ຜົນການສໍາຫຼວດລະບຸວ່າ: 22% ຂອງບໍລິສັດໄດ້ປະສົບບັນຫາການໃຊ້ແຮງງານຄົນຫຼຸດລົງ ຍ້ອນ AI ຊຶ່ງເພີ່ມຂຶ້ນຈາກ 15% ເມື່ອປີກ່ອນ, ໃນຂະນະທີ 10% ລາຍງານວ່າ: ການຫຼຸດລົງຂອງວຽກຜູ້ຊ່ຽວຊານເພີ່ມຂຶ້ນຈາກ 5% ເມື່ອປີກ່ອນ. ແຕ່ປະສິດທິພາບທີ່ຂັບເຄື່ອນດ້ວຍ AI ແມ່ນຍັງຊ່ວຍສ້າງຮູບແບບການເຮັດວຽກ ແລະ ຕຳແໜ່ງງານປະເພດໃໝ່ດ້ວຍເຊັ່ນດັນ.
ທ່ານ ຊູວີ ພລູກຄິເນນ ທີ່ປຶກສາອາວຸໂສຂອງສະພາການຄ້າແຟງລັງໃຫ້ຮູ້ວ່າ: ການປ່ຽນແປງເຫຼົ່ານີ້ແມ່ນມີຜົນດີເປັນສ່ວນໃຫຍ່, ໂດຍເພີ່ມທະວີປະສິດທິພາບການເຮັດວຽກ ແລະ ເປີດໂອກາດໃຫ້ການນຳໃຊ້ຊັບພະຍາກອນມະນຸດໃນດ້ານອື່ນໆຫຼາຍຂຶ້ນ. ຢ່າງໃດກໍຕາມ, ແຕ່ຍັງຄົງມີສິ່ງທ້າທາຍທ່າມກາງການວ່າງງານທີ່ສູງ ແລະ ລະດັບທັກສະທີ່ຫຼຸດລົງ.
ທ່ານ ພລູກຄິເນນ ເນັ້ນໜັກວ່າ: ຜູ້ຊອກຫາວຽກເຮັດງານທຳຈຳເປັນຕ້ອງໄດ້ຮັບໂອກາດໃນການພັດທະນາທັກສະໃໝ່ໆ ເພື່ອໃຫ້ທັນກັບການປ່ຽນແປງທາງດ້ານເຕັກໂນໂລຊີຢ່າງໄວວາ. ໃນຂະນະທີ່ບໍລິສັດຈໍານວນຫຼາຍຈະມີໂຄງການຝຶກອົບຮົມພາຍໃນຢູ່ແລ້ວ, ແຕ່ 54% ຂອງຜູ້ຕອບແບບສອບຖາມຊີ້ໃຫ້ເຫັນວ່າລະບົບການສຶກສາຂອງແຟັງລັງຍັງບໍ່ສາມາດຜະລິດບຸກຄະລາກອນທີ່ກຽມພ້ອມສຳລັບອະນາຄົດໄດ້ຢ່່າງພຽງພໍ.
ທ່ານ ພລູກຄິເນນ ຮຽກຮ້ອງໃຫ້ສຸມໃສ່ທັກສະພື້ນຖານ ແລະ ສົ່ງເສີມການຮຽນຮູ້ຕະຫຼອດຊີວິດທີ່ມີຄວາມຍືດຍຸ່ນຫຼາຍຂຶ້ນ, ລວມທັງການຈັດຫຼັກສູດຝຶກອົບຮົມໄລຍະສັ້ນທີ່ເນັ້ນສະເພາະດ້ານ ແລະ ສອດຄ່ອງກັບຄວາມຕ້ອງການຂອງບ່ອນເຮັດວຽກ. ທ່ານກ່າວຕື່ມວ່າ: ກາລະໂອກາດທີ່ສຳຄັນສຳລັບການເຕີບໂຕດ້ານຜະລິດຕະພາບແມ່ນຢູ່ຂ້າງໜ້າ, ແຕ່ແຟັງລັງຕ້ອງພັດທະນາທັກສະຂອງມະນຸດໄປພ້ອມໆກັນດ້ວຍ.
ຜົນການສໍາຫຼວດພົບວ່າ: ຜົນກະທົບຂອງປັນຍາປະດິດ ແລະ ລະບົບອັດຕະໂນມັດແມ່ນເຫັນໄດ້ຢ່າງຊັດເຈນທີ່ສຸດໃນອົງການຈັດຕັ້ງຂະໜາດໃຫຍ່. ໂດຍສອງສ່ວນສາມຂອງບໍລິສັດທີ່ມີພະນັກງານຫຼາຍກວ່າ 250 ຄົນລາຍງານວ່າ: ປະສິດທິພາບຂອງການເຮັດວຽກດີຂຶ້ນ, ໃນຂະນະທີ່ເຄິ່ງໜຶ່ງໄດ້ລາຍງານວ່າວຽກງານການບໍລິຫານຫຼຸດລົງ.
ທັງນີ້, ການສໍາຫຼວດດັ່ງກ່າວດໍາເນີນໃນລະຫວ່າງວັນທີ 18-22 ສິງຫາ 2025, ໄດ້ກວມເອົາ 1,035 ບໍລິສັດໃນຂະແໜງການຕ່າງໆທົ່ວແຟັງລັງ.
ຄໍາເຫັນ