ກະຊວງດັ່ງກ່າວລະບຸວ່າ: ຄ່າທຳນຽມທີ່ສະເໜີໃໝ່ນີ້ຈະຊ່ວຍຊົດເຊີຍຄ່າໃຊ້ຈ່າຍຂອງລັດຖະບານບາງສ່ວນສຳລັບການຄຸ້ມຄອງລະບົບການເຂົ້າເມືອງທີ່ຖືກກົດໝາຍ, ກວມເອົາທັງຕົ້ນທຶນໃນຂະບວນການພິຈາລະນາ ແລະ ຕັດສິນຄຳຮ້ອງ, ລວມທັງການບໍລິການໂອນສັນຊາດ. ໂດຍກະຊວງດັ່ງກ່າວຄາດຄະເນວ່າຄ່າທຳນຽມນີ້ຈະສ້າງລາຍໄດ້ປະມານ 8.8 ຕື້ໂດລາຕໍ່ປີ, ໂດຍອີງໃສ່ຈຳນວນຜູ້ຍື່ນຄຳຮ້ອງຂໍວີຊາ H-1B ທີ່ກຳນົດໄວ້ບໍ່ເກີນ 85,000 ຄົນຕໍ່ປີ.
ຢ່າງໃດກໍຕາມ, ຄ່າທຳນຽມເພີ່ມເຕີມດັ່ງກ່າວຈະບໍ່ນຳໃຊ້ກັບຄຳຮ້ອງຂໍວີຊາ H-1B ທີ່ຢູ່ນອກລະບົບໂຄຕ້າ ເຊັ່ນ:ໃບຄຳຮ້ອງທີ່ຍື່ນໂດຍອົງການຄົ້ນຄວ້າທີ່ບໍ່ຫວັງຜົນກຳໄລບາງແຫ່ງ, ສະຖາບັນຄົ້ນຄວ້າຂອງລັດຖະບານ ແລະ ສະຖາບັນການສຶກສາຊັ້ນສູງ.
ລັດຖະບານຈະເປີດຮັບຄຳເຫັນຈາກສາທາລະນະ ເປັນເວລາ 30 ວັນ ກ່ອນທີ່ຂໍ້ສະເໜີດັ່ງກ່າວຈະມີຜົນບັງຄັບໃຊ້. ໂດຍ ໜັງສືພິມ Wall Street Journal ລາຍງານວ່າ, ຖ້າຂໍ້ສະເໜີໃໝ່ນີ້ໄດ້ຮັບການຮັບຮອງ, ຂະແໜງເຕັກໂນໂລຊີ ແລະ ການເງິນຈະຮັບພາລະເພີ່ມເຕີມ, ຍ້ອນວ່າຂະແໜງການເຫຼົ່ານີ້ອາໄສວີຊາ H-1B ເປັນຫຼັກໃນການຈ້າງນັກສຶກສາຕ່າງປະເທດທີ່ມີຄວາມສາມາດຈາກມະຫາວິທະຍາໄລ ໃນ ສະຫະລັດ ອາເມຣິກາ.
ຄໍາເຫັນ