ບົດລາຍງານໄດ້ລະບຸວ່າ: ໃນໄລຍະເຄິ່ງທຳອິດຂອງປີ 2026, ການລົງທຶນ ແລະ ການຜະລິດທີ່ກ່ຽວຂ້ອງກັບ AI ຍັງສືບຕໍ່ເຕີບໂຕຢ່າງໄວວາໃນຫຼາຍປະເທດ ຊຶ່ງຊ່ວຍຊົດເຊີຍຜົນກະທົບທາງເສດຖະກິດໂດຍລວມທີ່ເກີດຈາກຂໍ້ຂັດແຍ່ງໃນຕາເວັນອອກກາງບາງສ່ວນ. ໃນຂະນະດຽວກັນ, ອັດຕາການເຕີບໂຕປະຈຳປີຂອງເສດຖະກິດໂລກໄດ້ຊ້າລົງເຫຼືອ 2.6% ໃນໄລຍະດັ່ງກ່າວ, ຫຼຸດລົງຈາກ 3.6% ໃນໄລຍະເຄິ່ງທີ່ສອງຂອງປີ 2025.
OECD ໄດ້ຊີ້ໃຫ້ເຫັນວ່າ: ການເຕີບໂຕຂອງລວມຍອດຜະລິດຕະພັນພາຍໃນປະເທດ(GDP)ທີ່ແທ້ຈິງໃນໄຕມາດທີສອງຂອງປີ 2026ຂອງຫຼາຍປະເທດແມ່ນໄດ້ຮັບແຮງຂັບເຄື່ອນຈາກການລົງທຶນໃນພື້ນຖານໂຄງລ່າງສູນຂໍ້ມູນ ແລະ ອຸປະກອນເຕັກໂນໂລຊີ ຊຶ່ງໄດ້ຊ່ວຍຊຸກຍູ້ການເຕີບໂຕທາງເສດຖະກິດຢ່າງຫຼວງຫຼາຍໃຫ້ກັບຫຼາຍປະເທດທີ່ຜະລິດເຕັກໂນໂລຊີທີ່ກ່ຽວຂ້ອງ ແລະ ຊິ້ນສ່ວນການກໍ່ສ້າງ.
ອີງຕາມສຳນັກຂ່າວສານຊິນຮວາລາຍງານວ່າ: OECD ຄາດຄະເນການເຕີບໂຕຂອງເສດຖະກິດໂລກຢູ່ທີ່ 2.9% ໃນປີ 2026 ແລະ 3.0% ໃນປີ 2027. ໂດຍໃນຫຼາຍປະເທດຂອງກຸ່ມG20, ການໃຊ້ຈ່າຍ ແລະ ການຜະລິດທີ່ກ່ຽວຂ້ອງກັບ AI ຈະສືບຕໍ່ຊຸກຍູ້ການເຕີບໂຕ ຊຶ່ງມັກຈະຊົດເຊີຍການລົງທຶນທີ່ຂ້ອນຂ້າງຊ້າໃນຂະແໜງການອື່ນໆ.
ບົດລາຍງານຂອງ OECD ຍັງລະບຸວ່າ: ການຂະຫຍາຍຕົວຂອງການລົງທຶນທີ່ກ່ຽວຂ້ອງກັບ AI ແລະ ການຜະລິດທີ່ກ່ຽວຂ້ອງກັບເຕັກໂນໂລຊີໃນຫຼາຍປະເທດສາມາດສົ່ງເສີມການເຕີບໂຕທາງເສດຖະກິດໃນໄລຍະສັ້ນ. ນອກຈາກນັ້ນ, ເຕັກໂນໂລຊີAI ສາມາດເພີ່ມຜົນຜະລິດຢ່າງຫຼວງຫຼາຍເມື່ອນຳໄປປະສົມປະສານເຂົ້າໃນຂະບວນການຜະລິດຢ່າງມີປະສິດທິພາບ.
ຢ່າງໃດກໍຕາມ, OECD ເຕືອນວ່າ: ການຂາດແຄນພະລັງງານໃນອະນາຄົດອາດຈະສ້າງຄວາມເສຍຫາຍຢ່າງຮ້າຍແຮງຕໍ່ອຸດສາຫະກຳທີ່ມີການເຕີບໂຕເຊັ່ນ:AI ຊຶ່ງເປັນອຸດສາຫະກຳທີ່ຕ້ອງອາໄສພະລັງງານໃນລະດັບສູງ.
ນອກຈາກນັ້ນ, ຍັງມີຄວາມສ່ຽງທີ່ຜົນຕອບແທນຈາກການລົງທຶນຂອງ AI ອາດຈະຕໍ່າກວ່າທີ່ຄາດໄວ້ ຫຼື ອາດໃຊ້ເວລາດົນກວ່າທີ່ຄາດຄະເນໄວ້ໃນປັດຈຸບັນ, ໂດຍສະເພາະຖ້າເກີດບັນຫາໃນປັດໄຈການຜະລິດເຊັ່ນ: ໄຟຟ້າ ຫຼື ເຊມີຄອນດັກເຕີທີ່ກ້າວໜ້າ.
ນອກຈາກນັ້ນ, ບົດລາຍງານຂອງ OECD ລະບຸວ່າ: ຄວາມກັງວົນດ້ານຄວາມປອດໄພທີ່ເພີ່ມຂຶ້ນກ່ຽວກັບ AI ອາດຈະເຮັດໃຫ້ການພັດທະນາ ຫຼື ການຮັບຮອງເອົາມານຳໃຊ້ຊ້າລົງ, ໃນຂະນະທີ່ການເພິ່ງພາອາໄສການກູ້ຢືມ ແລະ ໂຄງສ້າງທາງການເງິນທີ່ສັບສົນເພີ່ມຂຶ້ນຂອງບໍລິສັດ AI, ບວກກັບຄວາມສ່ຽງດ້ານສິນເຊື່ອທີ່ເພີ່ມຂຶ້ນສູງ, ອາດຈະເຮັດໃຫ້ຄວາມຜັນຜວນຂອງຕະຫຼາດຮ້າຍແຮງຂຶ້ນ. ຖ້າຫາກຄວາມເຊື່ອໝັ້ນຂອງນັກລົງທຶນເກີດການປ່ຽນແປງຢ່າງກະທັນຫັນ.
ຄໍາເຫັນ