ເມື່ອບໍ່ດົນມານີ້, ຢູ່ພະແນກປັກເຂັມໂຮງໝໍ 109 ສປປ ລາວ, ທ່ານ ເສີງຣຸ້ຍສື (Shen Ruishi) ອາຍຸ 26 ປີ ອາສາສະໝັກຊາວໜຸ່ມຈີນ ກໍາລັງຫຍຸ້ງວຽກການບົ່ງມະຕິພະຍາດໃຫ້ແກ່ຄົນເຈັບ. ທ່ານ ໄດ້ບົ່ງມະຕິພະຍາດດ້ວຍແພດແຜນຈີນ ຢ່າງຊໍານານ ພາຍໃຕ້ການຊ່ວຍເຫຼືອຂອງນາຍພາສາແປ.
ທ່ານ ເສີງຣຸ້ຍສື ມາຈາກໂຮງໝໍຊູກວາງ (SHUGUANG HOSPITAL) ທີ່ຂຶ້ນກັບມະຫາວິທະຍາໄລແພດແຜນ ແລະ ຢາພື້ນເມືອງຈີນ ຊຽງໄຮ້, ເປັນອາສາສະໝັກ ໃນໂຄງການອາສາສະໝັກຊາວໜຸ່ມຈີນ (ຊຽງໄຮ້) ຊ່ວຍເຫຼືອປະເທດລາວ ຊຸດທີ 12. ໃນວັນທີ 26 ພະຈິກ 2023, ອາສາສະໝັກ 5 ຄົນ ຊຶ່ງລວມທັງ ທ່ານ ເສີງຣຸ້ຍສື ໄດ້ເດີນທາງມາຮອດປະເທດລາວ ແລະ ເລີ່ມອາສາສະໝັກ ໃຫ້ບໍລິການເປັນເວລາ 1 ປີ ໃນຂົງເຂດຕ່າງໆ ເຊັ່ນ: ການສອນພາສາຈີນ, ວິຊາປັກເຂັມຕາມແພດແຜນຈີນ, ເຕັກນິກຂໍ້ມູນຂ່າວສານເປັນຕົ້ນ.
ທ່ານ ເສີງຣຸ້ຍສື ກ່າວວ່າ: “ທາງນະຄອນຫຼວງວຽງຈັນ ໄດ້ຮັບປະກັນທຸກດ້ານຂອງພວກເຮົາເປັນຢ່າງດີ, ບໍ່ຕ້ອງເປັນຫ່ວງນຳເງື່ອນໄຂ ດ້ານຊີວິດການເປັນຢູ່, ແຕ່ວ່າ ພວກເຮົາກໍໄດ້ພົບຄວາມຫຍຸ້ງຍາກຫຼາຍຢ່າງໃນວຽກງານ”. ທ່ານ ເສີງຣຸ້ຍສື ບອກໃຫ້ຮູ້ວ່າ: ເຖິງແມ່ນວ່າໂຮງໝໍ 109 ເປັນໂຮງໝໍລັດ, ແຕ່ກໍຍັງຂາດເຂີນອຸປະກອນການແພດພື້ນຖານຫຼາຍຢ່າງ.
ທ່ານ ເສີງຣຸ້ຍສື ກ່າວວ່າ: “ຄົນເຈັບມາປົວພະຍາດ, ປົກກະຕິແລ້ວ ຈະບອກເຮົາວ່າ, ຕົນເອງເຈັບຄໍ, ເຈັບແອວ ຢ່າງງ່າຍດາຍ, ຍ້ອນບັນຫາເລື່ອງພາສາ, ຈຶ່ງບໍ່ສາມາດບົ່ງມະຕິພະຍາດໃຫ້ຖືກຕ້ອງແມ໋ນຢຳ ຄືກັນກັບຢູ່ປະເທດຈີນ ແລະ ບໍ່ສາມາດຮັບຮູ້ປະຫວັດການຕິດພະຍາດ ຫຼື ເຈັບເປັນຂອງຄົນເຈັບ ພາຍໃນເວລາສັ້ນ”. ສະນັ້ນ, ໃນເວລາບົ່ງມະຕິໃຫ້ຄົນເຈັບ, ຂ້າພະເຈົ້າ ຈະປະສານສົມທົບກັບຂັ້ນຕອນການປິ່ນປົວພື້ນຖານຂອງທ້ອງຖິ່ນ, ພ້ອມທັງອີງໃສ່ຄວາມຮູ້ດ້ານການບົ່ງມະຕິພະຍາດຕາມແພດແຜນຈີນ ເພື່ອວາງແຜນການປິ່ນປົວໃຫ້ຄົນເຈັບ ຕາມສະພາບຕົວຈິງ ຂອງແຕ່ລະຄົນ.
