ກຸ່ມ NDG, ປະກອບດ້ວຍອົງການຄຸ້ມຄອງ, ອົງການພາກລັດ, ບໍລິສັດນ້ຳ ແລະ ອົງການດ້ານກະສິກຳ ໄດ້ເປີດເຜີຍວ່າ: ຊັບພະຍາກອນນ້ຳໃນທົ່ວທຸກພາກພື້ນຂອງອັງກິດກຳລັງປະເຊີນກັບຄວາມກົດດັນທີ່ເພີ່ມຂຶ້ນ ແລະ ຜົນກະທົບຕໍ່ຂະແໜງກະສິກຳ, ການສະໜອງນ້ຳປະປາ, ການເດີນເຮືອ ແລະ ສິ່ງແວດລ້ອມມີທ່າອ່ຽງຮຸ່ນແຮງຂຶ້ນ.
ເຂດ East Midlands, Lincolnshire ແລະ Northamptonshire, ລວມທັງ Kent ແລະ East Sussex, ພ້ອມທັງ Solent ແລະ South Downs, ແມ່ນພື້ນທີ່ຫຼ້າສຸດທີ່ຖືກປະກາດວ່າປະສົບກັບໄພແຫ້ງແລ້ງໃນວັນທີ 10 ສິງຫາ ຜ່ານມາ ຊຶ່ງເຮັດໃຫ້ພື້ນທີ່ທັງໝົດ 71.3% ຂອງປະເທດອັງກິດປະສົບກັບສະພາບໄພແຫ້ງແລ້ງຢ່າງກະທັນຫັນ ຊຶ່ງເກີດຂຶ້ນຢ່າງໄວວາ ຍ້ອນປະລິມານນ້ຳຝົນທີ່ຕໍ່າຫຼາຍບວກກັບອຸນຫະພູມທີ່ເພີ່ມສູງຂຶ້ນ.
ປັດຈຸບັນ, ປະຊາກອນປະມານ 45 ລ້ານຄົນໃນປະເທດອັງກິດອາໄສຢູ່ໃນເຂດທີ່ປະສົບກັບໄພແຫ້ງແລ້ງ ແລະຫຼາຍກວ່າ 27 ລ້ານຄົນຢູ່ພາຍໃຕ້ຂໍ້ຈຳກັດການໃຊ້ນໍ້າ.
ບົດລາຍງານຊີ້ໃຫ້ເຫັນວ່າ: ສະຖານະການໄພແຫ້ງແລ້ງຮຸນແຮງຂຶ້ນຫຼັງຈາກອັງກິດໄດ້ປະສົບກັບເດືອນກໍລະກົດທີ່ມີຝົນຕົກນ້ອຍທີ່ສຸດໃນຮອບ 190 ປີ, ໂດຍມີຝົນຕົກໃນເດືອນສິງຫາພຽງແຕ່ 5% ຂອງລະດັບທີ່ຄາດຄະເນໄວ້.
ທ່ານ ເອມມາ ຮາດີ ລັດຖະມົນຕີກະຊວງນ້ຳຂອງອັງກິດ ກ່າວວ່າ: ລັດຖະບານຮັບຮູ້ວ່າສະພາບອາກາດໃນລະດູຮ້ອນນີ້ໄດ້ສ້າງຄວາມຫຍຸ້ງຍາກໃຫ້ແກ່ປະຊາຊົນ, ໂດຍສະເພາະຊາວກະສິກອນທີ່ໄດ້ຮັບຜົນກະທົບໂດຍກົງຈາກການປ່ຽນແປງຂອງດິນຟ້າອາກາດ ຊຶ່ງນຳໄປສູ່ໄພນ້ຳຖ້ວມ ແລະ ໄພແຫ້ງແລ້ງທີ່ເກີດຂຶ້ນເລື້ອຍໆ.
ຄໍາເຫັນ