່ມຂຶ້ນຈາກປະມານ 1 ສ່ວນ 3 ເມື່ອທຽບກັບສອງປີກ່ອນ. ການສຳຫຼວດຍັງໄດ້ເຕືອນກ່ຽວກັບຄວາມສ່ຽງຂອງວົງຈອນທີ່ໂຫດຮ້າຍ ຖ້າຫາກຜູ້ບໍລິຫານຮັບຮູ້ວ່າພະນັກງານຈະຖືກທົດແທນຢ່າງຫຼີກລ່ຽງບໍ່ໄດ້ ກໍຈະຍິ່ງຫຼຸດແຮງຈູງໃຈໃນການພັດທະນາທັກສະກຳລັງແຮງງານ.
ກຸ່ມຊາວໜຸ່ມຖືກພິຈາລະນາວ່າຈະປະເຊີນກັບຄວາມສ່ຽງທີ່ໃຫຍ່ທີ່ສຸດ, ໂດຍອັດຕາສ່ວນຂອງຜູ້ບໍລິຫານທີ່ເຊື່ອວ່າ AI ຈະເພີ່ມຄວາມຕ້ອງການແຮງງານລະດັບເລີ່ມຕົ້ນຫຼຸດລົງເຫຼືອພຽງ 15% ຈາກ 40% ເມື່ອທຽບກັບສອງປີກ່ອນ. ໃນຂະນະດຽວກັນ, ເກືອບ 40% ຄາດວ່າ AI ຈະຫຼຸດຄວາມຕ້ອງການສຳລັບກຸ່ມແຮງງານນີ້, ເພີ່ມຂຶ້ນຈາກປະມານ 1 ສ່ວນ 5.
ສະຖານະການດັ່ງກ່າວຍິ່ງກົດດັນບັນຫາການວ່າງງານໃນກຸ່ມໄວໜຸ່ມ ຊຶ່ງໄດ້ກາຍເປັນບັນຫາຮີບດ່ວນສຳລັບທ່ານ ເຄຍ ສະຕາເມີ ນາຍົກລັດຖະມົນຕີອັງກິດ, ຫຼັງຈາກອັດຕາການວ່າງງານໃນກຸ່ມທີ່ມີອາຍຸ 16-24 ປີບັນລຸລະດັບສູງສຸດໃນຮອບທົດສະວັດ, ທ່າມກາງຄ່າໃຊ້ຈ່າຍໃນການຈ້າງງານທີ່ເພີ່ມຂຶ້ນ ແລະ ຜົນກະທົບຂອງເຕັກໂນໂລຊີຕໍ່ຂະແໜງການສຳນັກງານ.
ຢ່າງໃດກໍຕາມ, ບົດລາຍງານຊີ້ໃຫ້ເຫັນວ່າພະນັກງານໃນອັງກິດກຳລັງນຳ AI ມາໃຊ້ໃນການເຮັກວຽກງານຢ່າງໄວວາ, ໂດຍເກືອບ 20% ໃຊ້ generative AI ເປັນປະຈຳທຸກໆມື້ ຊຶ່ງເພີ່ມຂຶ້ນເຖິງສາມເທົ່າເມື່ອທຽບກັບສອງປີກ່ອນ.
ໃນທາງກົງກັນຂ້າມ, ຂະແໜງທຸລະກິດຍັງຊັກຊ້າໃນການປັບຕົວ ສົ່ງຜົນໃຫ້ການໃຊ້ AI ຍັງບໍ່ທັນສະທ້ອນໃຫ້ເຫັນໃນໂຕເລກ GDP ໃນໄລຍະສັ້ນ. ຍ້ອນວ່າການນຳໃຊ້ຍັງຈຳກັດຢູ່ໃນວຽກງານເລັກນ້ອຍ ແທນທີ່ຈະຖືກນຳໃຊ້ໃນຂະບວນການຫຼັກ, ອີກທັງອົງກອນຕ່າງໆຍັງບໍ່ທັນໄດ້ປັບລະບົບ ແລະ ຂະບວນການເຮັດວຽກເພື່ອສະໜັບສະໜູນຢ່າງເຕັມທີ່.
ນອກຈາກນັ້ນ, ບົດລາຍງານຍັງສະທ້ອນໃຫ້ເຫັນເຖິງຊ່ອງວ່າງທັດສະນະລະຫວ່າງພະນັກງານ ແລະ ຝ່າຍຜູ້ບໍລິຫານ, ໂດຍພະນັກງານເບິ່ງ AI ເປັນເຄື່ອງມືໃນການປັບປຸງຄຸນນະພາບການເຮັດວຽກ, ໃນຂະນະທີ່ຝ່າຍບໍລິຫານສຸມໃສ່ການນຳໃຊ້ເພື່ອຫຼຸດຜ່ອນຕົ້ນທຶນແທນທີ່ຈະສ້າງລາຍຮັບ.
ການວິເຄາະທີ່ກວມເອົາ 17 ອຸດສາຫະກຳພົບວ່າ: AI ມີທ່າແຮງໃນການເພີ່ມລາຍຮັບໄດ້ຫຼາຍກວ່າການຫຼຸດຜ່ອນຄ່າໃຊ້ຈ່າຍແຮງງານຫຼາຍກວ່າສອງເທົ່າ, ໂດຍກຸ່ມພະລັງງານ, ວິທະຍາສາດຊີວະພາບ ແລະ ການຂາຍຍ່ອຍ ແມ່ນຂະ ແໜງການທີ່ຄາດວ່າຈະໄດ້ຮັບຜົນປະໂຫຍດຫຼາຍທີ່ສຸດ.
ການສຳຫຼວດດັ່ງກ່າວໄດ້ດຳເນີນໃນບັນດາພະນັກງານ 2,085 ຄົນ ແລະ ຜູ້ບໍລິຫານ 510 ຄົນ ໃນອັງກິດ ແລະ ໄອແລນເໜືອ ລະຫວ່າງເດືອນກຸມພາ ຫາ ເດືອນມີນາ ຂອງປີນີ້.
ຄໍາເຫັນ