ອັດຕະປື​ ອະນຸຍາດໃຫ້ເອ​ກະຊົນ​ ດໍາເນີນໂຄງການພັດທະທະນາກະສິກໍາແບບຍືນຍົງ​

ການເຊັນສັນຍາໃນຄັ້ງນີ້, ແມ່ນການຮ່ວມມືກັນ ລະຫວ່າງ ຫ້ອງການຄະນະສົ່ງເສີມການລົງທຶນແຂວງ (ຕາງໜ້າໃຫ້ພາກລັດ) ແລະ 6 ບໍລິ ສັດເອກະຊົນ ເພື່ອດຳເນີນໂຄງການພັດທະນາກະສິກຳແບບຍືນຍົງ, ຊຶ່ງໂຄງການດັ່ງກ່າວ ມີຈຸດປະສົງເພື່ອຟື້ນຟູເນື້ອທີ່ປ່າເສື່ອມໂຊມ ໃຫ້ມີຄວາມຂຽວງາມຄືນໃໝ່, ໂດຍຫັນມາປູກໄມ້ໃຫ້ໝາກທີ່ມີມູນຄ່າທາງເສດຖະກິດສູງ ເປັນຕົ້ນ ຖົ່ວລຽນ ເພື່ອເປັນສິນຄ້າສົ່ງອອກ, ສ້າງວຽກເຮັດງານທຳໃຫ້ແກ່ປະຊາຊົນໃນທ້ອງຖິ່ນ, ຊຸກຍູ້ການເຕີບໂຕທາງດ້ານເສດຖະກິດຂອງເມືອງສະໜາມໄຊ, ປະກອບສ່ວນເຂົ້າໃນການພັດທະນາເສດຖະກິດ- ສັງຄົມ ຂອງແຂວງອັດຕະປື ໃຫ້ມີຄວາມເຂັ້ມແຂງຂຶ້ນກວ່າເກົ່າ ຕາມທິດທາງການພັດທະນາກະສິກຳເປັນສິນຄ້າທີ່ທັນສະໄໝ ແລະ ຍືນຍົງ.

ໂຄງການດັ່ງກ່າວ, ມີອາຍຸສໍາປະທານ 30 ປີ, ໂດຍຈະນໍາໃຊ້ເນື້ອທີ່ດິນທັງໝົດ 528,02 ເຮັກຕາ ສໍາປະທານໃນເຂດ 2 ບ້ານເປົ້າໝາຍ ໃນນີ້, ເຂດບ້ານພອນມະນີ, ມີເນື້ອທີ່ 343,23 ເຮັກຕາ ຈະມີ 4 ບໍລິສັດສຳປະທານ ຄື: ບໍລິສັດ ແສງຄໍາ ພັດທະນາຄົບວົງຈອນ ຈຳກັດຜູ້ດຽວ ໄດ້ຮັບສໍາປະທານໃນເນື້ອທີ່ 85,63 ເຮັກຕາ, ບໍລິສັດ ເມກມູນຄໍາ ຂາເຂົ້າ-ຂາອອກ ແລະ ກະສິກຳຄົບວົງຈອນ ຈຳກັດຜູ້ດຽວ ໄດ້ຮັບສໍາປະທານ ໃນເນື້ອທີ່ 84,12 ເຮັກຕາ, ບໍລິສັດ ວັນຊະນະ ກະສິກຳ ແລະ ກໍ່ສ້າງ ຄົບວົງຈອນ ຈຳກັດຜູ້ດຽວ ໄດ້ຮັບສໍາປະທານໃນເນື້ອທີ່ 78,14 ເຮັກຕາ, ບໍລິສັດ ວຽງສະໄໝພັດທະນາກະສິກຳ ແລະ ກໍ່ສ້າງຄົບວົງຈອນ ຈຳກັດຜູ້ດຽວ ໄດ້ຮັບສໍາປະທານໃນເນື້ອທີ່ 95,34 ເຮັກຕາ, ສ່ວນເຂດ ບ້ານແບ່ງວິໄລ, ມີໃນເນື້ອທີ່ 184,79 ເຮັກຕາ, ມີ 2 ບໍລິສັດ ຄື: ບໍລິສັດ ແສງອາລຸນ ຂາເຂົ້າ-ຂາອອກ ກະສິກຳ ແລະ ບໍ່ແຮ່ ຈຳກັດຜູ້ດຽວ ໄດ້ຮັບສໍາປະທານໃນເນື້ອທີ່ 87,69 ເຮັກຕາ, ບໍລິສັດ ແສງໄຊ ຂາເຂົ້າ-ຂາອອກ ແລະ ກະສິກຳ ຄົບວົງຈອນ ຈຳກັດຜູ້ດຽວ ໄດ້ຮັບສໍາປະທານໃນເນື້ອທີ່ 97,1 ເຮັກຕາ.

ໂອກາດດັ່ງກ່າວ, ບັນດາຕົວແທນຈາກພາກລັດ ແລະ ບໍລິສັດເອກະຊົນ ກໍໄດ້ຮ່ວມກັນລົງນາມໃນບົດບັນທຶກ ເພື່ອເລີ່ມດຳເນີນການຈັດຕັ້ງປະຕິບັດໂຄງການໃຫ້ປະກົດຜົນເປັນຈິງຕາມແຜນການທີ່ວາງໄວ້.

ຂ່າວ: ວົງສະໄໝ