ຈັນຍາບັນດ້ານການແພດຂອງ ທ່ານ ເສີງຣຸ້ຍສື ໄດ້ຮັບຄວາມຍິນດີຈາກປະຊາຊົນທ້ອງຖິ່ນຫຼາຍ, ໃນເວລາພຽງແຕ່ເດືອນກວ່າໆເທົ່ານັ້ນ, ກໍມີຄົນເຈັບຫຼາຍກວ່າ 70% ກັບມາປົວພະຍາດນຳເພິ່ນອີກ. ເຊັ່ນດຽວກັນ ກັບ ທ່ານ ເສີງຣຸ້ຍສື ຫຼັງຈາກເດີນທາງມາເຖິງປະເທດລາວແລ້ວ, ອາສາສະໝັກອີກ 4 ຄົນ ກໍໄດ້ຕັ້ງໜ້າປັບຕົວໃຫ້ຊິນເຄີຍ ກັບຊີວິດການເປັນຢູ່ຂອງປະເທດລາວ ດ້ວຍການບໍລິການປະຊາຊົນທ້ອງຖິ່ນ ເປັນຢ່າງດີ ດ້ວຍຄວາມສາມາດຂອງຕົນ.
ທ່ານ ຢາວຊຸ້ນ (Yao Shun) ເປັນຫົວໜ້າທີມງານອາສາສະໝັກຊາວໜຸ່ມຊຸດນີ້, ລາວມາຈາກ ໂຄງການແຫ່ງຄວາມຫວັງ ແລະ ສູນຊີ້ນໍາວຽກງານອາສາສະໝັກຊາວໜຸ່ມນະຄອນຊຽງໄຮ້, ປັດຈຸບັນນີ້ ເປັນອາສາສະໝັກຢູ່ພະແນກການພັດທະນາເຕັກນິກວິຊາຊີບສູນກາງຊາວໜຸ່ມລາວ.
ທ່ານ ຢາວຊຸ້ນ ໄດ້ຮັບຜິດຊອບການບໍລິການດ້ານການສອນພາສາຈີນ, ທ່ານກ່າວວ່າ: “ຫຼັກສູດຂອງພວກເຮົາ ໄດ້ແບ່ງເປັນ 2 ຫ້ອງ ຄື: ຫ້ອງຜູ້ບໍ່ເຄີຍຮຽນພາສາຈີນ ແລະ ຫ້ອງຜູ້ທີ່ສາມາດເວົ້າ ແລະ ຟັງພາສາຈີນໄດ້ໜ້ອຍໜຶ່ງ, ພ້ອມທັງໄດ້ອາໄສສື່ໃໝ່ຕ່າງໆ ເພື່ອໃຫ້ນັກຮຽນສາມາດກໍາໄດ້ທັກສະການຟັງ, ການເວົ້າ, ການອ່ານ ແລະ ການຂຽນພາສາຈີນ”.
ທ່ານ ຢາວຊຸ້ນ ກ່າວຕື່ມວ່າ, “ອາສາສະໝັກທຸກຄົນລ້ວນແຕ່ເປັນທູດ ເສີມສ້າງມິດຕະພາບ ລະຫວ່າງ ສອງຊາດຈີນ ແລະ ລາວ. ພວກເຮົາຈະປະຕິບັດຕາມລະບຽບການບໍລິການຂອງອາສາສະໝັກຢ່າງເຂັ້ມງວດ, ຈະດຳເນີນວຽກງານອາສາສະໝັກແບບອ້າຍນ້ອງກັນ, ຮ່ວມກັນໃຫ້ການບໍລິການ ທີ່ມີຄວາມອົບອຸ່ນຂອງຈີນແກ່ປະຊາຊົນລາວ”.
ນັບຕັ້ງແຕ່ປີ 2002 ເປັນຕົ້ນມາ, ໂດຍໄດ້ຮັບການມອບໝາຍຈາກຄະນະກໍາມະການສູນກາງຄະນະຊາວໜຸ່ມພັກກອມມູນິດຈີນ ແລະ ສະມາຄົມອາສາສະໝັກຊາວໜຸ່ມຈີນ, ນະຄອນຊຽງໄຮ້ ໄດ້ສົ່ງອາສາສະໝັກຊາວໜຸ່ມດີເດັ່ນ ທັງໝົດ 11 ຊຸດ ຈໍານວນ 118 ຄົນ, ມາດຳເນີນວຽກງານອາສາສະໝັກໃນດ້ານການສອນພາສາຈີນ-ອັງກິດ, ການຝຶກຊ້ອມກິລາ, ການຝຶກອົບຮົມດ້ານຄອມພິວເຕີ, ການແພດ ແລະ ສາທາລະນະສຸກ, ເຕັກນິກການກະເສດ, ວຽກງານຖະແຫຼງຂ່າວ ແລະ ອື່ນໆ ຢູ່ປະເທດລາວ.
ແຫຼ່ງຂ່າວ: ບັນຊີວິແຊັດທາງການ “ອາສາສະໝັກຊາວໜຸ່ມຈີນ”
ຄໍາເຫັນ